૩૦. ચિતકપૂજકવગ્ગો

૧. ચિતકપૂજકત્થેરઅપદાનં

૧. ‘‘અજિતો નામ નામેન, અહોસિં બ્રાહ્મણો તદા;

આહુતિં યિટ્ઠુકામોહં, નાનાપુપ્ફં સમાનયિં.

૨. ‘‘જલન્તં ચિતકં દિસ્વા, સિખિનો લોકબન્ધુનો;

તઞ્ચ પુપ્ફં સમાનેત્વા, ચિતકે ઓકિરિં અહં.

૩. ‘‘એકત્તિંસે ઇતો કપ્પે, યં પુપ્ફમભિપૂજયિં;

દુગ્ગતિં નાભિજાનામિ, બુદ્ધપૂજાયિદં ફલં.

૪. ‘‘સત્તવીસે [સત્તતિંસે (ક.)] ઇતો કપ્પે, સત્તાસું મનુજાધિપા;

સુપજ્જલિતનામા તે, ચક્કવત્તી મહબ્બલા.

૫. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા ચિતકપૂજકો થેરો ઇમા ગાથાયો અભાસિત્થાતિ.

ચિતકપૂજકત્થેરસ્સાપદાનં પઠમં.

૨. પુપ્ફધારકત્થેરઅપદાનં

૬. ‘‘વાકચીરધરો આસિં, અજિનુત્તરવાસનો;

અભિઞ્ઞા પઞ્ચ નિબ્બત્તા, ચન્દસ્સ પરિમજ્જકો.

૭. ‘‘વિપસ્સિં લોકપજ્જોતં, દિસ્વા અભિગતં મમં;

પારિચ્છત્તકપુપ્ફાનિ, ધારેસિં સત્થુનો અહં.

૮. ‘‘એકનવુતિતો કપ્પે, યં પુપ્ફમભિપૂજયિં;

દુગ્ગતિં નાભિજાનામિ, ધારણાય ઇદં ફલં.

૯. ‘‘સત્તાસીતિમ્હિતો કપ્પે, એકો આસિં મહીપતિ;

સમન્તધારણો નામ, ચક્કવત્તી મહબ્બલો.

૧૦. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પુપ્ફધારકો થેરો ઇમા ગાથાયો અભાસિત્થાતિ.

પુપ્ફધારકત્થેરસ્સાપદાનં દુતિયં.

૩. છત્તદાયકત્થેરઅપદાનં

૧૧. ‘‘પુત્તો મમ પબ્બજિતો, કાસાયવસનો તદા;

સો ચ બુદ્ધત્તં સમ્પત્તો, નિબ્બુતો લોકપૂજિતો.

૧૨. ‘‘વિચિનન્તો સકં પુત્તં, અગમં પચ્છતો અહં;

નિબ્બુતસ્સ મહન્તસ્સ, ચિતકં અગમાસહં.

૧૩. ‘‘પગ્ગય્હ અઞ્જલિં તત્થ, વન્દિત્વા ચિતકં અહં;

સેતચ્છત્તઞ્ચ પગ્ગય્હ, આરોપેસિં અહં તદા.

૧૪. ‘‘ચતુન્નવુતિતો કપ્પે, યં છત્તમભિરોપયિં;

દુગ્ગતિં નાભિજાનામિ, છત્તદાનસ્સિદં ફલં.

૧૫. ‘‘પઞ્ચવીસે ઇતો કપ્પે, સત્ત આસું જનાધિપા;

મહારહસનામા તે, ચક્કવત્તી મહબ્બલા.

૧૬. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા છત્તદાયકો થેરો ઇમા ગાથાયો અભાસિત્થાતિ.

છત્તદાયકત્થેરસ્સાપદાનં તતિયં.

૪. સદ્દસઞ્ઞકત્થેરઅપદાનં

૧૭. ‘‘અનુગ્ગતમ્હિ આદિચ્ચે, પનાદો [પસાદો (સ્યા. અટ્ઠ.)] વિપુલો અહુ;

બુદ્ધસેટ્ઠસ્સ લોકમ્હિ, પાતુભાવો મહેસિનો.

૧૮. ‘‘ઘોસ [સદ્દ (સી. સ્યા.)] મસ્સોસહં તત્થ, ન ચ પસ્સામિ તં જિનં;

મરણઞ્ચ અનુપ્પત્તો, બુદ્ધસઞ્ઞમનુસ્સરિં.

૧૯. ‘‘ચતુન્નવુતિતો કપ્પે, યં સઞ્ઞમલભિં તદા;

દુગ્ગતિં નાભિજાનામિ, બુદ્ધપૂજાયિદં ફલં.

૨૦. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સદ્દસઞ્ઞકો થેરો ઇમા ગાથાયો અભાસિત્થાતિ.

સદ્દસઞ્ઞકત્થેરસ્સાપદાનં ચતુત્થં.

૫. ગોસીસનિક્ખેપકત્થેરઅપદાનં

૨૧. ‘‘આરામદ્વારા નિક્ખમ્મ, ગોસીસં સન્થતં મયા;

અનુભોમિ સકં કમ્મં, પુબ્બકમ્મસ્સિદં ફલં.

૨૨. ‘‘આજાનિયા વાતજવા, સિન્ધવા સીઘવાહના;

અનુભોમિ સબ્બમેતં, ગોસીસસ્સ ઇદં ફલં.

૨૩. ‘‘અહો કારં પરમકારં, સુખત્તે સુકતં મયા;

સઙ્ઘે કતસ્સ કારસ્સ, ન અઞ્ઞં કલમગ્ઘતિ.

૨૪. ‘‘ચતુન્નવુતિતો કપ્પે, યં સીસં સન્થરિં અહં;

દુગ્ગતિં નાભિજાનામિ, સન્થરસ્સ ઇદં ફલં.

૨૫. ‘‘પઞ્ચસત્તતિકપ્પમ્હિ, સુપ્પતિટ્ઠિતનામકો;

એકો આસિં મહાતેજો, ચક્કવત્તી મહબ્બલો.

૨૬. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ગોસીસનિક્ખેપકો થેરો ઇમા ગાથાયો અભાસિત્થાતિ.

ગોસીસનિક્ખેપકત્થેરસ્સાપદાનં પઞ્ચમં.

૬. પાદપૂજકત્થેરઅપદાનં

૨૭. ‘‘પબ્બતે હિમવન્તમ્હિ, અહોસિં કિન્નરો તદા;

અદ્દસં વિરજં બુદ્ધં, પીતરંસિંવ ભાણુમં.

૨૮. ‘‘ઉપેતં તમહં [ઉપેતોપિ તદા (સ્યા.), ઉપેસિં તમહં (?)] બુદ્ધં, વિપસ્સિં લોકનાયકં;

ચન્દનં તગરઞ્ચાપિ, પાદે ઓસિઞ્ચહં તદા.

૨૯. ‘‘એકનવુતિતો કપ્પે, યં પાદં અભિપૂજયિં;

દુગ્ગતિં નાભિજાનામિ, પાદપૂજાયિદં ફલં.

૩૦. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પાદપૂજકો થેરો ઇમા ગાથાયો અભાસિત્થાતિ.

પાદપૂજકત્થેરસ્સાપદાનં છટ્ઠં.

૭. દેસકિત્તકત્થેરઅપદાનં

૩૧. ‘‘ઉપસાલકનામોહં, અહોસિં બ્રાહ્મણો તદા;

કાનનં વનમોગાળ્હં, લોકજેટ્ઠં નરાસભં.

૩૨. ‘‘દિસ્વાન વન્દિં પાદેસુ, લોકાહુતિપટિગ્ગહં;

પસન્નચિત્તં મં ઞત્વા, બુદ્ધો અન્તરધાયથ.

૩૩. ‘‘કાનના અભિનિક્ખમ્મ, બુદ્ધસેટ્ઠમનુસ્સરિં;

તં દેસં કિત્તયિત્વાન, કપ્પં સગ્ગમ્હિ મોદહં.

૩૪. ‘‘દ્વેનવુતે ઇતો કપ્પે, યં દેસમભિકિત્તયિં;

દુગ્ગતિં નાભિજાનામિ, કિત્તનાય ઇદં ફલં.

૩૫. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા દેસકિત્તકો થેરો ઇમા ગાથાયો અભાસિત્થાતિ.

દેસકિત્તકત્થેરસ્સાપદાનં સત્તમં.

૮. સરણગમનિયત્થેરઅપદાનં

૩૬. ‘‘પબ્બતે હિમવન્તમ્હિ, અહોસિં લુદ્દકો તદા;

વિપસ્સિં અદ્દસં બુદ્ધં, લોકજેટ્ઠં નરાસભં.

૩૭. ‘‘ઉપાસિત્વાન સમ્બુદ્ધં, વેય્યાવચ્ચમકાસહં;

સરણઞ્ચ ઉપાગચ્છિં, દ્વિપદિન્દસ્સ તાદિનો.

૩૮. ‘‘એકનવુતિતો કપ્પે, સરણં ઉપગચ્છહં;

દુગ્ગતિં નાભિજાનામિ, સરણાગમનપ્ફલં.

૩૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સરણગમનિયો થેરો ઇમા ગાથાયો અભાસિત્થાતિ.

સરણગમનિયત્થેરસ્સાપદાનં અટ્ઠમં.

૯. અમ્બપિણ્ડિયત્થેરઅપદાનં

૪૦. ‘‘રોમસો નામ નામેન, દાનવો ઇતિ વિસ્સુતો;

અમ્બપિણ્ડી મયા દિન્ના [અમ્બપિણ્ડો મયા દિન્નો (સ્યા.)], વિપસ્સિસ્સ મહેસિનો.

૪૧. ‘‘એકનવુતિતો કપ્પે, યમમ્બમદદિં તદા;

દુગ્ગતિં નાભિજાનામિ, અમ્બદાનસ્સિદં ફલં.

૪૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા અમ્બપિણ્ડિયો થેરો ઇમા ગાથાયો અભાસિત્થાતિ.

અમ્બપિણ્ડિયત્થેરસ્સાપદાનં નવમં.

૧૦. અનુસંસાવકત્થેરઅપદાનં

૪૩. ‘‘પિણ્ડાય ચરમાનાહં, વિપસ્સિમદ્દસં જિનં;

ઉળુઙ્ગભિક્ખં પાદાસિં, દ્વિપદિન્દસ્સ તાદિનો.

૪૪. ‘‘પસન્નચિત્તો સુમનો, અભિવાદેસહં તદા;

અનુસંસાવયિં બુદ્ધં, ઉત્તમત્થસ્સ પત્તિયા.

૪૫. ‘‘એકનવુતિતો કપ્પે, અનુસંસાવયિં અહં;

દુગ્ગતિં નાભિજાનામિ, અનુસંસાવના ફલં.

૪૬. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા અનુસંસાવકો થેરો ઇમા ગાથાયો અભાસિત્થાતિ.

અનુસંસાવકત્થેરસ્સાપદાનં દસમં.

ચિતકપૂજકવગ્ગો તિંસતિમો.

તસ્સુદ્દાનં –

ચિતકં પારિછત્તો ચ, સદ્દગોસીસસન્થરં;

પાદો પદેસં સરણં, અમ્બો સંસાવકોપિ ચ;

અટ્ઠતાલીસ ગાથાયો, ગણિતાયો વિભાવિભિ.

અથ વગ્ગુદ્દાનં –

કણિકારો હત્થિદદો, આલમ્બણુદકાસનં;

તુવરં થોમકો ચેવ, ઉક્ખેપં સીસુપધાનં.

પણ્ણદો ચિતપૂજી ચ, ગાથાયો ચેવ સબ્બસો;

ચત્તારિ ચ સતાનીહ, એકપઞ્ઞાસમેવ ચ.

પઞ્ચવીસસતા સબ્બા, દ્વાસત્તતિ તદુત્તરિ;

તિસતં અપદાનાનં, ગણિતા અત્થદસ્સિભિ.

કણિકારવગ્ગદસકં.