૨૧. કણિકારપુપ્ફિયવગ્ગો

૧. કણિકારપુપ્ફિયત્થેરઅપદાનં

૧. ‘‘કણિકારં પુપ્ફિતં દિસ્વા, ઓચિનિત્વાનહં તદા;

તિસ્સસ્સ અભિરોપેસિં, ઓઘતિણ્ણસ્સ તાદિનો.

૨. ‘‘દ્વેનવુતે ઇતો કપ્પે, યં પુપ્ફમભિરોપયિં;

દુગ્ગતિં નાભિજાનામિ, બુદ્ધપૂજાયિદં ફલં.

૩. ‘‘પઞ્ચત્તિંસે ઇતો કપ્પે, અરુણપાણીતિ વિસ્સુતો;

સત્તરતનસમ્પન્નો, ચક્કવત્તી મહબ્બલો.

૪. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા કણિકારપુપ્ફિયો થેરો ઇમા ગાથાયો અભાસિત્થાતિ.

કણિકારપુપ્ફિયત્થેરસ્સાપદાનં પઠમં.

૨. મિનેલપુપ્ફિયત્થેરઅપદાનં

૫. ‘‘સુવણ્ણવણ્ણો ભગવા, સતરંસી પતાપવા;

ચઙ્કમનં સમારૂળ્હો, મેત્તચિત્તો સિખીસભો.

૬. ‘‘પસન્નચિત્તો સુમનો, વન્દિત્વા [થોમેત્વા (સ્યા.)] ઞાણમુત્તમં;

મિનેલપુપ્ફં પગ્ગય્હ, બુદ્ધસ્સ અભિરોપયિં.

૭. ‘‘એકત્તિંસે ઇતો કપ્પે, યં પુપ્ફમભિપૂજયિં;

દુગ્ગતિં નાભિજાનામિ, બુદ્ધપૂજાયિદં ફલં.

૮. ‘‘એકૂનતિંસકપ્પમ્હિ, સુમેઘઘનનામકો;

સત્તરતનસમ્પન્નો, ચક્કવત્તી મહબ્બલો.

૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા મિનેલપુપ્ફિયો થેરો ઇમા ગાથાયો અભાસિત્થાતિ.

મિનેલપુપ્ફિયત્થેરસ્સાપદાનં દુતિયં.

૩. કિઙ્કણિપુપ્ફિયત્થેરઅપદાનં

૧૦. ‘‘કઞ્ચનગ્ઘિયસઙ્કાસો, સબ્બઞ્ઞૂ લોકનાયકો;

ઓદકં દહમોગ્ગય્હ, સિનાયિ લોકનાયકો.

૧૧. ‘‘પગ્ગય્હ કિઙ્કણિં [કિઙ્કિણિં (સી.)] પુપ્ફં, વિપસ્સિસ્સાભિરોપયિં;

ઉદગ્ગચિત્તો સુમનો, દ્વિપદિન્દસ્સ તાદિનો.

૧૨. ‘‘એકનવુતિતો કપ્પે, યં પુપ્ફમભિરોપયિં;

દુગ્ગતિં નાભિજાનામિ, બુદ્ધપૂજાયિદં ફલં.

૧૩. ‘‘સત્તવીસતિકપ્પમ્હિ, રાજા ભીમરથો અહુ;

સત્તરતનસમ્પન્નો, ચક્કવત્તી મહબ્બલો.

૧૪. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા કિઙ્કણિપુપ્ફિયો [કિઙ્કિણિકપુપ્ફિયો (સી.)] થેરો ઇમા ગાથાયો અભાસિત્થાતિ.

કિઙ્કણિપુપ્ફિયત્થેરસ્સાપદાનં તતિયં.

૪. તરણિયત્થેરઅપદાનં

૧૫. ‘‘અત્થદસ્સી તુ ભગવા, દ્વિપદિન્દો નરાસભો;

પુરક્ખતો સાવકેહિ, ગઙ્ગાતીરમુપાગમિ.

૧૬. ‘‘સમતિત્તિ કાકપેય્યા, ગઙ્ગા આસિ દુરુત્તરા;

ઉત્તારયિં ભિક્ખુસઙ્ઘં, બુદ્ધઞ્ચ દ્વિપદુત્તમં.

૧૭. ‘‘અટ્ઠારસે કપ્પસતે, યં કમ્મમકરિં તદા;

દુગ્ગતિં નાભિજાનામિ, તરણાય ઇદં ફલં.

૧૮. ‘‘તેરસેતો કપ્પસતે, પઞ્ચ સબ્બોભવા [સબ્ભોગવા (સી.)] અહું;

સત્તરતનસમ્પન્ના, ચક્કવત્તી મહબ્બલા.

૧૯. ‘‘પચ્છિમે ચ ભવે અસ્મિં, જાતોહં બ્રાહ્મણે કુલે;

સદ્ધિં તીહિ સહાયેહિ, પબ્બજિં સત્થુ સાસને.

૨૦. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા તરણિયો થેરો ઇમા ગાથાયો અભાસિત્થાતિ;

તરણિયત્થેરસ્સાપદાનં ચતુત્થં.

૫. નિગ્ગુણ્ડિપુપ્ફિયત્થેરઅપદાનં

૨૧. ‘‘વિપસ્સિસ્સ ભગવતો, આસિમારામિકો અહં;

નિગ્ગુણ્ડિપુપ્ફં પગ્ગય્હ, બુદ્ધસ્સ અભિરોપયિં.

૨૨. ‘‘એકનવુતિતો કપ્પે, યં પુપ્ફમભિપૂજયિં;

દુગ્ગતિં નાભિજાનામિ, બુદ્ધપૂજાયિદં ફલં.

૨૩. ‘‘પઞ્ચવીસે [પઞ્ચતિંસે (સી. સ્યા.)] ઇતો કપ્પે, એકો આસિં જનાધિપો;

મહાપતાપનામેન, ચક્કવત્તી મહબ્બલો.

૨૪. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા નિગ્ગુણ્ડિપુપ્ફિયો થેરો ઇમા ગાથાયો અભાસિત્થાતિ.

નિગ્ગુણ્ડિપુપ્ફિયત્થેરસ્સાપદાનં પઞ્ચમં.

૬. ઉદકદાયકત્થેરઅપદાનં

૨૫. ‘‘ભુઞ્જન્તં સમણં દિસ્વા, વિપ્પસન્નમનાવિલં;

ઘટેનોદકમાદાય, સિદ્ધત્થસ્સ અદાસહં.

૨૬. ‘‘નિમ્મલો હોમહં અજ્જ, વિમલો ખીણસંસયો;

ભવે નિબ્બત્તમાનમ્હિ, ફલં નિબ્બત્તતે મમ [સુભં (સી.)].

૨૭. ‘‘ચતુન્નવુતિતો કપ્પે, ઉદકં યમદાસહં [યં તદા અદં (સી.), અદદિં તદા (સ્યા.)];

દુગ્ગતિં નાભિજાનામિ, દકદાનસ્સિદં ફલં.

૨૮. ‘‘એકસટ્ઠિમ્હિતો કપ્પે, એકોવ વિમલો અહુ;

સત્તરતનસમ્પન્નો, ચક્કવત્તી મહબ્બલો.

૨૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ઉદકદાયકો થેરો ઇમા ગાથાયો અભાસિત્થાતિ.

ઉદકદાયકત્થેરસ્સાપદાનં છટ્ઠં.

૭. સલલમાલિયત્થેરઅપદાનં

૩૦. ‘‘કણિકારંવ જોતન્તં, નિસિન્નં પબ્બતન્તરે;

ઓભાસેન્તં દિસા સબ્બા, સિદ્ધત્થં નરસારથિં.

૩૧. ‘‘ધનું અદ્વેજ્ઝં કત્વાન, ઉસું સન્નય્હહં તદા;

પુપ્ફં સવણ્ટં છેત્વાન, બુદ્ધસ્સ અભિરોપયિં.

૩૨. ‘‘ચતુન્નવુતિતો કપ્પે, યં પુપ્ફમભિરોપયિં;

દુગ્ગતિં નાભિજાનામિ, બુદ્ધપૂજાયિદં ફલં.

૩૩. ‘‘એકપઞ્ઞાસિતો કપ્પે, એકો આસિં જુતિન્ધરો;

સત્તરતનસમ્પન્નો, ચક્કવત્તી મહબ્બલો.

૩૪. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સલલમાલિયો થેરો ઇમા ગાથાયો અભાસિત્થાતિ.

સલલમાલિયત્થેરસ્સાપદાનં સત્તમં.

૮. કોરણ્ડપુપ્ફિયત્થેરઅપદાનં

૩૫. ‘‘અક્કન્તઞ્ચ પદં દિસ્વા, ચક્કાલઙ્કારભૂસિતં;

પદેનાનુપદં યન્તો, વિપસ્સિસ્સ મહેસિનો.

૩૬. ‘‘કોરણ્ડં પુપ્ફિતં દિસ્વા, સમૂલં પૂજિતં મયા;

હટ્ઠો હટ્ઠેન ચિત્તેન, અવન્દિં પદમુત્તમં.

૩૭. ‘‘એકનવુતિતો કપ્પે, યં પુપ્ફમભિપૂજયિં;

દુગ્ગતિં નાભિજાનામિ, બુદ્ધપૂજાયિદં ફલં.

૩૮. ‘‘સત્તપઞ્ઞાસકપ્પમ્હિ, એકો વીતમલો અહું;

સત્તરતનસમ્પન્નો, ચક્કવત્તી મહબ્બલો.

૩૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા કોરણ્ડપુપ્ફિયો થેરો ઇમા ગાથાયો અભાસિત્થાતિ.

કોરણ્ડપુપ્ફિયત્થેરસ્સાપદાનં અટ્ઠમં.

૯. આધારદાયકત્થેરઅપદાનં

૪૦. ‘‘આધારકં મયા દિન્નં, સિખિનો લોકબન્ધુનો;

ધારેમિ પથવિં સબ્બં, કેવલં વસુધં ઇમં.

૪૧. ‘‘કિલેસા ઝાપિતા મય્હં, ભવા સબ્બે સમૂહતા;

ધારેમિ અન્તિમં દેહં, સમ્માસમ્બુદ્ધસાસને.

૪૨. ‘‘સત્તવીસે ઇતો કપ્પે, અહેસું ચતુરો જના;

સમન્તવરણા નામ, ચક્કવત્તી મહબ્બલા.

૪૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા આધારદાયકો [પરિયાદાનિયો (ક.)] થેરો ઇમા ગાથાયો અભાસિત્થાતિ.

આધારદાયકત્થેરસ્સાપદાનં નવમં.

૧૦. પાપનિવારિયત્થેરઅપદાનં

૪૪. ‘‘તિસ્સસ્સ તુ ભગવતો, દેવદેવસ્સ તાદિનો;

એકચ્છત્તં મયા દિન્નં, વિપ્પસન્નેન ચેતસા.

૪૫. ‘‘નિવુતં હોતિ મે પાપં, કુસલસ્સુપસમ્પદા;

આકાસે છત્તં ધારેન્તિ, પુબ્બકમ્મસ્સિદં ફલં.

૪૬. ‘‘ચરિમં વત્તતે મય્હં, ભવા સબ્બે સમૂહતા;

ધારેમિ અન્તિમં દેહં, સમ્માસમ્બુદ્ધસાસને.

૪૭. ‘‘દ્વેનવુતે ઇતો કપ્પે, યં છત્તમદદિં તદા;

દુગ્ગતિં નાભિજાનામિ, છત્તદાનસ્સિદં ફલં.

૪૮. ‘‘દ્વેસત્તતિમ્હિતો કપ્પે, અટ્ઠાસિંસુ જનાધિપા;

મહાનિદાનનામેન, રાજાનો ચક્કવત્તિનો.

૪૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પાપનિવારિયો [વાતાતપનિવારિયો (સી.)] થેરો ઇમા ગાથાયો અભાસિત્થાતિ;

પાપનિવારિયત્થેરસ્સાપદાનં દસમં.

કણિકારપુપ્ફિયવગ્ગો એકવીસતિમો.