૩-૩. મહાકસ્સપત્થેરઅપદાનં

૩૯૮. ‘‘પદુમુત્તરસ્સ ભગવતો, લોકજેટ્ઠસ્સ તાદિનો;

નિબ્બુતે લોકનાથમ્હિ, પૂજં કુબ્બન્તિ સત્થુનો.

૩૯૯. ‘‘ઉદગ્ગચિત્તા જનતા, આમોદિતપમોદિતા;

તેસુ સંવેગજાતેસુ, પીતિ મે ઉદપજ્જથ.

૪૦૦. ‘‘ઞાતિમિત્તે સમાનેત્વા, ઇદં વચનમબ્રવિં;

પરિનિબ્બુતો મહાવીરો, હન્દ પૂજં કરોમસે.

૪૦૧. ‘‘સાધૂતિ તે પટિસ્સુત્વા, ભિય્યો હાસં જનિંસુ મે;

બુદ્ધસ્મિં લોકનાથમ્હિ, કાહામ પુઞ્ઞસઞ્ચયં.

૪૦૨. ‘‘અગ્ઘિયં સુકતં કત્વા, સતહત્થસમુગ્ગતં;

દિયડ્ઢહત્થપત્થટં, વિમાનં નભમુગ્ગતં.

૪૦૩. ‘‘કત્વાન હમ્મિયં તત્થ, તાલપન્તીહિ ચિત્તિતં;

સકં ચિત્તં પસાદેત્વા, ચેતિયં પૂજયુત્તમં.

૪૦૪. ‘‘અગ્ગિક્ખન્ધોવ જલિતો, કિંસુકો ઇવ [સાલરાજાવ (સી.)] ફુલ્લિતો;

ઇન્દલટ્ઠીવ આકાસે, ઓભાસેતિ ચતુદ્દિસા.

૪૦૫. ‘‘તત્થ ચિત્તં પસાદેત્વા, કત્વાન કુસલં બહું;

પુબ્બકમ્મં સરિત્વાન, તિદસં ઉપપજ્જહં.

૪૦૬. ‘‘સહસ્સયુત્તં હયવાહિં, દિબ્બયાનમધિટ્ઠિતો;

ઉબ્બિદ્ધં ભવનં મય્હં, સત્તભૂમં સમુગ્ગતં.

૪૦૭. ‘‘કૂટાગારસહસ્સાનિ, સબ્બસોણ્ણમયા અહું;

જલન્તિ સકતેજેન, દિસા સબ્બા પભાસયં.

૪૦૮. ‘‘સન્તિ અઞ્ઞેપિ નિય્યૂહા, લોહિતઙ્ગમયા તદા;

તેપિ જોતન્તિ આભાય, સમન્તા ચતુરો દિસા.

૪૦૯. ‘‘પુઞ્ઞકમ્માભિનિબ્બત્તા, કૂટાગારા સુનિમ્મિતા;

મણિમયાપિ જોતન્તિ, દિસા દસ [દિસોદિસં (સ્યા.)] સમન્તતો.

૪૧૦. ‘‘તેસં ઉજ્જોતમાનાનં, ઓભાસો વિપુલો અહુ;

સબ્બે દેવે અભિભોમિ, પુઞ્ઞકમ્મસ્સિદં ફલં.

૪૧૧. ‘‘સટ્ઠિકપ્પસહસ્સમ્હિ, ઉબ્બિદ્ધો નામ ખત્તિયો;

ચાતુરન્તો વિજિતાવી, પથવિં આવસિં અહં.

૪૧૨. ‘‘તથેવ ભદ્દકે કપ્પે, તિંસક્ખત્તું અહોસહં;

સકકમ્માભિરદ્ધોમ્હિ, ચક્કવત્તી મહબ્બલો.

૪૧૩. ‘‘સત્તરતનસમ્પન્નો, ચતુદીપમ્હિ ઇસ્સરો;

તત્થાપિ ભવનં મય્હં, ઇન્દલટ્ઠીવ ઉગ્ગતં.

૪૧૪. ‘‘આયામતો ચતુબ્બીસં, વિત્થારેન ચ દ્વાદસ;

રમ્મણં [રમ્મકં (સી. સ્યા.)] નામ નગરં, દળ્હપાકારતોરણં.

૪૧૫. ‘‘આયામતો પઞ્ચસતં, વિત્થારેન તદડ્ઢકં;

આકિણ્ણં જનકાયેહિ, તિદસાનં પુરં વિય.

૪૧૬. ‘‘યથા સૂચિઘરે સૂચી, પક્ખિત્તા પણ્ણવીસતિ;

અઞ્ઞમઞ્ઞં પઘટ્ટેન્તિ, આકિણ્ણં હોતિ લઙ્કતં [તં તદા (સી.), સતતા (સ્યા.), સઙ્કરં (?)].

૪૧૭. ‘‘એવમ્પિ નગરં મય્હં, હત્થિસ્સરથસંકુલં;

મનુસ્સેહિ સદાકિણ્ણં, રમ્મણં નગરુત્તમં.

૪૧૮. ‘‘તત્થ ભુત્વા પિવિત્વા ચ, પુન દેવત્તનં ગતો [પુનપિ દેવતઙ્ગતો (ક.)].

ભવે પચ્છિમકે મય્હં, અહોસિ કુલસમ્પદા.

૪૧૯. ‘‘બ્રાહ્મઞ્ઞકુલસમ્ભૂતો, મહારતનસઞ્ચયો;

અસીતિકોટિયો હિત્વા, હિરઞ્ઞસ્સાપિ પબ્બજિં.

૪૨૦. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા મહાકસ્સપો થેરો ઇમા ગાથાયો અભાસિત્થાતિ.

મહાકસ્સપત્થેરસ્સાપદાનં તતિયં.