૨૯. પણ્ણદાયકવગ્ગો

૧. પણ્ણદાયકત્થેરઅપદાનં

૧. ‘‘પણ્ણસાલે નિસિન્નોમ્હિ, પણ્ણભોજનભોજનો;

ઉપવિટ્ઠઞ્ચ મં સન્તં, ઉપાગચ્છિ મહાઇસિ [મહામુનિ (સી.)].

૨. ‘‘સિદ્ધત્થો લોકપજ્જોતો, સબ્બલોકતિકિચ્છકો;

તસ્સ પણ્ણં મયા દિન્નં, નિસિન્નં [નિસિન્નસ્સ (સ્યા. અટ્ઠ.)] પણ્ણસન્થરે.

૩. ‘‘ચતુન્નવુતિતો કપ્પે, યં પણ્ણમદદિં તદા;

દુગ્ગતિં નાભિજાનામિ, પણ્ણદાનસ્સિદં ફલં.

૪. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા પણ્ણદાયકો થેરો ઇમા ગાથાયો અભાસિત્થાતિ.

પણ્ણદાયકત્થેરસ્સાપદાનં પઠમં.

૨. ફલદાયકત્થેરઅપદાનં

૫. ‘‘સિનેરુસમસન્તોસો, ધરણીસમ [ધરણીધર (સી. સ્યા.)] સાદિસો;

વુટ્ઠહિત્વા સમાધિમ્હા, ભિક્ખાય મમુપટ્ઠિતો.

૬. ‘‘હરીતકં [હરીતકિં (સ્યા.)] આમલકં, અમ્બજમ્બુવિભીતકં;

કોલં ભલ્લાતકં બિલ્લં, ફારુસકફલાનિ ચ.

૭. ‘‘સિદ્ધત્થસ્સ મહેસિસ્સ, સબ્બલોકાનુકમ્પિનો;

તઞ્ચ સબ્બં મયા દિન્નં, વિપ્પસન્નેન ચેતસા.

૮. ‘‘ચતુન્નવુતિતો કપ્પે, યં ફલં અદદિં તદા;

દુગ્ગતિં નાભિજાનામિ, ફલદાનસ્સિદં ફલં.

૯. ‘‘સત્તપઞ્ઞાસિતો કપ્પે, એકજ્ઝો નામ ખત્તિયો;

સત્તરતનસમ્પન્નો, ચક્કવત્તી મહબ્બલો.

૧૦. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ફલદાયકો થેરો ઇમા ગાથાયો અભાસિત્થાતિ.

ફલદાયકત્થેરસ્સાપદાનં દુતિયં.

૩. પચ્ચુગ્ગમનિયત્થેરઅપદાનં

૧૧. ‘‘સીહં યથા વનચરં, નિસભાજાનિયં યથા;

કકુધં વિલસન્તંવ, આગચ્છન્તં નરાસભં.

૧૨. ‘‘સિદ્ધત્થં લોકપજ્જોતં, સબ્બલોકતિકિચ્છકં;

અકાસિં પચ્ચુગ્ગમનં, વિપ્પસન્નેન ચેતસા.

૧૩. ‘‘ચતુન્નવુતિતો કપ્પે, પચ્ચુગ્ગચ્છિં નરાસભં;

દુગ્ગતિં નાભિજાનામિ, પચ્ચુગ્ગમને ઇદં ફલં.

૧૪. ‘‘સત્તતિંસે [સત્તવીસે (સી. સ્યા.)] ઇતો કપ્પે, એકો આસિં જનાધિપો;

સપરિવારોતિ નામેન, ચક્કવત્તી મહબ્બલો.

૧૫. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પચ્ચુગ્ગમનિયો થેરો ઇમા ગાથાયો અભાસિત્થાતિ.

પચ્ચુગ્ગમનિયત્થેરસ્સાપદાનં તતિયં.

૪. એકપુપ્ફિયત્થેરઅપદાનં

૧૬. ‘‘દક્ખિણમ્હિ દુવારમ્હિ, પિસાચો આસહં તદા;

અદ્દસં વિરજં બુદ્ધં, પીતરંસિંવ ભાણુમં.

૧૭. ‘‘વિપસ્સિસ્સ નરગ્ગસ્સ, સબ્બલોકહિતેસિનો;

એકપુપ્ફં મયા દિન્નં, દ્વિપદિન્દસ્સ તાદિનો.

૧૮. ‘‘એકનવુતિતો કપ્પે, યં પુપ્ફમદદિં તદા;

દુગ્ગતિં નાભિજાનામિ, બુદ્ધપૂજાયિદં ફલં.

૧૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા એકપુપ્ફિયો થેરો ઇમા ગાથાયો અભાસિત્થાતિ.

એકપુપ્ફિયત્થેરસ્સાપદાનં ચતુત્થં.

૫. મઘવપુપ્ફિયત્થેરઅપદાનં

૨૦. ‘‘નમ્મદાનદિયા તીરે, સયમ્ભૂ અપરાજિતો;

સમાધિં સો સમાપન્નો, વિપ્પસન્નો અનાવિલો.

૨૧. ‘‘દિસ્વા પસન્નસુમનો, સમ્બુદ્ધં અપરાજિતં;

તાહં મઘવપુપ્ફેન, સયમ્ભું પૂજયિં તદા.

૨૨. ‘‘એકનવુતિતો કપ્પે, યં પુપ્ફમભિપૂજયિં;

દુગ્ગતિં નાભિજાનામિ, બુદ્ધપૂજાયિદં ફલં.

૨૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા મઘવપુપ્ફિયો થેરો ઇમા ગાથાયો અભાસિત્થાતિ.

મઘવપુપ્ફિયત્થેરસ્સાપદાનં પઞ્ચમં.

૬. ઉપટ્ઠાકદાયકત્થેરઅપદાનં

૨૪. ‘‘રથિયં પટિપજ્જન્તં, આહુતીનં પટિગ્ગહં;

દ્વિપદિન્દં મહાનાગં, લોકજેટ્ઠં નરાસભં.

૨૫. ‘‘પક્કોસાપિય તસ્સાહં, સબ્બલોકહિતેસિનો;

ઉપટ્ઠાકો મયા દિન્નો, સિદ્ધત્થસ્સ મહેસિનો.

૨૬. ‘‘પટિગ્ગહેત્વા [પટિગ્ગહેસિ (ક.)] સમ્બુદ્ધો, નિય્યાદેસિ મહામુનિ [મહાઇસિ (ક.)];

ઉટ્ઠાય આસના તમ્હા, પક્કામિ પાચિનામુખો.

૨૭. ‘‘ચતુન્નવુતિતો કપ્પે, ઉપટ્ઠાકમદં તદા;

દુગ્ગતિં નાભિજાનામિ, ઉપટ્ઠાનસ્સિદં ફલં.

૨૮. ‘‘સત્તપઞ્ઞાસિતો કપ્પે, બલસેનસનામકો;

સત્તરતનસમ્પન્નો, ચક્કવત્તી મહબ્બલો.

૨૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ઉપટ્ઠાકદાયકો થેરો ઇમા ગાથાયો અભાસિત્થાતિ.

ઉપટ્ઠાકદાયકત્થેરસ્સાપદાનં છટ્ઠં.

૭. અપદાનિયત્થેરઅપદાનં

૩૦. ‘‘અપદાનં સુગતાનં, કિત્તયિંહં મહેસિનં;

પાદે ચ સિરસા વન્દિં, પસન્નો સેહિ પાણિભિ.

૩૧. ‘‘દ્વેનવુતે ઇતો કપ્પે, અપદાનં પકિત્તયિં;

દુગ્ગતિં નાભિજાનામિ, કિત્તનાય ઇદં ફલં.

૩૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા અપદાનિયો થેરો ઇમા ગાથાયો અભાસિત્થાતિ.

અપદાનિયત્થેરસ્સાપદાનં સત્તમં.

૮. સત્તાહપબ્બજિતત્થેરઅપદાનં

૩૩. ‘‘વિપસ્સિસ્સ ભગવતો, સઙ્ઘો સક્કતમાનિતો;

બ્યસનં મે અનુપ્પત્તં, ઞાતિભેદો પુરે અહુ.

૩૪. ‘‘પબ્બજ્જં ઉપગન્ત્વાન, બ્યસનુપસમાયહં;

સત્તાહાભિરતો તત્થ, સત્થુસાસનકમ્યતા.

૩૫. ‘‘એકનવુતિતો કપ્પે, યમહં પબ્બજિં તદા;

દુગ્ગતિં નાભિજાનામિ, પબ્બજ્જાય ઇદં ફલં.

૩૬. ‘‘સત્તસટ્ઠિમ્હિતો કપ્પે, સત્ત આસું મહીપતી;

સુનિક્ખમાતિ ઞાયન્તિ, ચક્કવત્તી મહબ્બલા.

૩૭. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સત્તાહપબ્બજિતો થેરો ઇમા ગાથાયો અભાસિત્થાતિ.

સત્તાહપબ્બજિતત્થેરસ્સાપદાનં અટ્ઠમં.

૯. બુદ્ધુપટ્ઠાયિકત્થેરઅપદાનં

૩૮. ‘‘વેટમ્ભિનીતિ [વેટમ્બરીતિ (સી.), વેધમ્ભિનીતિ (સ્યા.)] મે નામં, પિતુસન્તં [પિતા’સન્તં (?)] મમં તદા;

મમ હત્થં ગહેત્વાન, ઉપાનયિ મહામુનિં.

૩૯. ‘‘ઇમેમં ઉદ્દિસિસ્સન્તિ, બુદ્ધા લોકગ્ગનાયકા;

તેહં ઉપટ્ઠિં સક્કચ્ચં, પસન્નો સેહિ પાણિભિ.

૪૦. ‘‘એકત્તિંસે ઇતો કપ્પે, બુદ્ધે ઉપટ્ઠહિં [પરિચરિં (સી. સ્યા.)] તદા;

દુગ્ગતિં નાભિજાનામિ, ઉપટ્ઠાનસ્સિદં ફલં.

૪૧. ‘‘તેવીસમ્હિ ઇતો કપ્પે, ચતુરો આસુ ખત્તિયા;

સમણુપટ્ઠાકા નામ, ચક્કવત્તી મહબ્બલા.

૪૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા બુદ્ધુપટ્ઠાયિકો થેરો ઇમા ગાથાયો અભાસિત્થાતિ.

બુદ્ધુપટ્ઠાયિકત્થેરસ્સાપદાનં નવમં.

૧૦. પુબ્બઙ્ગમિયત્થેરઅપદાનં

૪૩. ‘‘ચુલ્લાસીતિસહસ્સાનિ, પબ્બજિમ્હ અકિઞ્ચના;

તેસં પુબ્બઙ્ગમો આસિં, ઉત્તમત્થસ્સ પત્તિયા.

૪૪. ‘‘સરાગા સભવા [સમોહા (સ્યા.)] ચેતે, વિપ્પસન્નમનાવિલા;

ઉપટ્ઠહિંસુ સક્કચ્ચં, પસન્ના સેહિ પાણિભિ.

૪૫. ‘‘ખીણાસવા વન્તદોસા, કતકિચ્ચા અનાસવા;

ફરિંસુ મેત્તચિત્તેન, સયમ્ભૂ અપરાજિતા.

૪૬. ‘‘તેસં ઉપટ્ઠહિત્વાન, સમ્બુદ્ધાનં પતિસ્સતો;

મરણઞ્ચ અનુપ્પત્તો, દેવત્તઞ્ચ અગમ્હસે.

૪૭. ‘‘ચતુન્નવુતિતો કપ્પે, યં સીલમનુપાલયિં;

દુગ્ગતિં નાભિજાનામિ, સઞ્ઞમસ્સ ઇદં ફલં.

૪૮. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પુબ્બઙ્ગમિયો થેરો ઇમા ગાથાયો અભાસિત્થાતિ.

પુબ્બઙ્ગમિયત્થેરસ્સાપદાનં દસમં.

પણ્ણદાયકવગ્ગો એકૂનતિંસતિમો.