૭. નિગ્ગુણ્ડિપુપ્ફિયત્થેરઅપદાનં

૩૯. ‘‘યદા દેવો દેવકાયા, ચવતે આયુસઙ્ખયા;

તયો સદ્દા નિચ્છરન્તિ, દેવાનં અનુમોદતં.

૪૦. ‘‘‘ઇતો ભો સુગતિં ગચ્છ, મનુસ્સાનં સહબ્યતં;

મનુસ્સભૂતો સદ્ધમ્મે, લભ સદ્ધં અનુત્તરં.

૪૧. ‘‘‘સા તે સદ્ધા નિવિટ્ઠાસ્સ, મૂલજાતા પતિટ્ઠિતા;

યાવજીવં અસંહીરા, સદ્ધમ્મે સુપ્પવેદિતે.

૪૨. ‘‘‘કાયેન કુસલં કત્વા, વાચાય કુસલં બહું;

મનસા કુસલં કત્વા, અબ્યાપજ્જં નિરૂપધિં.

૪૩. ‘‘‘તતો ઓપધિકં પુઞ્ઞં, કત્વા દાનેન તં બહું;

અઞ્ઞેપિ મચ્ચે સદ્ધમ્મે, બ્રહ્મચરિયે નિવેસય’.

૪૪. ‘‘ઇમાય અનુકમ્પાય, દેવાદેવં યદા વિદૂ;

ચવન્તં અનુમોદન્તિ, એહિ દેવ પુનપ્પુનં [દેવપુરં પુન (સી.)].

૪૫. ‘‘સંવેગો મે [સંવિગ્ગોહં (સ્યા.)] તદા આસિ, દેવસઙ્ઘે સમાગતે;

કંસુ નામ અહં યોનિં, ગમિસ્સામિ ઇતો ચુતો.

૪૬. ‘‘મમ સંવેગમઞ્ઞાય, સમણો ભાવિતિન્દ્રિયો;

મમુદ્ધરિતુકામો સો, આગચ્છિ મમ સન્તિકં.

૪૭. ‘‘સુમનો નામ નામેન, પદુમુત્તરસાવકો;

અત્થધમ્માનુસાસિત્વા, સંવેજેસિ મમં તદા.

દ્વાદસમં ભાણવારં.

૪૮. ‘‘તસ્સાહં વચનં સુત્વા, બુદ્ધે ચિત્તં પસાદયિં;

તં ધીરં અભિવાદેત્વા, તત્થ કાલંકતો અહં.

૪૯. ‘‘ઉપપજ્જિં સ [ઉપપજ્જિસ્સં (સી.)] તત્થેવ, સુક્કમૂલેન ચોદિતો;

વસન્તો માતુકુચ્છિમ્હિ, પુન ધારેતિ માતુયા.

૫૦. ‘‘તમ્હા કાયા ચવિત્વાન, તિદસે ઉપપજ્જહં;

એત્થન્તરે ન પસ્સામિ, દોમનસ્સમહં તદા.

૫૧. ‘‘તાવતિંસા ચવિત્વાન, માતુકુચ્છિં સમોક્કમિં;

નિક્ખમિત્વાન કુચ્છિમ્હા, કણ્હસુક્કં અજાનહં.

૫૨. ‘‘જાતિયા સત્તવસ્સોવ [જાતિયા સત્તવસ્સેન (સ્યા.)], આરામં પાવિસિં અહં;

ગોતમસ્સ ભગવતો, સક્યપુત્તસ્સ તાદિનો.

૫૩. ‘‘વિત્થારિકે [વિત્થારિતે (સી. ક.)] પાવચને, બાહુજઞ્ઞમ્હિ સાસને;

અદ્દસં સાસનકરે, ભિક્ખવો તત્થ સત્થુનો.

૫૪. ‘‘સાવત્થિ નામ નગરં, રાજા તત્થાસિ કોસલો;

રથેન નાગયુત્તેન, ઉપેસિ બોધિમુત્તમં.

૫૫. ‘‘તસ્સાહં નાગં દિસ્વાન, પુબ્બકમ્મં અનુસ્સરિં;

અઞ્જલિં પગ્ગહેત્વાન, સમયં અગમાસહં.

૫૬. ‘‘જાતિયા સત્તવસ્સોવ, પબ્બજિં અનગારિયં;

યો સો બુદ્ધં ઉપટ્ઠાસિ, આનન્દો નામ સાવકો.

૫૭. ‘‘ગતિમા ધિતિમા ચેવ, સતિમા ચ બહુસ્સુતો;

રઞ્ઞો ચિત્તં પસાદેન્તો, નિય્યાદેસિ મહાજુતિ.

૫૮. ‘‘તસ્સાહં ધમ્મં સુત્વાન, પુબ્બકમ્મં અનુસ્સરિં;

તત્થેવ ઠિતકો સન્તો, અરહત્તમપાપુણિં.

૫૯. ‘‘એકંસં ચીવરં કત્વા, સિરે કત્વાન અઞ્જલિં;

સમ્બુદ્ધં અભિવાદેત્વા, ઇમં વાચં ઉદીરયિં.

૬૦. ‘‘‘પદુમુત્તરબુદ્ધસ્સ, દ્વિપદિન્દસ્સ સત્થુનો;

નિગ્ગુણ્ડિપુપ્ફં પગ્ગય્હ, સીહાસને ઠપેસહં.

૬૧. ‘‘‘તેન કમ્મેન દ્વિપદિન્દ, લોકજેટ્ઠ નરાસભ;

પત્તોમ્હિ અચલં ઠાનં, હિત્વા જયપરાજયં’.

૬૨. ‘‘પઞ્ચવીસસહસ્સમ્હિ, કપ્પાનં મનુજાધિપા;

અબ્બુદનિરબ્બુદાનિ, અટ્ઠટ્ઠાસિંસુ ખત્તિયા.

૬૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા નિગ્ગુણ્ડિપુપ્ફિયો થેરો ઇમા ગાથાયો અભાસિત્થાતિ.

નિગ્ગુણ્ડિપુપ્ફિયત્થેરસ્સાપદાનં સત્તમં.