૮. સેનાસનદાયકત્થેરઅપદાનં

૪૫. ‘‘સિદ્ધત્થસ્સ ભગવતો, અદાસિં પણ્ણસન્થરં;

સમન્તા ઉપહારઞ્ચ, કુસુમં ઓકિરિં અહં.

૪૬. ‘‘પાસાદેવં ગુણં રમ્મં [પાસાદે ચ ગુહં રમ્મં (સ્યા.)], અનુભોમિ મહારહં;

મહગ્ઘાનિ ચ પુપ્ફાનિ, સયનેભિસવન્તિ મે.

૪૭. ‘‘સયનેહં તુવટ્ટામિ, વિચિત્તે પુપ્ફસન્થતે;

પુપ્ફવુટ્ઠિ ચ સયને, અભિવસ્સતિ તાવદે.

૪૮. ‘‘ચતુન્નવુતિતો કપ્પે, અદાસિં પણ્ણસન્થરં;

દુગ્ગતિં નાભિજાનામિ, સન્થરસ્સ ઇદં ફલં.

૪૯. ‘‘તિણસન્થરકા નામ, સત્તેતે ચક્કવત્તિનો;

ઇતો તે પઞ્ચમે કપ્પે, ઉપ્પજ્જિંસુ જનાધિપા.

૫૦. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સેનાસનદાયકો થેરો ઇમા ગાથાયો અભાસિત્થાતિ.

સેનાસનદાયકત્થેરસ્સાપદાનં અટ્ઠમં.