૨૦. તમાલપુપ્ફિયવગ્ગો

૧. તમાલપુપ્ફિયત્થેરઅપદાનં

૧. ‘‘ચુલ્લાસીતિસહસ્સાનિ, થમ્ભા સોવણ્ણયા અહૂ;

દેવલટ્ઠિપટિભાગં, વિમાનં મે સુનિમ્મિતં.

૨. ‘‘તમાલપુપ્ફં પગ્ગય્હ, વિપ્પસન્નેન ચેતસા;

બુદ્ધસ્સ અભિરોપયિં, સિખિનો લોકબન્ધુનો.

૩. ‘‘એકત્તિંસે ઇતો કપ્પે, યં કમ્મમકરિં તદા;

દુગ્ગતિં નાભિજાનામિ, બુદ્ધપૂજાયિદં ફલં.

૪. ‘‘ઇતો વીસતિમે કપ્પે, ચન્દતિત્તોતિ એકકો;

સત્તરતનસમ્પન્નો, ચક્કવત્તી મહબ્બલો.

૫. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા તમાલપુપ્ફિયો થેરો ઇમા ગાથાયો અભાસિત્થાતિ.

તમાલપુપ્ફિયત્થેરસ્સાપદાનં પઠમં.

૨. તિણસન્થારકત્થેરઅપદાનં

૬. ‘‘યદા વનવાસી [યં દાયવાસિકો (સી.)] ઇસિ, તિણં લાયતિ સત્થુનો;

સબ્બે પદક્ખિણાવટ્ટા [પદક્ખિણાવત્તા (સી. સ્યા.)], પથબ્યા [પુથવ્યા (સી.)] નિપતિંસુ તે.

૭. ‘‘તમહં તિણમાદાય, સન્થરિં ધરણુત્તમે;

તીણેવ તાલપત્તાનિ, આહરિત્વાનહં તદા.

૮. ‘‘તિણેન છદનં કત્વા, સિદ્ધત્થસ્સ અદાસહં;

સત્તાહં ધારયું તસ્સ [તત્થ (સ્યા.)], દેવમાનુસસત્થુનો.

૯. ‘‘ચતુન્નવુતિતો કપ્પે, યં તિણં અદદિં તદા;

દુગ્ગતિં નાભિજાનામિ, તિણદાનસ્સિદં ફલં.

૧૦. ‘‘પઞ્ચસટ્ઠિમ્હિતો કપ્પે, ચત્તારોસું મહદ્ધના;

સત્તરતનસમ્પન્ના, ચક્કવત્તી મહબ્બલા.

૧૧. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા તિણસન્થારકો થેરો ઇમા ગાથાયો અભાસિત્થાતિ.

તિણસન્થારકત્થેરસ્સાપદાનં દુતિયં.

૩. ખણ્ડપુલ્લિયત્થેરઅપદાનં

૧૨. ‘‘ફુસ્સસ્સ ખો ભગવતો, થૂપો આસિ મહાવને;

કુઞ્જરેહિ તદા ભિન્નો, પરૂળ્હો પાદપો [પરૂળ્હપાદપો (સી.), સંરૂળ્હો પાદપો (સ્યા.)] તહિં.

૧૩. ‘‘વિસમઞ્ચ સમં કત્વા, સુધાપિણ્ડં અદાસહં;

તિલોકગરુનો તસ્સ, ગુણેહિ પરિતોસિતો [પરિતો સુતો (ક.)].

૧૪. ‘‘દ્વેનવુતે ઇતો કપ્પે, યં કમ્મમકરિં તદા;

દુગ્ગતિં નાભિજાનામિ, સુધાપિણ્ડસ્સિદં ફલં.

૧૫. ‘‘સત્તસત્તતિકપ્પમ્હિ, જિતસેનાસું સોળસ;

સત્તરતનસમ્પન્ના, ચક્કવત્તી મહબ્બલા.

૧૬. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ખણ્ડફુલ્લિયો થેરો ઇમા ગાથાયો અભાસિત્થાતિ.

ખણ્ડપુલ્લિયત્થેરસ્સાપદાનં તતિયં.

૪. અસોકપૂજકત્થેરઅપદાનં

૧૭. ‘‘તિવરાયં [તિપુરાયં (સ્યા.)] પુરે રમ્મે, રાજુય્યાનં અહુ તદા;

ઉય્યાનપાલો તત્થાસિં, રઞ્ઞો બદ્ધચરો અહં.

૧૮. ‘‘પદુમો નામ નામેન, સયમ્ભૂ સપ્પભો અહુ;

નિસિન્નં [નિસિન્નો (ક.)] પુણ્ડરીકમ્હિ, છાયા ન જહિ તં મુનિં.

૧૯. ‘‘અસોકં પુપ્ફિતં દિસ્વા, પિણ્ડિભારં સુદસ્સનં;

બુદ્ધસ્સ અભિરોપેસિં, જલજુત્તમનામિનો.

૨૦. ‘‘ચતુન્નવુતિતો કપ્પે, યં પુપ્ફમભિરોપયિં;

દુગ્ગતિં નાભિજાનામિ, બુદ્ધપૂજાયિદં ફલં.

૨૧. ‘‘સત્તતિંસમ્હિતો કપ્પે, સોળસ અરણઞ્જહા [અરુણઞ્જહા (સી.)];

સત્તરતનસમ્પન્ના, ચક્કવત્તી મહબ્બલા.

૨૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા અસોકપૂજકો થેરો ઇમા ગાથાયો અભાસિત્થાતિ.

અસોકપૂજકત્થેરસ્સાપદાનં ચતુત્થં.

૫. અઙ્કોલકત્થેરઅપદાનં

૨૩. ‘‘અઙ્કોલં પુપ્ફિતં દિસ્વા, માલાવરં સકોસકં [સમોગધં (સ્યા.)];

ઓચિનિત્વાન તં પુપ્ફં, અગમં બુદ્ધસન્તિકં.

૨૪. ‘‘સિદ્ધત્થો તમ્હિ સમયે, પતિલીનો મહામુનિ;

મુહુત્તં પટિમાનેત્વા, ગુહાયં પુપ્ફમોકિરિં.

૨૫. ‘‘ચતુન્નવુતિતો કપ્પે, યં પુપ્ફમભિપૂજયિં;

દુગ્ગતિં નાભિજાનામિ, પુપ્ફદાનસ્સિદં [બુદ્ધપૂજાયિદં (સી. સ્યા.)] ફલં.

૨૬. ‘‘છત્તિંસમ્હિ ઇતો કપ્પે, આસેકો દેવગજ્જિતો;

સત્તરતનસમ્પન્નો, ચક્કવત્તી મહબ્બલો.

૨૭. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા અઙ્કોલકો થેરો ઇમા ગાથાયો અભાસિત્થાતિ.

અઙ્કોલકત્થેરસ્સાપદાનં પઞ્ચમં.

૬. કિસલયપૂજકત્થેરઅપદાનં

૨૮. ‘‘નગરે દ્વારવતિયા, માલાવચ્છો મમં અહુ;

ઉદપાનો ચ તત્થેવ, પાદપાનં વિરોહનો.

૨૯. ‘‘સબલેન ઉપત્થદ્ધો, સિદ્ધત્થો અપરાજિતો;

મમાનુકમ્પમાનો સો, ગચ્છતે અનિલઞ્જસે.

૩૦. ‘‘અઞ્ઞં કિઞ્ચિ ન પસ્સામિ, પૂજાયોગ્ગં મહેસિનો;

અસોકં પલ્લવં દિસ્વા, આકાસે ઉક્ખિપિં અહં.

૩૧. ‘‘બુદ્ધસ્સ તે કિસલયા, ગચ્છતો યન્તિ પચ્છતો;

તાહં દિસ્વાન સંવિજિં [સોહં દિસ્વાન તં ઇદ્ધિં (સી. સ્યા.)], અહો બુદ્ધસ્સુળારતા.

૩૨. ‘‘ચતુન્નવુતિતો કપ્પે, પલ્લવં અભિરોપયિં;

દુગ્ગતિં નાભિજાનામિ, બુદ્ધપૂજાયિદં ફલં.

૩૩. ‘‘સત્તતિંસે [સત્તવીસે (સી. સ્યા.)] ઇતો કપ્પે, એકો એકિસ્સરો અહુ;

સત્તરતનસમ્પન્નો, ચક્કવત્તી મહબ્બલો.

૩૪. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા કિસલયપૂજકો થેરો ઇમા ગાથાયો અભાસિત્થાતિ.

કિસલયપૂજકત્થેરસ્સાપદાનં છટ્ઠં.

૭. તિન્દુકદાયકત્થેરઅપદાનં

૩૫. ‘‘ગિરિદુગ્ગચરો આસિં, મક્કટો થામવેગિકો;

ફલિનં તિન્દુકં દિસ્વા, બુદ્ધસેટ્ઠં અનુસ્સરિં.

૩૬. ‘‘નિક્ખમિત્વા કતિપાહં, વિચિનિં લોકનાયકં;

પસન્નચિત્તો સુમનો, સિદ્ધત્થં તિભવન્તગું.

૩૭. ‘‘મમ સઙ્કપ્પમઞ્ઞાય, સત્થા લોકે અનુત્તરો;

ખીણાસવસહસ્સેહિ, આગચ્છિ મમ સન્તિકં.

૩૮. ‘‘પામોજ્જં જનયિત્વાન, ફલહત્થો ઉપાગમિં;

પટિગ્ગહેસિ ભગવા, સબ્બઞ્ઞૂ વદતં વરો.

૩૯. ‘‘ચતુન્નવુતિતો કપ્પે, યં ફલં અદદિં તદા;

દુગ્ગતિં નાભિજાનામિ, ફલદાનસ્સિદં ફલં.

૪૦. ‘‘સત્તપઞ્ઞાસકપ્પમ્હિ, ઉપનન્દસનામકો;

સત્તરતનસમ્પન્નો, ચક્કવત્તી મહબ્બલો.

૪૧. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા તિન્દુકદાયકો થેરો ઇમા ગાથાયો અભાસિત્થાતિ.

તિન્દુકદાયકત્થેરસ્સાપદાનં સત્તમં.

૮. મુટ્ઠિપૂજકત્થેરઅપદાનં

૪૨. ‘‘સુમેધો નામ ભગવા, લોકજેટ્ઠો નરાસભો;

પચ્છિમે અનુકમ્પાય, પધાનં પદહી જિનો.

૪૩. ‘‘તસ્સ ચઙ્કમમાનસ્સ, દ્વિપદિન્દસ્સ તાદિનો;

ગિરિનેલસ્સ પુપ્ફાનં, મુટ્ઠિં બુદ્ધસ્સ રોપયિં.

૪૪. ‘‘તેન ચિત્તપ્પસાદેન, સુક્કમૂલેન ચોદિતો;

તિંસકપ્પસહસ્સાનિ, દુગ્ગતિં નુપપજ્જહં.

૪૫. ‘‘તેવીસતિકપ્પસતે, સુનેલો નામ ખત્તિયો;

સત્તરતનસમ્પન્નો, એકો આસિં મહબ્બલો.

૪૬. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા મુટ્ઠિપૂજકો થેરો ઇમા ગાથાયો અભાસિત્થાતિ.

મુટ્ઠિપૂજકત્થેરસ્સાપદાનં અટ્ઠમં.

૯. કિંકણિકપુપ્ફિયત્થેરઅપદાનં

૪૭. ‘‘સુમઙ્ગલોતિ નામેન, સયમ્ભૂ અપરાજિતો;

પવના નિક્ખમિત્વાન, નગરં પાવિસી જિનો.

૪૮. ‘‘પિણ્ડચારં ચરિત્વાન, નિક્ખમ્મ નગરા મુનિ;

કતકિચ્ચોવ સમ્બુદ્ધો, સો વસી વનમન્તરે.

૪૯. ‘‘કિંકણિપુપ્ફં પગ્ગય્હ, બુદ્ધસ્સ અભિરોપયિં;

પસન્નચિત્તો સુમનો, સયમ્ભુસ્સ મહેસિનો.

૫૦. ‘‘ચતુન્નવુતિતો કપ્પે, યં પુપ્ફમભિરોપયિં;

દુગ્ગતિં નાભિજાનામિ, બુદ્ધપૂજાયિદં ફલં.

૫૧. ‘‘છળાસીતિમ્હિતો કપ્પે, અપિલાસિસનામકો;

સત્તરતનસમ્પન્નો, ચક્કવત્તી મહબ્બલો.

૫૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા કિંકણિકપુપ્ફિયો થેરો ઇમા ગાથાયો અભાસિત્થાતિ.

કિંકણિકપુપ્ફિયત્થેરસ્સાપદાનં નવમં.

૧૦. યૂથિકપુપ્ફિયત્થેરઅપદાનં

૫૩. ‘‘પદુમુત્તરો નામ જિનો, આહુતીનં પટિગ્ગહો;

પવના નિક્ખમિત્વાન, વિહારં યાતિ ચક્ખુમા.

૫૪. ‘‘ઉભો હત્થેહિ પગ્ગય્હ, યૂથિકં પુપ્ફમુત્તમં;

બુદ્ધસ્સ અભિરોપયિં, મેત્તચિત્તસ્સ તાદિનો.

૫૫. ‘‘તેન ચિત્તપ્પસાદેન, અનુભોત્વાન સમ્પદા;

કપ્પાનં સતસહસ્સં, દુગ્ગતિં નુપપજ્જહં.

૫૬. ‘‘ઇતો પઞ્ઞાસકપ્પેસુ, એકો આસિં જનાધિપો;

સમિત્તનન્દનો નામ, ચક્કવત્તી મહબ્બલો.

૫૭. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા યૂથિકપુપ્ફિયો થેરો ઇમા ગાથાયો અભાસિત્થાતિ;

યૂથિકપુપ્ફિયત્થેરસ્સાપદાનં દસમં.

તમાલપુપ્ફિયવગ્ગો વીસતિમો.

તસ્સુદ્દાનં –

તમાલતિણસન્થારો, ખણ્ડફુલ્લિ અસોકિયો;

અઙ્કોલકી કિસલયો, તિન્દુકો નેલપુપ્ફિયો;

કિંકણિકો યૂથિકો ચ, ગાથા પઞ્ઞાસ અટ્ઠ ચાતિ.

અથ વગ્ગુદ્દાનં –

ભિક્ખાદાયી પરિવારો, સેરેય્યો સોભિતો તથા;

છત્તઞ્ચ બન્ધુજીવી ચ, સુપારિચરિયોપિ ચ.

કુમુદો કુટજો ચેવ, તમાલિ દસમો કતો;

છસતાનિ ચ ગાથાનિ, છસટ્ઠિ ચ તતુત્તરિ.

ભિક્ખાવગ્ગદસકં.