૭. આરામદાયકત્થેરઅપદાનં

૩૨. ‘‘સિદ્ધત્થસ્સ ભગવતો, આરામો રોપિતો મયા;

સન્દચ્છાયેસુ [સીતછાયેસુ (સ્યા.), સન્તચ્છાયેસુ (ક.)] રુક્ખેસુ, ઉપાસન્તેસુ પક્ખિસુ.

૩૩. ‘‘અદ્દસં વિરજં બુદ્ધં, આહુતીનં પટિગ્ગહં;

આરામં અભિનામેસિં, લોકજેટ્ઠં નરાસભં.

૩૪. ‘‘હટ્ઠો હટ્ઠેન ચિત્તેન, ફલં પુપ્ફમદાસહં;

તતો જાતપ્પસાદોવ, તં વનં પરિણામયિં.

૩૫. ‘‘બુદ્ધસ્સ યમિદં દાસિં, વિપ્પસન્નેન ચેતસા;

ભવે નિબ્બત્તમાનમ્હિ, નિબ્બત્તતિ ફલં મમ.

૩૬. ‘‘ચતુન્નવુતિતો કપ્પે, યં આરામમદં તદા;

દુગ્ગતિં નાભિજાનામિ, આરામસ્સ ઇદં ફલં.

૩૭. ‘‘સત્તતિંસે ઇતો કપ્પે, સત્તાસું મુદુસીતલા;

સત્તરતનસમ્પન્ના, ચક્કવત્તી મહબ્બલા.

૩૮. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા આરામદાયકો થેરો ઇમા ગાથાયો અભાસિત્થાતિ.

આરામદાયકત્થેરસ્સાપદાનં સત્તમં.