૨. બન્ધુજીવકત્થેરઅપદાનં

૬. ‘‘સિદ્ધત્થો નામ સમ્બુદ્ધો, સયમ્ભૂ સબ્ભિ વણ્ણિતો;

સમાધિં સો સમાપન્નો, નિસીદિ પબ્બતન્તરે.

૭. ‘‘જાતસ્સરે ગવેસન્તો, દકજં પુપ્ફમુત્તમં;

બન્ધુજીવકપુપ્ફાનિ, અદ્દસં સમનન્તરં.

૮. ‘‘ઉભો હત્થેહિ પગ્ગય્હ, ઉપાગચ્છિં મહામુનિં;

પસન્નચિત્તો સુમનો, સિદ્ધત્થસ્સાભિરોપયિં.

૯. ‘‘ચતુન્નવુતિતો કપ્પે, યં પુપ્ફમભિરોપયિં;

દુગ્ગતિં નાભિજાનામિ, બુદ્ધપૂજાયિદં ફલં.

૧૦. ‘‘ઇતો ચાતુદ્દસે કપ્પે, એકો આસિં જનાધિપો;

સમુદ્દકપ્પો નામેન, ચક્કવત્તી મહબ્બલો.

૧૧. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા બન્ધુજીવકો થેરો ઇમા ગાથાયો અભાસિત્થાતિ.

બન્ધુજીવકત્થેરસ્સાપદાનં દુતિયં.