૩-૪. અનુરુદ્ધત્થેરઅપદાનં

૪૨૧. ‘‘સુમેધં ભગવન્તાહં, લોકજેટ્ઠં નરાસભં;

વૂપકટ્ઠં વિહરન્તં, અદ્દસં લોકનાયકં.

૪૨૨. ‘‘ઉપગન્ત્વાન સમ્બુદ્ધં, સુમેધં લોકનાયકં;

અઞ્જલિં પગ્ગહેત્વાન, બુદ્ધસેટ્ઠમયાચહં.

૪૨૩. ‘‘અનુકમ્પ મહાવીર, લોકજેટ્ઠ નરાસભ;

પદીપં તે પદસ્સામિ, રુક્ખમૂલમ્હિ ઝાયતો.

૪૨૪. ‘‘અધિવાસેસિ સો ધીરો, સયમ્ભૂ વદતં વરો;

દુમેસુ વિનિવિજ્ઝિત્વા, યન્તં યોજિયહં તદા.

૪૨૫. ‘‘સહસ્સવટ્ટિં પાદાસિં, બુદ્ધસ્સ લોકબન્ધુનો;

સત્તાહં પજ્જલિત્વાન, દીપા વૂપસમિંસુ મે.

૪૨૬. ‘‘તેન ચિત્તપ્પસાદેન, ચેતનાપણિધીહિ ચ;

જહિત્વા માનુસં દેહં, વિમાનમુપપજ્જહં.

૪૨૭. ‘‘ઉપપન્નસ્સ દેવત્તં, બ્યમ્હં આસિ સુનિમ્મિતં;

સમન્તતો પજ્જલતિ, દીપદાનસ્સિદં ફલં.

૪૨૮. ‘‘સમન્તા યોજનસતં, વિરોચેસિમહં તદા;

સબ્બે દેવે અભિભોમિ, દીપદાનસ્સિદં ફલં.

૪૨૯. ‘‘તિંસકપ્પાનિ દેવિન્દો, દેવરજ્જમકારયિં;

ન મં કેચીતિમઞ્ઞન્તિ, દીપદાનસ્સિદં ફલં.

૪૩૦. ‘‘અટ્ઠવીસતિક્ખત્તુઞ્ચ, ચક્કવત્તી અહોસહં;

દિવા રત્તિઞ્ચ પસ્સામિ, સમન્તા યોજનં તદા.

૪૩૧. ‘‘સહસ્સલોકં ઞાણેન, પસ્સામિ સત્થુ સાસને;

દિબ્બચક્ખુમનુપ્પત્તો, દીપદાનસ્સિદં ફલં.

૪૩૨. ‘‘સુમેધો નામ સમ્બુદ્ધો, તિંસકપ્પસહસ્સિતો;

તસ્સ દીપો મયા દિન્નો, વિપ્પસન્નેન ચેતસા.

૪૩૩. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા અનુરુદ્ધો થેરો ઇમા ગાથાયો અભાસિત્થાતિ.

અનુરુદ્ધત્થેરસ્સાપદાનં ચતુત્થં.