૭. તિન્દુકદાયકત્થેરઅપદાનં

૩૫. ‘‘ગિરિદુગ્ગચરો આસિં, મક્કટો થામવેગિકો;

ફલિનં તિન્દુકં દિસ્વા, બુદ્ધસેટ્ઠં અનુસ્સરિં.

૩૬. ‘‘નિક્ખમિત્વા કતિપાહં, વિચિનિં લોકનાયકં;

પસન્નચિત્તો સુમનો, સિદ્ધત્થં તિભવન્તગું.

૩૭. ‘‘મમ સઙ્કપ્પમઞ્ઞાય, સત્થા લોકે અનુત્તરો;

ખીણાસવસહસ્સેહિ, આગચ્છિ મમ સન્તિકં.

૩૮. ‘‘પામોજ્જં જનયિત્વાન, ફલહત્થો ઉપાગમિં;

પટિગ્ગહેસિ ભગવા, સબ્બઞ્ઞૂ વદતં વરો.

૩૯. ‘‘ચતુન્નવુતિતો કપ્પે, યં ફલં અદદિં તદા;

દુગ્ગતિં નાભિજાનામિ, ફલદાનસ્સિદં ફલં.

૪૦. ‘‘સત્તપઞ્ઞાસકપ્પમ્હિ, ઉપનન્દસનામકો;

સત્તરતનસમ્પન્નો, ચક્કવત્તી મહબ્બલો.

૪૧. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા તિન્દુકદાયકો થેરો ઇમા ગાથાયો અભાસિત્થાતિ.

તિન્દુકદાયકત્થેરસ્સાપદાનં સત્તમં.