૨. સાગતત્થેરઅપદાનં

૧૭. ‘‘સોભિતો નામ નામેન, અહોસિં બ્રાહ્મણો તદા;

પુરક્ખતો સસિસ્સેહિ, આરામં અગમાસહં.

૧૮. ‘‘ભગવા તમ્હિ સમયે, ભિક્ખુસઙ્ઘપુરક્ખતો;

આરામદ્વારા નિક્ખમ્મ, અટ્ઠાસિ પુરિસુત્તમો.

૧૯. ‘‘તમદ્દસાસિં સમ્બુદ્ધં, દન્તં દન્તપુરક્ખતં;

સકં ચિત્તં પસાદેત્વા, સન્થવિં લોકનાયકં.

૨૦. ‘‘યે કેચિ પાદપા સબ્બે, મહિયા તે વિરૂહરે;

બુદ્ધિમન્તો તથા સત્તા, રુહન્તિ જિનસાસને.

૨૧. ‘‘સત્થવાહોસિ સપ્પઞ્ઞો, મહેસિ બહુકે જને;

વિપથા ઉદ્ધરિત્વાન, પથં આચિક્ખસે તુવં.

૨૨. ‘‘દન્તો દન્તપરિકિણ્ણો [પુરક્ખતો (સ્યા.)], ઝાયી ઝાનરતેહિ ચ;

આતાપી પહિતત્તેહિ, ઉપસન્તેહિ તાદિભિ.

૨૩. ‘‘અલઙ્કતો પરિસાહિ, પુઞ્ઞઞાણેહિ સોભતિ;

પભા નિદ્ધાવતે તુય્હં, સૂરિયોદયને યથા.

૨૪. ‘‘પસન્નચિત્તં દિસ્વાન, મહેસી પદુમુત્તરો;

ભિક્ખુસઙ્ઘે ઠિતો સત્થા, ઇમા ગાથા અભાસથ.

૨૫. ‘‘‘યો સો હાસં જનેત્વાન, મમં કિત્તેસિ બ્રાહ્મણો;

કપ્પાનં સતસહસ્સં, દેવલોકે રમિસ્સતિ.

૨૬. ‘‘‘તુસિતા હિ ચવિત્વાન, સુક્કમૂલેન ચોદિતો;

ગોતમસ્સ ભગવતો, સાસને પબ્બજિસ્સતિ.

૨૭. ‘‘‘તેન કમ્મેન સુકતેન, અરહત્તં [તુટ્ઠહટ્ઠં (સ્યા. ક.)] લભિસ્સતિ;

સાગતો નામ નામેન, હેસ્સતિ સત્થુ સાવકો’.

૨૮. ‘‘પબ્બજિત્વાન કાયેન, પાપકમ્મં વિવજ્જયિં;

વચીદુચ્ચરિતં હિત્વા, આજીવં પરિસોધયિં.

૨૯. ‘‘એવં વિહરમાનોહં, તેજોધાતૂસુ કોવિદો;

સબ્બાસવે પરિઞ્ઞાય, વિહરામિ અનાસવો.

૩૦. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સાગતો થેરો ઇમા ગાથાયો અભાસિત્થાતિ.

સાગતત્થેરસ્સાપદાનં દુતિયં.