૮. ઉત્તિયત્થેરઅપદાનં

૧૬૯. ‘‘ચન્દભાગાનદીતીરે, સુસુમારો અહં તદા;

સગોચરપ્પસુતોહં [સભોજનપસુતાહં (સ્યા. ક.)], નદીતિત્થં અગચ્છહં.

૧૭૦. ‘‘સિદ્ધત્થો તમ્હિ સમયે, સયમ્ભૂ અગ્ગપુગ્ગલો;

નદિં તરિતુકામો સો, નદીતિત્થં ઉપાગમિ.

૧૭૧. ‘‘ઉપાગતે ચ [ઉપાગતમ્હિ (સ્યા. ક.)] સમ્બુદ્ધે, અહમ્પિ તત્થુપાગમિં;

ઉપગન્ત્વાન સમ્બુદ્ધં, ઇમં વાચં ઉદીરયિં.

૧૭૨. ‘‘‘અભિરૂહ મહાવીર, તારેસ્સામિ અહં તુવં;

પેત્તિકં વિસયં મય્હં, અનુકમ્પ મહામુનિ’.

૧૭૩. ‘‘મમ ઉગ્ગજ્જનં સુત્વા, અભિરૂહિ મહામુનિ;

હટ્ઠો હટ્ઠેન ચિત્તેન, તારેસિં લોકનાયકં.

૧૭૪. ‘‘નદિયા પારિમે તીરે, સિદ્ધત્થો લોકનાયકો;

અસ્સાસેસિ મમં તત્થ, અમતં પાપુણિસ્સસિ.

૧૭૫. ‘‘તમ્હા કાયા ચવિત્વાન, દેવલોકં આગચ્છહં;

દિબ્બસુખં અનુભવિં, અચ્છરાહિ પુરક્ખતો.

૧૭૬. ‘‘સત્તક્ખત્તુઞ્ચ દેવિન્દો, દેવરજ્જમકાસહં;

તીણિક્ખત્તું ચક્કવત્તી, મહિયા ઇસ્સરો અહું.

૧૭૭. ‘‘વિવેકમનુયુત્તોહં, નિપકો ચ સુસંવુતો;

ધારેમિ અન્તિમં દેહં, સમ્માસમ્બુદ્ધસાસને.

૧૭૮. ‘‘ચતુન્નવુતિતો કપ્પે, તારેસિં યં નરાસભં;

દુગ્ગતિં નાભિજાનામિ, તરણાય ઇદં ફલં.

૧૭૯. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા ઉત્તિયો [ઉત્તિરિયો (સી.)] થેરો ઇમા ગાથાયો અભાસિત્થાતિ.

ઉત્તિયત્થેરસ્સાપદાનં અટ્ઠમં.