૭. ફલદાયકત્થેરઅપદાનં

૭૫. ‘‘અજ્ઝાયકો મન્તધરો, તિણ્ણં વેદાન પારગૂ;

હિમવન્તસ્સાવિદૂરે, વસામિ અસ્સમે અહં.

૭૬. ‘‘અગ્ગિહુત્તઞ્ચ મે અત્થિ, પુણ્ડરીકફલાનિ ચ;

પુટકે નિક્ખિપિત્વાન, દુમગ્ગે લગ્ગિતં મયા.

૭૭. ‘‘પદુમુત્તરો લોકવિદૂ, આહુતીનં પટિગ્ગહો;

મમુદ્ધરિતુકામો સો, ભિક્ખન્તો મમુપાગમિ.

૭૮. ‘‘પસન્નચિત્તો સુમનો, ફલં બુદ્ધસ્સદાસહં;

વિત્તિસઞ્જનનો મય્હં, દિટ્ઠધમ્મસુખાવહો.

૭૯. ‘‘સુવણ્ણવણ્ણો સમ્બુદ્ધો, આહુતીનં પટિગ્ગહો;

અન્તલિક્ખે ઠિતો સત્થા, ઇમં ગાથં અભાસથ.

૮૦. ‘‘‘ઇમિના ફલદાનેન, ચેતનાપણિધીહિ ચ;

કપ્પાનં સતસહસ્સં, દુગ્ગતિં નુપપજ્જસિ’.

૮૧. ‘‘તેનેવ સુક્કમૂલેન, અનુભોત્વાન સમ્પદા;

પત્તોમ્હિ અચલં ઠાનં, હિત્વા જયપરાજયં.

૮૨. ‘‘ઇતો સત્તસતે કપ્પે, રાજા આસિં સુમઙ્ગલો;

સત્તરતનસમ્પન્નો ચક્કવત્તી મહબ્બલો.

૮૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ફલદાયકો થેરો ઇમા ગાથાયો અભાસિત્થાતિ.

ફલદાયકત્થેરસ્સાપદાનં સત્તમં.