૩. કોટુમ્બરિયત્થેરઅપદાનં

૧૨. ‘‘કણિકારંવ જોતન્તં, નિસિન્નં પબ્બતન્તરે;

અપ્પમેય્યંવ ઉદધિં, વિત્થતં ધરણિં યથા.

૧૩. ‘‘પૂજિતં [પરેતં (સી.)] દેવસઙ્ઘેન, નિસભાજાનિયં યથા;

હટ્ઠો હટ્ઠેન ચિત્તેન, ઉપાગચ્છિં નરુત્તમં.

૧૪. ‘‘સત્તપુપ્ફાનિ પગ્ગય્હ, કોટુમ્બરસમાકુલં;

બુદ્ધસ્સ અભિરોપેસિં, સિખિનો લોકબન્ધુનો.

૧૫. ‘‘એકત્તિંસે ઇતો કપ્પે, યં પુપ્ફમભિરોપયિં;

દુગ્ગતિં નાભિજાનામિ, બુદ્ધપૂજાયિદં ફલં.

૧૬. ‘‘ઇતો વીસતિકપ્પમ્હિ, મહાનેલસનામકો;

એકો આસિ મહાતેજો, ચક્કવત્તી મહબ્બલો.

૧૭. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા કોટુમ્બરિયો થેરો ઇમા ગાથાયો અભાસિત્થાતિ.

કોટુમ્બરિયત્થેરસ્સાપદાનં તતિયં.