૩-૨. મહામોગ્ગલ્લાનત્થેરઅપદાનં

૩૭૫. ‘‘અનોમદસ્સી ભગવા, લોકજેટ્ઠો નરાસભો;

વિહાસિ હિમવન્તમ્હિ, દેવસઙ્ઘપુરક્ખતો.

૩૭૬. ‘‘વરુણો નામ નામેન, નાગરાજા અહં તદા;

કામરૂપી વિકુબ્બામિ, મહોદધિનિવાસહં.

૩૭૭. ‘‘સઙ્ગણિયં ગણં હિત્વા, તૂરિયં પટ્ઠપેસહં;

સમ્બુદ્ધં પરિવારેત્વા, વાદેસું અચ્છરા તદા.

૩૭૮. ‘‘વજ્જમાનેસુ તૂરેસુ, દેવા તૂરાનિ [તુરિયેસુ, દેવા તુરિયાનિ (સી. સ્યા.)] વજ્જયું;

ઉભિન્નં સદ્દં સુત્વાન, બુદ્ધોપિ સમ્પબુજ્ઝથ.

૩૭૯. ‘‘નિમન્તેત્વાન સમ્બુદ્ધં, સકં ભવનુપાગમિં;

આસનં પઞ્ઞપેત્વાન, કાલમારોચયિં અહં.

૩૮૦. ‘‘ખીણાસવસહસ્સેહિ, પરિવુતો લોકનાયકો;

ઓભાસેન્તો દિસા સબ્બા, ભવનં મે ઉપાગમિ.

૩૮૧. ‘‘ઉપવિટ્ઠં મહાવીરં, દેવદેવં નરાસભં;

સભિક્ખુસઙ્ઘં તપ્પેસિં [સન્તપ્પેસિં (સ્યા.), તપ્પેમિ (ક.)], અન્નપાનેનહં તદા.

૩૮૨. ‘‘અનુમોદિ મહાવીરો, સયમ્ભૂ અગ્ગપુગ્ગલો;

ભિક્ખુસઙ્ઘે નિસીદિત્વા, ઇમા ગાથા અભાસથ.

૩૮૩. ‘‘‘યો સો [યં સો (ક.)] સઙ્ઘં અપૂજેસિ, બુદ્ધઞ્ચ લોકનાયકં;

તેન ચિત્તપ્પસાદેન, દેવલોકં ગમિસ્સતિ.

૩૮૪. ‘‘‘સત્તસત્તતિક્ખત્તુઞ્ચ, દેવરજ્જં કરિસ્સતિ;

પથબ્યા રજ્જં અટ્ઠસતં, વસુધં આવસિસ્સતિ.

૩૮૫. ‘‘‘પઞ્ચપઞ્ઞાસક્ખત્તુઞ્ચ, ચક્કવત્તી ભવિસ્સતિ;

ભોગા અસઙ્ખિયા તસ્સ, ઉપ્પજ્જિસ્સન્તિ તાવદે.

૩૮૬. ‘‘‘અપરિમેય્યે ઇતો કપ્પે, ઓક્કાકકુલસમ્ભવો;

ગોતમો નામ ગોત્તેન [નામેન (સી.)], સત્થા લોકે ભવિસ્સતિ.

૩૮૭. ‘‘‘નિરયા સો ચવિત્વાન, મનુસ્સતં ગમિસ્સતિ;

કોલિતો નામ નામેન, બ્રહ્મબન્ધુ ભવિસ્સતિ.

૩૮૮. ‘‘‘સો પચ્છા પબ્બજિત્વાન, કુસલમૂલેન ચોદિતો;

ગોતમસ્સ ભગવતો, દુતિયો હેસ્સતિ સાવકો.

૩૮૯. ‘‘‘આરદ્ધવીરિયો પહિતત્તો, ઇદ્ધિયા પારમિં ગતો;

સબ્બાસવે પરિઞ્ઞાય, નિબ્બાયિસ્સતિનાસવો’.

૩૯૦. ‘‘પાપમિત્તોપનિસ્સાય, કામરાગવસં ગતો;

માતરં પિતરઞ્ચાપિ, ઘાતયિં દુટ્ઠમાનસો.

૩૯૧. ‘‘યં યં યોનુપપજ્જામિ, નિરયં અથ માનુસં;

પાપકમ્મસમઙ્ગિતા, ભિન્નસીસો મરામહં.

૩૯૨. ‘‘ઇદં પચ્છિમકં મય્હં, ચરિમો વત્તતે ભવો;

ઇધાપિ એદિસો મય્હં, મરણકાલે ભવિસ્સતિ.

૩૯૩. ‘‘પવિવેકમનુયુત્તો, સમાધિભાવનારતો;

સબ્બાસવે પરિઞ્ઞાય, વિહરામિ અનાસવો.

૩૯૪. ‘‘ધરણિમ્પિ સુગમ્ભીરં, બહલં દુપ્પધંસિયં;

વામઙ્ગુટ્ઠેન ખોભેય્યં, ઇદ્ધિયા પારમિં ગતો.

૩૯૫. ‘‘અસ્મિમાનં ન પસ્સામિ, માનો મય્હં ન વિજ્જતિ;

સામણેરે ઉપાદાય, ગરુચિત્તં કરોમહં.

૩૯૬. ‘‘અપરિમેય્યે ઇતો કપ્પે, યં કમ્મમભિનીહરિં;

તાહં ભૂમિમનુપ્પત્તો, પત્તોમ્હિ આસવક્ખયં.

૩૯૭. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા મહામોગ્ગલ્લાનો થેરો ઇમા ગાથાયો અભાસિત્થાતિ.

મહામોગ્ગલ્લાનત્થેરસ્સાપદાનં દુતિયં.