આપત્તિસમુટ્ઠાનવણ્ણના

૪૭૦. અચિત્તકો આપજ્જતીતિઆદીસુ સહસેય્યાદિપણ્ણત્તિવજ્જં અસઞ્ચિચ્ચ આપજ્જન્તો અચિત્તકો આપજ્જતિ, દેસેન્તો સચિત્તકો વુટ્ઠાતિ. યંકિઞ્ચિ સઞ્ચિચ્ચ આપજ્જન્તો સચિત્તકો આપજ્જતિ, તિણવત્થારકેન વુટ્ઠહન્તો અચિત્તકો વુટ્ઠાતિ. પુબ્બે વુત્તમેવ તિણવત્થારકેન વુટ્ઠહન્તો અચિત્તકો આપજ્જતિ, અચિત્તકો વુટ્ઠાતિ. ઇતરં દેસેન્તો સચિત્તકો આપજ્જતિ, સચિત્તકો વુટ્ઠાતિ. ‘‘ધમ્મદાનં કરોમી’’તિ પદસોધમ્માદીનિ કરોન્તો કુસલચિત્તો આપજ્જતિ, ‘‘બુદ્ધાનં અનુસાસનિં કરોમી’’તિ ઉદગ્ગચિત્તો દેસેન્તો કુસલચિત્તો વુટ્ઠાતિ. દોમનસ્સિકો હુત્વા દેસેન્તો અકુસલચિત્તો વુટ્ઠાતિ, તિણવત્થારકેન નિદ્દાગતોવ વુટ્ઠહન્તો અબ્યાકતચિત્તો વુટ્ઠાતિ. ભિંસાપનાદીનિ કત્વા ‘‘બુદ્ધાનં સાસનં કરોમી’’તિ સોમનસ્સિકો દેસેન્તો અકુસલચિત્તો આપજ્જતિ, કુસલચિત્તો વુટ્ઠાતિ. દોમનસ્સિકોવ દેસેન્તો અકુસલચિત્તો વુટ્ઠાતિ, વુત્તનયેનેવ તિણવત્થારકેન વુટ્ઠહન્તો અબ્યાકતચિત્તો વુટ્ઠાતિ. નિદ્દોક્કન્તસમયે સહગારસેય્યં આપજ્જન્તો અબ્યાકતચિત્તો આપજ્જતિ, વુત્તનયેનેવ પનેત્થ ‘‘કુસલચિત્તો વુટ્ઠાતી’’તિઆદિ વેદિતબ્બં.

પઠમં પારાજિકં કતિહિ સમુટ્ઠાનેહીતિઆદિ પુબ્બે વુત્તનયત્તા ઉત્તાનમેવ.

૪૭૩. ચત્તારો પારાજિકા કતિહિ સમુટ્ઠાનેહીતિઆદીસુ ઉક્કટ્ઠપરિચ્છેદતો યં યં સમુટ્ઠાનં યસ્સ યસ્સ લબ્ભતિ, તં સબ્બં વુત્તમેવ હોતિ.

આપત્તિસમુટ્ઠાનવણ્ણના નિટ્ઠિતા.