૨. પાનધિદાયકત્થેરઅપદાનં

૬. ‘‘આરઞ્ઞિકસ્સ ઇસિનો, ચિરરત્તતપસ્સિનો [ઝાયિનો, મેત્તચિત્તતપસ્સિનો (સ્યા.)];

બુદ્ધસ્સ [ધમ્મસ્સ (સ્યા. ક.)] ભાવિતત્તસ્સ, અદાસિં પાનધિં અહં.

૭. ‘‘તેન કમ્મેન દ્વિપદિન્દ, લોકજેટ્ઠ નરાસભ;

દિબ્બયાનં [સબ્બં યાનં (સી.)] અનુભોમિ, પુબ્બકમ્મસ્સિદં ફલં.

૮. ‘‘ચતુન્નવુતે ઇતો કપ્પે, યં કમ્મમકરિં તદા;

દુગ્ગતિં નાભિજાનામિ, પાનધિસ્સ ઇદં ફલં.

૯. ‘‘સત્તસત્તતિતો કપ્પે, અટ્ઠ આસિંસુ ખત્તિયા;

સુયાના નામ નામેન, ચક્કવત્તી મહબ્બલા.

૧૦. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પાનધિદાયકો થેરો ઇમા ગાથાયો અભાસિત્થાતિ.

પાનધિદાયકત્થેરસ્સાપદાનં દુતિયં.