૩૬. સદ્દસઞ્ઞકવગ્ગો

૧. સદ્દસઞ્ઞકત્થેરઅપદાનં

૧. ‘‘મિગલુદ્દો પુરે આસિં, અરઞ્ઞે કાનને અહં;

તત્થદ્દસાસિં સમ્બુદ્ધં, દેવસઙ્ઘપુરક્ખતં.

૨. ‘‘ચતુસચ્ચં પકાસેન્તં, ઉદ્ધરન્તં મહાજનં;

અસ્સોસિં મધુરં વાચં, કરવીકરુદોપમં [રુતોપમં (?)].

૩. ‘‘બ્રહ્મસરસ્સ મુનિનો, સિખિનો લોકબન્ધુનો;

ઘોસે ચિત્તં પસાદેત્વા, પત્તોમ્હિ આસવક્ખયં.

૪. ‘‘એકત્તિંસે ઇતો કપ્પે, યં કમ્મમકરિં તદા;

દુગ્ગતિં નાભિજાનામિ, પસાદસ્સ ઇદં ફલં.

૫. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા સદ્દસઞ્ઞકો થેરો ઇમા ગાથાયો અભાસિત્થાતિ.

સદ્દસઞ્ઞકત્થેરસ્સાપદાનં પઠમં.

૨. યવકલાપિયત્થેરઅપદાનં

૬. ‘‘નગરે અરુણવતિયા, આસિં યવસિકો તદા;

પન્થે દિસ્વાન સમ્બુદ્ધં, યવકલાપં સન્થરિં [યવકલાપમવત્થરિં (સી.)].

૭. ‘‘અનુકમ્પકો કારુણિકો, સિખી લોકગ્ગનાયકો;

મમ સઙ્કપ્પમઞ્ઞાય, નિસીદિ યવસન્થરે.

૮. ‘‘દિસ્વા નિસિન્નં વિમલં, મહાઝાયિં વિનાયકં;

પામોજ્જં જનયિત્વાન, તત્થ કાલઙ્કતો અહં.

૯. ‘‘એકત્તિંસે ઇતો કપ્પે, યં કમ્મમકરિં તદા;

દુગ્ગતિં નાભિજાનામિ, યવત્થરે ઇદં ફલં.

૧૦. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા યવકલાપિયો થેરો ઇમા ગાથાયો અભાસિત્થાતિ.

યવકલાપિયત્થેરસ્સાપદાનં દુતિયં.

૩. કિંસુકપૂજકત્થેરઅપદાનં

૧૧. ‘‘કિંસુકં પુપ્ફિતં દિસ્વા, પગ્ગહેત્વાન અઞ્જલિં;

બુદ્ધં સરિત્વા સિદ્ધત્થં, આકાસે અભિપૂજયિં.

૧૨. ‘‘ચતુન્નવુતિતો કપ્પે, યં પુપ્ફમભિપૂજયિં;

દુગ્ગતિં નાભિજાનામિ, બુદ્ધપૂજાયિદં ફલં.

૧૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા કિંસુકપૂજકો થેરો ઇમા ગાથાયો અભાસિત્થાતિ.

કિંસુકપૂજકત્થેરસ્સાપદાનં તતિયં.

૪. સકોસકકોરણ્ડદાયકત્થેરઅપદાનં

૧૪. ‘‘અક્કન્તઞ્ચ પદં દિસ્વા, સિખિનો લોકબન્ધુનો;

એકંસં અજિનં કત્વા, પદસેટ્ઠં અવન્દહં.

૧૫. ‘‘કોરણ્ડં પુપ્ફિતં દિસ્વા, પાદપં ધરણીરુહં;

સકોસકં [સકોટકં (સી. સ્યા.)] ગહેત્વાન, પદચક્કં અપૂજયિં.

૧૬. ‘‘એકત્તિંસે ઇતો કપ્પે, યં કમ્મમકરિં તદા;

દુગ્ગતિં નાભિજાનામિ, પદપૂજાયિદં ફલં.

૧૭. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સકોસક [સકોટક (સી. સ્યા.)] કોરણ્ડદાયકો થેરો ઇમા ગાથાયો અભાસિત્થાતિ.

સકોસકકોરણ્ડદાયકત્થેરસ્સાપદાનં ચતુત્થં.

૫. દણ્ડદાયકત્થેરઅપદાનં

૧૮. ‘‘કાનનં વનમોગય્હ, વેળું છેત્વાનહં તદા;

આલમ્બનં કરિત્વાન, સઙ્ઘસ્સ અદદં અહં.

૧૯. ‘‘તેન ચિત્તપ્પસાદેન, સુબ્બતે અભિવાદિય;

આલમ્બનમ્પિ દત્વાન, પક્કામિં ઉત્તરામુખો.

૨૦. ‘‘ચતુન્નવુતિતો કપ્પે, યં દણ્ડમદદિં તદા;

દુગ્ગતિં નાભિજાનામિ, દણ્ડદાનસ્સિદં ફલં.

૨૧. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા દણ્ડદાયકો થેરો ઇમા ગાથાયો અભાસિત્થાતિ.

દણ્ડદાયકત્થેરસ્સાપદાનં પઞ્ચમં.

૬. અમ્બયાગુદાયકત્થેરઅપદાનં

૨૨. ‘‘સતરંસી નામ સમ્બુદ્ધો, સયમ્ભૂ અપરાજિતો;

વુટ્ઠહિત્વા સમાધિમ્હા, ભિક્ખાય મમુપાગમિ.

૨૩. ‘‘પચ્ચેકબુદ્ધં દિસ્વાન, અમ્બયાગું અદાસહં;

વિપ્પસન્નમનં તસ્સ, વિપ્પસન્નેન ચેતસા.

૨૪. ‘‘ચતુન્નવુતિતો કપ્પે, યં કમ્મમકરિં તદા;

દુગ્ગતિં નાભિજાનામિ, અમ્બયાગુયિદં ફલં.

૨૫. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા અમ્બયાગુદાયકો થેરો ઇમા ગાથાયો અભાસિત્થાતિ.

અમ્બયાગુદાયકત્થેરસ્સાપદાનં છટ્ઠં.

૭. સુપુટકપૂજકત્થેરઅપદાનં

૨૬. ‘‘દિવાવિહારા નિક્ખન્તો, વિપસ્સી લોકનાયકો;

ભિક્ખાય વિચરન્તો સો, મમ સન્તિકુપાગમિ.

૨૭. ‘‘તતો પતીતો સુમનો, બુદ્ધસેટ્ઠસ્સ તાદિનો;

લોણસુપુટકં દત્વા, કપ્પં સગ્ગમ્હિ મોદહં.

૨૮. ‘‘એકનવુતિતો કપ્પે, યં પુટકમદાસહં;

દુગ્ગતિં નાભિજાનામિ, પુટકસ્સ ઇદં ફલં.

૨૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સુપુટકપૂજકો થેરો ઇમા ગાથાયો અભાસિત્થાતિ.

સુપુટકપૂજકત્થેરસ્સાપદાનં સત્તમં.

૮. મઞ્ચદાયકત્થેરઅપદાનં

૩૦. ‘‘વિપસ્સિનો ભગવતો, લોકજેટ્ઠસ્સ તાદિનો;

એકં મઞ્ચં મયા દિન્નં, પસન્નેન સપાણિના.

૩૧. ‘‘હત્થિયાનં અસ્સયાનં, દિબ્બયાનં સમજ્ઝગં;

તેન મઞ્ચકદાનેન, પત્તોમ્હિ આસવક્ખયં.

૩૨. ‘‘એકનવુતિતો કપ્પે, યં મઞ્ચમદદિં તદા;

દુગ્ગતિં નાભિજાનામિ, મઞ્ચદાનસ્સિદં ફલં.

૩૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા મઞ્ચદાયકો થેરો ઇમા ગાથાયો અભાસિત્થાતિ.

મઞ્ચદાયકત્થેરસ્સાપદાનં અટ્ઠમં.

૯. સરણગમનિયત્થેરઅપદાનં

૩૪. ‘‘આરુહિમ્હ તદા નાવં, ભિક્ખુ ચાજીવકો ચહં;

નાવાય ભિજ્જમાનાય, ભિક્ખુ મે સરણં અદા.

૩૫. ‘‘એકત્તિંસે ઇતો કપ્પે, યઞ્ચ મે સરણં અદા;

દુગ્ગતિં નાભિજાનામિ, સરણાગમને ફલં.

૩૬. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સરણગમનિયો થેરો ઇમા ગાથાયો અભાસિત્થાતિ.

સરણગમનિયત્થેરસ્સાપદાનં નવમં.

૧૦. પિણ્ડપાતિકત્થેરઅપદાનં

૩૭. ‘‘તિસ્સો નામાસિ સમ્બુદ્ધો, વિહાસિ વિપિને તદા;

તુસિતા હિ ઇધાગન્ત્વા, પિણ્ડપાતં અદાસહં.

૩૮. ‘‘સમ્બુદ્ધમભિવાદેત્વા, તિસ્સં નામ મહાયસં;

સકં ચિત્તં પસાદેત્વા, તુસિતં અગમાસહં.

૩૯. ‘‘દ્વેનવુતે ઇતો કપ્પે, યં દાનમદદિં તદા;

દુગ્ગતિં નાભિજાનામિ, પિણ્ડપાતસ્સિદં ફલં.

૪૦. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પિણ્ડપાતિકો થેરો ઇમા ગાથાયો અભાસિત્થાતિ.

પિણ્ડપાતિકત્થેરસ્સાપદાનં દસમં.

સદ્દસઞ્ઞકવગ્ગો છત્તિંસતિમો.