૮. અક્કન્તસઞ્ઞકત્થેરઅપદાનં

૩૭. ‘‘કુસાટકં ગહેત્વાન, ઉપજ્ઝાયસ્સહં પુરે;

મન્તઞ્ચ અનુસિક્ખામિ, ગન્થાદોસસ્સ [કણ્ડભેદસ્સ (સી.), ગણ્ડભેદસ્સ (સ્યા.)] પત્તિયા.

૩૮. ‘‘અદ્દસં વિરજં બુદ્ધં, આહુતીનં પટિગ્ગહં;

ઉસભં પવરં અગ્ગં, તિસ્સં બુદ્ધં ગણુત્તમં [ગજુત્તમં (સ્યા.)].

૩૯. ‘‘કુસાટકં પત્થરિતં, અક્કમન્તં નરુત્તમં;

સમુગ્ગતં મહાવીરં, લોકજેટ્ઠં નરાસભં.

૪૦. ‘‘દિસ્વા તં લોકપજ્જોતં, વિમલં ચન્દસન્નિભં;

અવન્દિં સત્થુનો પાદે, વિપ્પસન્નેન ચેતસા.

૪૧. ‘‘ચતુન્નવુતિતો કપ્પે, યં અદાસિં કુસાટકં;

દુગ્ગતિં નાભિજાનામિ, કુસાટકસ્સિદં ફલં.

૪૨. ‘‘સત્તતિંસે ઇતો કપ્પે, એકો આસિં જનાધિપો;

સુનન્દો નામ નામેન, ચક્કવત્તી મહબ્બલો.

૪૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા અક્કન્તસઞ્ઞકો થેરો ઇમા ગાથાયો અભાસિત્થાતિ;

અક્કન્તસઞ્ઞકત્થેરસ્સાપદાનં અટ્ઠમં.