૮. મગ્ગસઞ્ઞકત્થેરઅપદાનં

૬૬. ‘‘પદુમુત્તરબુદ્ધસ્સ, સાવકા વનચારિનો;

વિપ્પનટ્ઠા બ્રહારઞ્ઞે, અન્ધાવ અનુસુય્યરે [અનુસુયરે (સી.)].

૬૭. ‘‘અનુસ્સરિત્વા સમ્બુદ્ધં, પદુમુત્તરનાયકં;

તસ્સ તે મુનિનો પુત્તા, વિપ્પનટ્ઠા મહાવને.

૬૮. ‘‘ભવના ઓરુહિત્વાન, અગમિં ભિક્ખુસન્તિકં;

તેસં મગ્ગઞ્ચ આચિક્ખિં, ભોજનઞ્ચ અદાસહં.

૬૯. ‘‘તેન કમ્મેન દ્વિપદિન્દ, લોકજેટ્ઠ નરાસભ;

જાતિયા સત્તવસ્સોહં, અરહત્તમપાપુણિં.

૭૦. ‘‘સચક્ખૂ નામ નામેન, દ્વાદસ ચક્કવત્તિનો;

સત્તરતનસમ્પન્ના, પઞ્ચકપ્પસતે ઇતો.

૭૧. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા મગ્ગસઞ્ઞકો થેરો ઇમા ગાથાયો અભાસિત્થાતિ.

મગ્ગસઞ્ઞકત્થેરસ્સાપદાનં અટ્ઠમં.