૫. પિલિન્દવચ્છત્થેરઅપદાનં

૫૫. ‘‘નિબ્બુતે લોકનાથમ્હિ, સુમેધે અગ્ગપુગ્ગલે;

પસન્નચિત્તો સુમનો, થૂપપૂજં અકાસહં.

૫૬. ‘‘યે ચ ખીણાસવા તત્થ, છળભિઞ્ઞા મહિદ્ધિકા;

તેહં તત્થ સમાનેત્વા, સઙ્ઘભત્તં અકાસહં.

૫૭. ‘‘સુમેધસ્સ ભગવતો, ઉપટ્ઠાકો તદા અહુ;

સુમેધો નામ નામેન, અનુમોદિત્થ સો તદા.

૫૮. ‘‘તેન ચિત્તપ્પસાદેન, વિમાનં ઉપપજ્જહં;

છળાસીતિસહસ્સાનિ, અચ્છરાયો રમિંસુ મે.

૫૯. ‘‘મમેવ અનુવત્તન્તિ, સબ્બકામેહિ તા સદા;

અઞ્ઞે દેવે અભિભોમિ, પુઞ્ઞકમ્મસ્સિદં ફલં.

૬૦. ‘‘પઞ્ચવીસતિકપ્પમ્હિ, વરુણો નામ ખત્તિયો;

વિસુદ્ધભોજનો [સુસુદ્ધભોજનો (સી.)] આસિં, ચક્કવત્તી અહં તદા.

૬૧. ‘‘ન તે બીજં પવપન્તિ, નપિ નીયન્તિ નઙ્ગલા;

અકટ્ઠપાકિમં સાલિં, પરિભુઞ્જન્તિ માનુસા.

૬૨. ‘‘તત્થ રજ્જં કરિત્વાન, દેવત્તં પુન ગચ્છહં;

તદાપિ એદિસા મય્હં, નિબ્બત્તા ભોગસમ્પદા.

૬૩. ‘‘ન મં મિત્તા અમિત્તા વા, હિંસન્તિ સબ્બપાણિનો;

સબ્બેસમ્પિ પિયો હોમિ, પુઞ્ઞકમ્મસ્સિદં ફલં.

૬૪. ‘‘તિંસકપ્પસહસ્સમ્હિ, યં દાનમદદિં તદા;

દુગ્ગતિં નાભિજાનામિ, ગન્ધાલેપસ્સિદં ફલં.

૬૫. ‘‘ઇમસ્મિં ભદ્દકે કપ્પે, એકો આસિં જનાધિપો;

મહાનુભાવો રાજાહં [રાજીસિ (સ્યા. ક.)], ચક્કવત્તી મહબ્બલો.

૬૬. ‘‘સોહં પઞ્ચસુ સીલેસુ, ઠપેત્વા જનતં બહું;

પાપેત્વા સુગતિંયેવ, દેવતાનં પિયો અહું.

૬૭. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા પિલિન્દવચ્છો [પિલિન્દિવચ્છો (સી.)] થેરો ઇમા ગાથાયો અભાસિત્થાતિ.

પિલિન્દવચ્છત્થેરસ્સાપદાનં પઞ્ચમં.