૩-૫. પુણ્ણમન્તાણિપુત્તત્થેરઅપદાનં

૪૩૪. ‘‘અજ્ઝાયકો મન્તધરો, તિણ્ણં વેદાન પારગૂ;

પુરક્ખતોમ્હિ સિસ્સેહિ, ઉપગચ્છિં નરુત્તમં.

૪૩૫. ‘‘પદુમુત્તરો લોકવિદૂ, આહુતીનં પટિગ્ગહો;

મમ કમ્મં પકિત્તેસિ, સઙ્ખિત્તેન મહામુનિ.

૪૩૬. ‘‘તાહં ધમ્મં સુણિત્વાન, અભિવાદેત્વાન સત્થુનો;

અઞ્જલિં પગ્ગહેત્વાન, પક્કમિં [પક્કામિં (સી. સ્યા.)] દક્ખિણામુખો.

૪૩૭. ‘‘સઙ્ખિત્તેન સુણિત્વાન, વિત્થારેન અભાસયિં [અદેસયિં (સી. સ્યા.)];

સબ્બે સિસ્સા અત્તમના, સુત્વાન મમ ભાસતો;

સકં દિટ્ઠિં વિનોદેત્વા, બુદ્ધે ચિત્તં પસાદયું.

૪૩૮. ‘‘સઙ્ખિત્તેનપિ દેસેમિ, વિત્થારેન તથેવહં [દેસેસિં વિત્થારેનપિ ભાસયિં (ક.)];

અભિધમ્મનયઞ્ઞૂહં, કથાવત્થુવિસુદ્ધિયા;

સબ્બેસં વિઞ્ઞાપેત્વાન, વિહરામિ અનાસવો.

૪૩૯. ‘‘ઇતો પઞ્ચસતે કપ્પે, ચતુરો સુપ્પકાસકા;

સત્તરતનસમ્પન્ના, ચતુદીપમ્હિ ઇસ્સરા.

૪૪૦. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા પુણ્ણો મન્તાણિપુત્તો થેરો ઇમા ગાથાયો અભાસિત્થાતિ.

પુણ્ણમન્તાણિપુત્તત્થેરસ્સાપદાનં પઞ્ચમં.