૫. ગોસીસનિક્ખેપકત્થેરઅપદાનં

૨૧. ‘‘આરામદ્વારા નિક્ખમ્મ, ગોસીસં સન્થતં મયા;

અનુભોમિ સકં કમ્મં, પુબ્બકમ્મસ્સિદં ફલં.

૨૨. ‘‘આજાનિયા વાતજવા, સિન્ધવા સીઘવાહના;

અનુભોમિ સબ્બમેતં, ગોસીસસ્સ ઇદં ફલં.

૨૩. ‘‘અહો કારં પરમકારં, સુખત્તે સુકતં મયા;

સઙ્ઘે કતસ્સ કારસ્સ, ન અઞ્ઞં કલમગ્ઘતિ.

૨૪. ‘‘ચતુન્નવુતિતો કપ્પે, યં સીસં સન્થરિં અહં;

દુગ્ગતિં નાભિજાનામિ, સન્થરસ્સ ઇદં ફલં.

૨૫. ‘‘પઞ્ચસત્તતિકપ્પમ્હિ, સુપ્પતિટ્ઠિતનામકો;

એકો આસિં મહાતેજો, ચક્કવત્તી મહબ્બલો.

૨૬. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ગોસીસનિક્ખેપકો થેરો ઇમા ગાથાયો અભાસિત્થાતિ.

ગોસીસનિક્ખેપકત્થેરસ્સાપદાનં પઞ્ચમં.