૧૦. ઉક્ખિત્તપદુમિયત્થેરઅપદાનં

૧૨૯. ‘‘નગરે હંસવતિયા, અહોસિં માલિકો તદા;

ઓગાહેત્વા પદુમસરં, સતપત્તં ઓચિનામહં.

૧૩૦. ‘‘પદુમુત્તરો નામ જિનો, સબ્બધમ્માન પારગૂ;

સહ સતસહસ્સેહિ [સતસહસ્સસિસ્સેહિ (ક.)], સન્તચિત્તેહિ તાદિભિ.

૧૩૧. ‘‘ખીણાસવેહિ સુદ્ધેહિ, છળભિઞ્ઞેહિ ઝાયિભિ [સો તદા (સી.), સો સહ (ક.)];

મમ વુદ્ધિં સમન્વેસં, આગચ્છિ મમ સન્તિકં [મમ સન્તિકે (સી.), પુરિસુત્તમો (સ્યા. ક.)].

૧૩૨. ‘‘દિસ્વાનહં દેવદેવં, સયમ્ભું લોકનાયકં;

વણ્ટે છેત્વા સતપત્તં, ઉક્ખિપિમમ્બરે તદા.

૧૩૩. ‘‘યદિ બુદ્ધો તુવં વીર, લોકજેટ્ઠો નરાસભો;

સયં ગન્ત્વા સતપત્તા, મત્થકે ધારયન્તુ તે.

૧૩૪. ‘‘અધિટ્ઠહિ મહાવીરો, લોકજેટ્ઠો નરાસભો;

બુદ્ધસ્સ આનુભાવેન, મત્થકે ધારયિંસુ તે.

૧૩૫. ‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તાવતિંસમગચ્છહં.

૧૩૬. ‘‘તત્થ મે સુકતં બ્યમ્હં, સતપત્તન્તિ વુચ્ચતિ;

સટ્ઠિયોજનમુબ્બિદ્ધં, તિંસયોજનવિત્થતં.

૧૩૭. ‘‘સહસ્સક્ખત્તું દેવિન્દો, દેવરજ્જમકારયિં;

પઞ્ચસત્તતિક્ખત્તુઞ્ચ, ચક્કવત્તી અહોસહં.

૧૩૮. ‘‘પદેસરજ્જં વિપુલં, ગણનાતો અસઙ્ખિયં;

અનુભોમિ સકં કમ્મં, પુબ્બે સુકતમત્તનો.

૧૩૯. ‘‘તેનેવેકપદુમેન, અનુભોત્વાન સમ્પદા;

ગોતમસ્સ ભગવતો, ધમ્મં સચ્છિકરિં અહં.

૧૪૦. ‘‘કિલેસા ઝાપિતા મય્હં, ભવા સબ્બે સમૂહતા;

નાગોવ બન્ધનં છેત્વા, વિહરામિ અનાસવો.

૧૪૧. ‘‘સતસહસ્સિતો કપ્પે, યં પુપ્ફમભિપૂજયિં;

દુગ્ગતિં નાભિજાનામિ, એકપદુમસ્સિદં ફલં.

૧૪૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ઉક્ખિત્તપદુમિયો થેરો ઇમા ગાથાયો અભાસિત્થાતિ.

ઉક્ખિત્તપદુમિયત્થેરસ્સાપદાનં દસમં.

ગન્ધોદકવગ્ગો ચતુતિંસતિમો.