૪. સૂચિદાયકત્થેરઅપદાનં

૧૯. ‘‘કમ્મારોહં પુરે આસિં, બન્ધુમાયં પુરુત્તમે;

સૂચિદાનં મયા દિન્નં, વિપસ્સિસ્સ મહેસિનો.

૨૦. ‘‘વજિરગ્ગસમં ઞાણં, હોતિ કમ્મેન તાદિસં;

વિરાગોમ્હિ વિમુત્તોમ્હિ [વિભવોમ્હિ વિભત્તોમ્હિ (ક.)], પત્તોમ્હિ આસવક્ખયં.

૨૧. ‘‘અતીતે ચ ભવે સબ્બે, વત્તમાને ચનાગતે [અતીતા ચ ભવા સબ્બે, વત્તમાના ચ’નાગતા (સ્યા. ક.)];

ઞાણેન વિચિનિં સબ્બં, સૂચિદાનસ્સિદં ફલં.

૨૨. ‘‘એકનવુતિતો કપ્પે, સત્તાસું વજિરવ્હયા;

સત્તરતનસમ્પન્ના, ચક્કવત્તી મહબ્બલા.

૨૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સૂચિદાયકો થેરો ઇમા ગાથાયો અભાસિત્થાતિ.

સૂચિદાયકત્થેરસ્સાપદાનં ચતુત્થં.