૧. થોમકત્થેરઅપદાનં

૧. ‘‘દેવલોકે ઠિતો સન્તો, વિપસ્સિસ્સ મહેસિનો;

ધમ્મં સુણિત્વા મુદિતો, ઇમં વાચં અભાસહં.

૨. ‘‘‘નમો તે પુરિસાજઞ્ઞ, નમો તે પુરિસુત્તમ;

બહુજ્જનં [બહું જનં (સી.)] તારયસિ, દેસેન્તો અમતં પદં’.

૩. ‘‘એકનવુતિતો કપ્પે, યં વાચમભણિં તદા;

દુગ્ગતિં નાભિજાનામિ, થોમનાય ઇદં ફલં.

૪. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા થોમકો થેરો ઇમા ગાથાયો અભાસિત્થાતિ.

થોમકત્થેરસ્સાપદાનં પઠમં.