૧૦. દસમસિક્ખાપદવણ્ણના

૧૧૬૪. દસમે – અનાપુચ્છાતિ અનાપુચ્છિત્વા. ભિક્ખુનીહિ દ્વિક્ખત્તું આપુચ્છિતબ્બં – પબ્બજ્જાકાલે ચ ઉપસમ્પદાકાલે ચ, ભિક્ખૂનં પન સકિં આપુચ્છિતેપિ વટ્ટતિ.

૧૧૬૫. અજાનન્તીતિ માતાદીનં અત્થિભાવં અજાનન્તી. સેસં ઉત્તાનમેવ. ઇદં અપુબ્બસમુટ્ઠાનસીસં. ચતુસમુટ્ઠાનં – વાચતો કાયવાચતો વાચાચિત્તતો કાયવાચાચિત્તતો ચ સમુટ્ઠાતિ. કથં? અબ્ભાનકમ્માદીસુ કેનચિદેવ કરણીયેન ખણ્ડસીમાયં નિસિન્ના ‘‘પક્કોસથ સિક્ખમાનં, ઇધેવ નં ઉપસમ્પાદેસ્સામા’’તિ ઉપસમ્પાદેતિ; એવં વાચતો સમુટ્ઠાતિ. ઉપસ્સયતો પટ્ઠાય ઉપસમ્પાદેસ્સામીતિ વત્વા ખણ્ડસીમં ગચ્છન્તિયા કાયવાચતો સમુટ્ઠાતિ. દ્વીસુપિ ઠાનેસુ પણ્ણત્તિભાવં જાનિત્વાવ વીતિક્કમં કરોન્તિયા વાચાચિત્તતો કાયવાચાચિત્તતો ચ સમુટ્ઠાતિ. અનનુજાનાપેત્વા ઉપસમ્પાદનતો કિરિયાકિરિયં, નોસઞ્ઞાવિમોક્ખં, અચિત્તકં, પણ્ણત્તિવજ્જં, કાયકમ્મં, વચીકમ્મં, તિચિત્તં, તિવેદનન્તિ.

દસમસિક્ખાપદં.