૧. સદ્દસઞ્ઞકત્થેરઅપદાનં

૧. ‘‘મિગલુદ્દો પુરે આસિં, અરઞ્ઞે કાનને અહં;

તત્થદ્દસાસિં સમ્બુદ્ધં, દેવસઙ્ઘપુરક્ખતં.

૨. ‘‘ચતુસચ્ચં પકાસેન્તં, ઉદ્ધરન્તં મહાજનં;

અસ્સોસિં મધુરં વાચં, કરવીકરુદોપમં [રુતોપમં (?)].

૩. ‘‘બ્રહ્મસરસ્સ મુનિનો, સિખિનો લોકબન્ધુનો;

ઘોસે ચિત્તં પસાદેત્વા, પત્તોમ્હિ આસવક્ખયં.

૪. ‘‘એકત્તિંસે ઇતો કપ્પે, યં કમ્મમકરિં તદા;

દુગ્ગતિં નાભિજાનામિ, પસાદસ્સ ઇદં ફલં.

૫. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા સદ્દસઞ્ઞકો થેરો ઇમા ગાથાયો અભાસિત્થાતિ.

સદ્દસઞ્ઞકત્થેરસ્સાપદાનં પઠમં.