૧૦. સપરિવારછત્તદાયકત્થેરઅપદાનં

૮૨. ‘‘પદુમુત્તરો લોકવિદૂ, આહુતીનં પટિગ્ગહો;

આકાસે જલવુટ્ઠીવ વસ્સતે [વસ્સતિ (સી. સ્યા.), વસ્સેતિ (?)] ધમ્મવુટ્ઠિયા.

૮૩. ‘‘તમદ્દસાસિં સમ્બુદ્ધં, દેસેન્તં અમતં પદં;

સકં ચિત્તં પસાદેત્વા, અગમાસિં સકં ઘરં.

૮૪. ‘‘છત્તં અલઙ્કતં ગય્હ, ઉપગચ્છિં નરુત્તમં;

હટ્ઠો હટ્ઠેન ચિત્તેન, આકાસે ઉક્ખિપિં અહં.

૮૫. ‘‘સુસઙ્ગહિતયાનંવ, દન્તોવ સાવકુત્તમો;

ઉપગન્ત્વાન સમ્બુદ્ધં, મત્થકે સમ્પતિટ્ઠહિ.

૮૬. ‘‘અનુકમ્પકો કારુણિકો, બુદ્ધો લોકગ્ગનાયકો;

ભિક્ખુસઙ્ઘે નિસીદિત્વા, ઇમા ગાથા અભાસથ.

૮૭. ‘‘‘યેન છત્તમિદં દિન્નં, અલઙ્કતં મનોરમં;

તેન ચિત્તપ્પસાદેન, દુગ્ગતિં સો ન ગચ્છતિ.

૮૮. ‘‘‘સત્તક્ખત્તુઞ્ચ દેવેસુ, દેવરજ્જં કરિસ્સતિ;

બાત્તિંસક્ખત્તુઞ્ચ રાજા, ચક્કવત્તી ભવિસ્સતિ.

૮૯. ‘‘‘કપ્પસતસહસ્સમ્હિ, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૯૦. ‘‘‘તસ્સ ધમ્મેસુ દાયાદો, ઓરસો ધમ્મનિમ્મિતો;

સબ્બાસવે પરિઞ્ઞાય, નિબ્બાયિસ્સતિનાસવો’.

૯૧. ‘‘બુદ્ધસ્સ ગિરમઞ્ઞાય, વાચાસભિમુદીરિતં;

પસન્નચિત્તો સુમનો, ભિય્યો હાસં જનેસહં.

૯૨. ‘‘જહિત્વા માનુસં યોનિં, દિબ્બં યોનિં [દેવયોનિં (સી.), દિબ્બયોનિં (સ્યા.)] મજ્ઝગં;

વિમાનમુત્તમં મય્હં, અબ્ભુગ્ગતં મનોરમં.

૯૩. ‘‘વિમાના નિક્ખમન્તસ્સ, સેતચ્છત્તં ધરીયતિ;

તદા સઞ્ઞં પટિલભિં, પુબ્બકમ્મસ્સિદં ફલં.

૯૪. ‘‘દેવલોકા ચવિત્વાન, મનુસ્સત્તઞ્ચ આગમિં;

છત્તિંસક્ખત્તું ચક્કવત્તી, સત્તકપ્પસતમ્હિતો.

૯૫. ‘‘તમ્હા કાયા ચવિત્વાન, આગચ્છિં [અગઞ્છિં (?)] તિદસં પુરં;

સંસરિત્વાનુપુબ્બેન, માનુસં પુનરાગમિં.

૯૬. ‘‘ઓક્કન્તં માતુકુચ્છિં મં, સેત્તચ્છત્તં અધારયું;

જાતિયા સત્તવસ્સોહં, પબ્બજિં અનગારિયં.

૯૭. ‘‘સુનન્દો નામ નામેન, બ્રાહ્મણો મન્તપારગૂ;

ફલિકં છત્તમાદાય, સાવકગ્ગસ્સ સો તદા.

૯૮. ‘‘અનુમોદિ મહાવીરો, સારિપુત્તો મહાકથી;

સુત્વાનુમોદનં તસ્સ, પુબ્બકમ્મમનુસ્સરિં.

૯૯. ‘‘અઞ્જલિં પગ્ગહેત્વાન, સકં ચિત્તં પસાદયિં;

સરિત્વા પુરિમં કમ્મં, અરહત્તમપાપુણિં.

૧૦૦. ‘‘ઉટ્ઠાય આસના તમ્હા, સિરે કત્વાન અઞ્જલિં;

સમ્બુદ્ધં અભિવાદેત્વા, ઇમં વાચં ઉદીરિયિં.

૧૦૧. ‘‘સતસહસ્સિતો કપ્પે, બુદ્ધો લોકે અનુત્તરો;

પદુમુત્તરો લોકવિદૂ, આહુતીનં પટિગ્ગહો.

૧૦૨. ‘‘તસ્સ છત્તં મયા દિન્નં, વિચિત્તં સમલઙ્કતં;

ઉભો હત્થેહિ પગ્ગણ્હિ, સયમ્ભૂ અગ્ગપુગ્ગલો.

૧૦૩. ‘‘અહો બુદ્ધો અહો ધમ્મો, અહો નો સત્થુસમ્પદા;

એકચ્છત્તસ્સ દાનેન, દુગ્ગતિં નુપપજ્જહં.

૧૦૪. ‘‘કિલેસા ઝાપિતા મય્હં, ભવા સબ્બે સમૂહતા;

સબ્બાસવે પરિઞ્ઞાય, વિહરામિ અનાસવો.

૧૦૫. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સપરિવારછત્તદાયકો થેરો ઇમા ગાથાયો અભાસિત્થાતિ.

સપરિવારછત્તદાયકત્થેરસ્સાપદાનં દસમં.

ઉમાપુપ્ફિયવગ્ગો તેત્તિંસતિમો.