૨. ઉપવાનત્થેરઅપદાનં

૫૨. ‘‘પદુમુત્તરો નામ જિનો, સબ્બધમ્માન પારગૂ;

જલિત્વા અગ્ગિક્ખન્ધોવ, સમ્બુદ્ધો પરિનિબ્બુતો.

૫૩. ‘‘મહાજના સમાગમ્મ, પૂજયિત્વા તથાગતં;

ચિતં કત્વાન સુકતં, સરીરં અભિરોપયું.

૫૪. ‘‘સરીરકિચ્ચં કત્વાન, ધાતું તત્થ સમાનયું;

સદેવમાનુસા સબ્બે, બુદ્ધથૂપં અકંસુ તે.

૫૫. ‘‘પઠમા કઞ્ચનમયા, દુતિયાસિ મણીમયા;

તતિયા રૂપિયમયા, ચતુત્થી ફલિકામયા.

૫૬. ‘‘તથા [તત્થ (સ્યા. ક.)] પઞ્ચમિયા ભૂમિ [નેમિ (સી.)], લોહિતઙ્ગમયા અહુ;

છટ્ઠા મસારગલ્લસ્સ, સબ્બરતનમયૂપરિ.

૫૭. ‘‘જઙ્ઘા મણિમયા આસિ, વેદિકા રતનમયા;

સબ્બસોણ્ણમયો થૂપો, ઉદ્ધં યોજનમુગ્ગતો.

૫૮. ‘‘દેવા તત્થ સમાગન્ત્વા, એકતો મન્તયું તદા;

મયમ્પિ થૂપં કસ્સામ, લોકનાથસ્સ તાદિનો.

૫૯. ‘‘ધાતુ આવેણિકા નત્થિ, સરીરં એકપિણ્ડિતં;

ઇમમ્હિ બુદ્ધથૂપમ્હિ, કસ્સામ કઞ્ચુકં મયં.

૬૦. ‘‘દેવા સત્તહિ રત્નેહિ [સત્તરતનેહિ (સી.)], અઞ્ઞં વડ્ઢેસુ યોજનં;

થૂપો દ્વિયોજનુબ્બેધો, તિમિરં બ્યપહન્તિ સો.

૬૧. ‘‘નાગા તત્થ સમાગન્ત્વા, એકતો મન્તયું તદા;

મનુસ્સા ચેવ દેવા ચ, બુદ્ધથૂપં અકંસુ તે.

૬૨. ‘‘મા નો પમત્તા અસ્સુમ્હ [અસ્સુમ્હા (સી. સ્યા.), આસિમ્હા (?)], અપ્પમત્તા સદેવકા;

મયમ્પિ થૂપં કસ્સામ, લોકનાથસ્સ તાદિનો.

૬૩. ‘‘ઇન્દનીલં મહાનીલં, અથો જોતિરસં મણિં;

એકતો સન્નિપાતેત્વા, બુદ્ધથૂપં અછાદયું.

૬૪. ‘‘સબ્બં મણિમયં આસિ, તાવતા બુદ્ધચેતિયં;

તિયોજનસમુબ્બિદ્ધં [તીણિ યોજનમુબ્બિદ્ધં (સી. ક.)], આલોકકરણં તદા.

૬૫. ‘‘ગરુળા ચ સમાગન્ત્વા, એકતો મન્તયું તદા;

મનુસ્સા દેવા નાગા ચ, બુદ્ધથૂપં અકંસુ તે.

૬૬. ‘‘‘મા નો પમત્તા અસ્સુમ્હ, અપ્પમત્તા સદેવકા;

મયમ્પિ થૂપં કસ્સામ, લોકનાથસ્સ તાદિનો’.

૬૭. ‘‘સબ્બં મણિમયં થૂપં, અકરું તે ચ કઞ્ચુકં [સબ્બમણિમયં થૂપે, અકરુત્તરકઞ્ચુકં (સી.)];

યોજનં તેપિ વડ્ઢેસું, આયતં બુદ્ધચેતિયં.

૬૮. ‘‘ચતુયોજનમુબ્બિદ્ધો, બુદ્ધથૂપો વિરોચતિ;

ઓભાસેતિ દિસા સબ્બા, સતરંસીવ ઉગ્ગતો.

૬૯. ‘‘કુમ્ભણ્ડા ચ સમાગન્ત્વા, એકતો મન્તયું તદા;

મનુસ્સા ચેવ દેવા ચ, નાગા ચ ગરુળા તથા.

પચ્ચેકં બુદ્ધસેટ્ઠસ્સ, અકંસુ થૂપમુત્તમં.

૭૦. ‘‘‘મા નો પમત્તા અસ્સુમ્હ, અપ્પમત્તા સદેવકા;

મયમ્પિ થૂપં કસ્સામ, લોકનાથસ્સ તાદિનો;

રતનેહિ છાદેસ્સામ, આયતં બુદ્ધચેતિયં’.

૭૧. ‘‘યોજનં તેપિ વડ્ઢેસું, આયતં બુદ્ધચેતિયં;

પઞ્ચયોજનમુબ્બિદ્ધો, થૂપો ઓભાસતે તદા.

૭૨. ‘‘યક્ખા તત્થ સમાગન્ત્વા, એકતો મન્તયું તદા;

મનુસ્સા દેવા નાગા ચ, ગરુળા કુમ્ભઅણ્ડકા.

૭૩. ‘‘પચ્ચેકં બુદ્ધસેટ્ઠસ્સ, અકંસુ થૂપમુત્તમં;

‘મા નો પમત્તા અસ્સુમ્હ, અપ્પમત્તા સદેવકા.

૭૪. ‘‘‘મયમ્પિ થૂપં કસ્સામ, લોકનાથસ્સ તાદિનો;

ફલિકાહિ છાદેસ્સામ, આયતં બુદ્ધચેતિયં’.

૭૫. ‘‘યોજનં તેપિ વડ્ઢેસું, આયતં બુદ્ધચેતિયં;

છ યોજનાનિ ઉબ્બિદ્ધો, થૂપો ઓભાસતે તદા.

૭૬. ‘‘ગન્ધબ્બા ચ સમાગન્ત્વા, એકતો મન્તયું તદા;

‘મનુજા દેવતા નાગા, ગરુળા કુમ્ભયક્ખકા.

૭૭. ‘‘‘સબ્બેકંસુ બુદ્ધથૂપં, મયમેત્થ અકારકા;

મયમ્પિ થૂપં કસ્સામ, લોકનાથસ્સ તાદિનો’.

૭૮. ‘‘વેદિયો સત્ત કત્વાન, છત્તમારોપયિંસુ તે;

સબ્બસોણ્ણમયં થૂપં, ગન્ધબ્બા કારયું તદા.

૭૯. ‘‘સત્તયોજનમુબ્બિદ્ધો, થૂપો ઓભાસતે તદા;

રત્તિન્દિવા ન ઞાયન્તિ, આલોકો હોતિ [આલોકા હોન્તિ (સ્યા. ક.)] સબ્બદા.

૮૦. ‘‘અભિભોન્તિ ન તસ્સાભા, ચન્દસૂરા સતારકા;

સમન્તા યોજનસતે, પદીપોપિ ન પજ્જલિ.

૮૧. ‘‘તેન કાલેન યે કેચિ, થૂપં પૂજેન્તિ માનુસા;

ન તે થૂપમારુહન્તિ, અમ્બરે ઉક્ખિપન્તિ તે.

૮૨. ‘‘દેવેહિ ઠપિતો યક્ખો, અભિસમ્મતનામકો;

ધજં વા પુપ્ફદામં વા, અભિરોપેતિ ઉત્તરિ.

૮૩. ‘‘ન તે પસ્સન્તિ તં યક્ખં, દામં પસ્સન્તિ ગચ્છતો;

એવં પસ્સિત્વા ગચ્છન્તા, સબ્બે ગચ્છન્તિ સુગ્ગતિં.

૮૪. ‘‘વિરુદ્ધા [વિસદ્ધા (સી.)] યે પાવચને, પસન્ના યે ચ સાસને;

પાટિહેરં દટ્ઠુકામા, થૂપં પૂજેન્તિ માનુસા.

૮૫. ‘‘નગરે હંસવતિયા, અહોસિં ભતકો [વરકો (સ્યા. ક.)] તદા;

આમોદિતં જનં દિસ્વા, એવં ચિન્તેસહં તદા.

૮૬. ‘‘‘ઉળારો ભગવા હેસો, યસ્સ ધાતુધરેદિસં;

ઇમા ચ જનતા તુટ્ઠા, કારં કુબ્બં ન તપ્પરે [કુબ્બન્તનપ્પકં (સી.)].

૮૭. ‘‘‘અહમ્પિ કારં કસ્સામિ, લોકનાથસ્સ તાદિનો;

તસ્સ ધમ્મેસુ દાયાદો, ભવિસ્સામિ અનાગતે’.

૮૮. ‘‘સુધોતં રજકેનાહં, ઉત્તરેય્યપટં મમ;

વેળગ્ગે આલગેત્વાન, ધજં ઉક્ખિપિમમ્બરે.

૮૯. ‘‘અભિસમ્મતકો ગય્હ, અમ્બરેહાસિ મે ધજં;

વાતેરિતં ધજં દિસ્વા, ભિય્યો હાસં જનેસહં.

૯૦. ‘‘તત્થ ચિત્તં પસાદેત્વા, સમણં ઉપસઙ્કમિં;

તં ભિક્ખું અભિવાદેત્વા, વિપાકં પુચ્છહં ધજે.

૯૧. ‘‘સો મે કથેસિ આનન્દ, પીતિસઞ્જનનં મમ;

‘તસ્સ ધજસ્સ વિપાકં, અનુભોસ્સસિ સબ્બદા.

૯૨. ‘‘‘હત્થી અસ્સા રથા પત્તી, સેના ચ ચતુરઙ્ગિની;

પરિવારેસ્સન્તિ તં નિચ્ચં, ધજદાનસ્સિદં ફલં.

૯૩. ‘‘‘સટ્ઠિતૂરિયસહસ્સાનિ, ભેરિયો સમલઙ્કતા;

પરિવારેસ્સન્તિ તં નિચ્ચં, ધજદાનસ્સિદં ફલં.

૯૪. ‘‘‘છળાસીતિસહસ્સાનિ, નારિયો સમલઙ્કતા;

વિચિત્તવત્થાભરણા, આમુત્તમણિકુણ્ડલા.

૯૫. ‘‘‘અળારપમ્હા હસુલા, સુસઞ્ઞા તનુમજ્ઝિમા;

પરિવારેસ્સન્તિ તં નિચ્ચં, ધજદાનસ્સિદં ફલં.

૯૬. ‘‘‘તિંસકપ્પસહસ્સાનિ, દેવલોકે રમિસ્સસિ;

અસીતિક્ખત્તું દેવિન્દો, દેવરજ્જં કરિસ્સસિ.

૯૭. ‘‘‘સહસ્સક્ખત્તું રાજા ચ, ચક્કવત્તી ભવિસ્સસિ;

પદેસરજ્જં વિપુલં, ગણનાતો અસઙ્ખિયં.

૯૮. ‘‘‘કપ્પસતસહસ્સમ્હિ, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૯૯. ‘‘‘દેવલોકા ચવિત્વાન, સુક્કમૂલેન ચોદિતો;

પુઞ્ઞકમ્મેન સંયુત્તો, બ્રહ્મબન્ધુ ભવિસ્સસિ.

૧૦૦. ‘‘‘અસીતિકોટિં છડ્ડેત્વા, દાસે કમ્મકરે બહૂ;

ગોતમસ્સ ભગવતો, સાસને પબ્બજિસ્સસિ.

૧૦૧. ‘‘‘આરાધયિત્વા સમ્બુદ્ધં, ગોતમં સક્યપુઙ્ગવં;

ઉપવાનોતિ નામેન, હેસ્સસિ સત્થુ સાવકો’.

૧૦૨. ‘‘સતસહસ્સે કતં કમ્મં, ફલં દસ્સેસિ મે ઇધ;

સુમુત્તો સરવેગોવ કિલેસે ઝાપયી મમ.

૧૦૩. ‘‘ચક્કવત્તિસ્સ સન્તસ્સ, ચતુદીપિસ્સરસ્સ મે;

તિયોજનાનિ સમન્તા, ઉસ્સીસન્તિ ધજા સદા.

૧૦૪. ‘‘સતસહસ્સિતો કપ્પે, યં કમ્મમકરિં તદા;

દુગ્ગતિં નાભિજાનામિ, ધજદાનસ્સિદં ફલં.

૧૦૫. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા ઉપવાનો થેરો ઇમા ગાથાયો અભાસિત્થાતિ.

ઉપવાનત્થેરસ્સાપદાનં દુતિયં.