૬. રાહુલત્થેરઅપદાનં

૬૮. ‘‘પદુમુત્તરસ્સ ભગવતો, લોકજેટ્ઠસ્સ તાદિનો;

સત્તભૂમમ્હિ પાસાદે, આદાસં સન્થરિં અહં.

૬૯. ‘‘ખીણાસવસહસ્સેહિ, પરિકિણ્ણો મહામુનિ;

ઉપાગમિ ગન્ધકુટિં, દ્વિપદિન્દો [દિપદિન્દો (સી. સ્યા.)] નરાસભો.

૭૦. ‘‘વિરોચેન્તો [વિરોચયં (સ્યા.)] ગન્ધકુટિં, દેવદેવો નરાસભો;

ભિક્ખુસઙ્ઘે ઠિતો સત્થા, ઇમા ગાથા અભાસથ.

૭૧. ‘‘‘યેનાયં જોતિતા સેય્યા, આદાસોવ સુસન્થતો;

તમહં કિત્તયિસ્સામિ, સુણાથ મમ ભાસતો.

૭૨. ‘‘‘સોણ્ણમયા રૂપિમયા, અથો વેળુરિયામયા;

નિબ્બત્તિસ્સન્તિ પાસાદા, યે કેચિ મનસો પિયા.

૭૩. ‘‘‘ચતુસટ્ઠિક્ખત્તું દેવિન્દો, દેવરજ્જં કરિસ્સતિ;

સહસ્સક્ખત્તું ચક્કવત્તી, ભવિસ્સતિ અનન્તરા.

૭૪. ‘‘‘એકવીસતિકપ્પમ્હિ, વિમલો નામ ખત્તિયો;

ચાતુરન્તો વિજિતાવી, ચક્કવત્તી ભવિસ્સતિ.

૭૫. ‘‘‘નગરં રેણુવતી નામ, ઇટ્ઠકાહિ સુમાપિતં;

આયામતો તીણિ સતં, ચતુરસ્સસમાયુતં.

૭૬. ‘‘‘સુદસ્સનો નામ પાસાદો, વિસ્સકમ્મેન માપિતો [વિસુકમ્મેન§માપિતો (ક.), વિસ્સકમ્મેન નિમ્મિતો (સી.)];

કૂટાગારવરૂપેતો, સત્તરતનભૂસિતો.

૭૭. ‘‘‘દસસદ્દાવિવિત્તં તં [અવિવિત્તં (સી.)], વિજ્જાધરસમાકુલં;

સુદસ્સનંવ નગરં, દેવતાનં ભવિસ્સતિ.

૭૮. ‘‘‘પભા નિગ્ગચ્છતે તસ્સ, ઉગ્ગચ્છન્તેવ સૂરિયે;

વિરોચેસ્સતિ તં નિચ્ચં, સમન્તા અટ્ઠયોજનં.

૭૯. ‘‘‘કપ્પસતસહસ્સમ્હિ, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૮૦. ‘‘‘તુસિતા સો ચવિત્વાન, સુક્કમૂલેન ચોદિતો;

ગોતમસ્સ ભગવતો, અત્રજો સો ભવિસ્સતિ.

૮૧. ‘‘‘સચે વસેય્ય [સચા’વસેય્ય (?)] અગારં, ચક્કવત્તી ભવેય્ય સો;

અટ્ઠાનમેતં યં તાદી, અગારે રતિમજ્ઝગા.

૮૨. ‘‘‘નિક્ખમિત્વા અગારમ્હા, પબ્બજિસ્સતિ સુબ્બતો;

રાહુલો નામ નામેન, અરહા સો ભવિસ્સતિ’.

૮૩. ‘‘કિકીવ અણ્ડં રક્ખેય્ય, ચામરી વિય વાલધિં;

નિપકો સીલસમ્પન્નો, મમં રક્ખિ મહામુનિ [એવં રક્ખિં મહામુનિ (સી. ક.), મમં દક્ખિ મહામુનિ (સ્યા.)].

૮૪. ‘‘તસ્સાહં ધમ્મમઞ્ઞાય, વિહાસિં સાસને રતો;

સબ્બાસવે પરિઞ્ઞાય, વિહરામિ અનાસવો.

૮૫. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા રાહુલો થેરો ઇમા ગાથાયો અભાસિત્થાતિ.

રાહુલત્થેરસ્સાપદાનં છટ્ઠં.