૯. ધમ્મસવનિયત્થેરઅપદાનં

૧૧૧. ‘‘પદુમુત્તરો નામ જિનો, સબ્બધમ્માન પારગૂ;

ચતુસચ્ચં પકાસેન્તો, સન્તારેસિ બહું જનં.

૧૧૨. ‘‘અહં તેન સમયેન, જટિલો ઉગ્ગતાપનો;

ધુનન્તો વાકચીરાનિ, ગચ્છામિ અમ્બરે તદા.

૧૧૩. ‘‘બુદ્ધસેટ્ઠસ્સ ઉપરિ, ગન્તું ન વિસહામહં;

પક્ખીવ સેલમાસજ્જ [સેલમાપજ્જ (સ્યા.)], ગમનં ન લભામહં.

૧૧૪. ‘‘ન મે ઇદં ભૂતપુબ્બં, ઇરિયસ્સ વિકોપનં;

દકે યથા ઉમ્મુજ્જિત્વા, એવં ગચ્છામિ અમ્બરે.

૧૧૫. ‘‘ઉળારભૂતો મનુજો, હેટ્ઠાસીનો [હેટ્ઠાપિ નો (ક.)] ભવિસ્સતિ;

હન્દ મેનં ગવેસિસ્સં, અપિ અત્થં લભેય્યહં.

૧૧૬. ‘‘ઓરોહન્તો અન્તલિક્ખા, સદ્દમસ્સોસિ સત્થુનો;

અનિચ્ચતં કથેન્તસ્સ, તમહં ઉગ્ગહિં તદા.

૧૧૭. ‘‘અનિચ્ચસઞ્ઞમુગ્ગય્હ, અગમાસિં મમસ્સમં;

યાવતાયું વસિત્વાન, તત્થ કાલઙ્કતો અહં.

૧૧૮. ‘‘ચરિમે વત્તમાનમ્હિ, તં ધમ્મસવનં [ધમ્મસવણં (સી.)] સરિં;

તેન કમ્મેન સુકતેન, તાવતિંસમગચ્છહં.

૧૧૯. ‘‘તિંસકપ્પસહસ્સાનિ, દેવલોકે રમિં અહં;

એકપઞ્ઞાસક્ખત્તુઞ્ચ, દેવરજ્જમકારયિં.

૧૨૦. ‘‘એકસત્તતિક્ખત્તુઞ્ચ, ચક્કવત્તી અહોસહં;

પદેસરજ્જં વિપુલં, ગણનાતો અસઙ્ખિયં.

૧૨૧. ‘‘પિતુગેહે નિસીદિત્વા, સમણો ભાવિતિન્દ્રિયો;

ગાથાય પરિદીપેન્તો, અનિચ્ચતમુદાહરિ [અનિચ્ચવત્થુદાહરિ (સ્યા. ક.)].

૧૨૨. ‘‘અનુસ્સરામિ તં સઞ્ઞં, સંસરન્તો ભવાભવે;

ન કોટિં પટિવિજ્ઝામિ [ન કોચિ પટિવજ્જામિ (ક.)], નિબ્બાનં અચ્ચુતં પદં [અયં ગાથા ઉપરિ ૪૩ વગ્ગે સત્તમાપદાને પુરિમગાથાય પુરેતરં દિસ્સતિ].

૧૨૩. ‘‘અનિચ્ચા વત સઙ્ખારા, ઉપ્પાદવયધમ્મિનો;

ઉપ્પજ્જિત્વા નિરુજ્ઝન્તિ, તેસં વૂપસમો સુખો.

૧૨૪. ‘‘સહ ગાથં સુણિત્વાન, પુબ્બકમ્મં અનુસ્સરિં;

એકાસને નિસીદિત્વા, અરહત્તમપાપુણિં.

૧૨૫. ‘‘જાતિયા સત્તવસ્સોહં, અરહત્તમપાપુણિં;

ઉપસમ્પાદયિ બુદ્ધો, ગુણમઞ્ઞાય ચક્ખુમા.

૧૨૬. ‘‘દારકોવ અહં સન્તો, કરણીયં સમાપયિં;

કિં મે કરણીયં અજ્જ, સક્યપુત્તસ્સ સાસને.

૧૨૭. ‘‘સતસહસ્સિતો કપ્પે, યં કમ્મમકરિં તદા;

દુગ્ગતિં નાભિજાનામિ, સદ્ધમ્મસવને ફલં.

૧૨૮. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ધમ્મસવનિયો થેરો ઇમા ગાથાયો અભાસિત્થાતિ.

ધમ્મસવનિયત્થેરસ્સાપદાનં નવમં.