૭. તાલવણ્ટદાયકત્થેરઅપદાનં

૩૧. ‘‘તાલવણ્ટં મયા દિન્નં, તિસ્સસ્સાદિચ્ચબન્ધુનો;

ગિમ્હનિબ્બાપનત્થાય, પરિળાહોપસન્તિયા.

૩૨. ‘‘સન્નિબ્બાપેમિ રાગગ્ગિં, દોસગ્ગિઞ્ચ તદુત્તરિં;

નિબ્બાપેમિ ચ મોહગ્ગિં, તાલવણ્ટસ્સિદં ફલં.

૩૩. ‘‘કિલેસા ઝાપિતા મય્હં, ભવા સબ્બે સમૂહતા;

ધારેમિ અન્તિમં દેહં, સમ્માસમ્બુદ્ધસાસને.

૩૪. ‘‘દ્વેનવુતે ઇતો કપ્પે, યં કમ્મમકરિં તદા;

દુગ્ગતિં નાભિજાનામિ, તાલવણ્ટસ્સિદં ફલં.

૩૫. ‘‘તેસટ્ઠિમ્હિ ઇતો કપ્પે, મહાનામસનામકો;

સત્તરતનસમ્પન્નો, ચક્કવત્તી મહબ્બલો.

૩૬. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા તાલવણ્ટદાયકો થેરો ઇમા ગાથાયો અભાસિત્થાતિ.

તાલવણ્ટદાયકત્થેરસ્સાપદાનં સત્તમં.