૯. સાલપુપ્ફદાયકત્થેરઅપદાનં

૬૦. ‘‘મિગરાજા તદા આસિં, અભિજાતો સુકેસરી;

ગિરિદુગ્ગં ગવેસન્તો, અદ્દસં લોકનાયકં.

૬૧. ‘‘અયં નુ ખો મહાવીરો, નિબ્બાપેતિ મહાજનં;

યંનૂનાહં ઉપાસેય્યં, દેવદેવં નરાસભં.

૬૨. ‘‘સાખં સાલસ્સ ભઞ્જિત્વા, સકોસં પુપ્ફમાહરિં;

ઉપગન્ત્વાન સમ્બુદ્ધં, અદાસિં પુપ્ફમુત્તમં.

૬૩. ‘‘એકનવુતિતો કપ્પે, યં પુપ્ફમભિરોપયિં;

દુગ્ગતિં નાભિજાનામિ, પુપ્ફદાનસ્સિદં ફલં.

૬૪. ‘‘ઇતો ચ નવમે કપ્પે, વિરોચનસનામકા;

તયો આસિંસુ રાજાનો, ચક્કવત્તી મહબ્બલા.

૬૫. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સાલપુપ્ફદાયકો થેરો ઇમા ગાથાયો અભાસિત્થાતિ.

સાલપુપ્ફદાયકત્થેરસ્સાપદાનં નવમં.