૧૦. પિયાલફલદાયકત્થેરઅપદાનં

૬૬. ‘‘પારાવતો [પરોધકો (સ્યા.)] તદા આસિં, પરં અનુપરોધકો;

પબ્ભારે સેય્યં કપ્પેમિ, અવિદૂરે સિખિસત્થુનો.

૬૭. ‘‘સાયં પાતઞ્ચ પસ્સામિ, બુદ્ધં લોકગ્ગનાયકં;

દેય્યધમ્મો ચ મે નત્થિ, દ્વિપદિન્દસ્સ તાદિનો.

૬૮. ‘‘પિયાલફલમાદાય, અગમં બુદ્ધસન્તિકં;

પટિગ્ગહેસિ ભગવા, લોકજેટ્ઠો નરાસભો.

૬૯. ‘‘તતો પરં ઉપાદાય, પરિચારિં વિનાયકં;

તેન ચિત્તપ્પસાદેન, તત્થ કાલઙ્કતો અહં.

૭૦. ‘‘એકત્તિંસે ઇતો કપ્પે, યં ફલં અદદિં અહં;

દુગ્ગતિં નાભિજાનામિ, ફલદાનસ્સિદં ફલં.

૭૧. ‘‘ઇતો પન્નરસે કપ્પે, તયો આસું પિયાલિનો;

સત્તરતનસમ્પન્ના, ચક્કવત્તી મહબ્બલા.

૭૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પિયાલફલદાયકો થેરો ઇમા ગાથાયો અભાસિત્થાતિ.

પિયાલફલદાયકત્થેરસ્સાપદાનં દસમં.

સોભિતવગ્ગો ચુદ્દસમો.