૧-૨-૩. પઠમદુતિયતતિયસિક્ખાપદવણ્ણના

૧૧૧૯. કુમારિભૂતવગ્ગસ્સ પઠમદુતિયતતિયસિક્ખાપદાનિ તીણિ તીહિ ગિહિગતસિક્ખાપદેહિ સદિસાનિ. યા પન તા સબ્બપઠમા દ્વે મહાસિક્ખમાના, તા અતિક્કન્તવીસતિવસ્સાતિ વેદિતબ્બા. તા ગિહિગતા વા હોન્તુ અગિહિગતા વા, સિક્ખમાના ઇચ્ચેવ વત્તબ્બા, ગિહિગતાતિ વા કુમારિભૂતાતિ વા ન વત્તબ્બા. ગિહિગતાય દસવસ્સકાલે સિક્ખાસમ્મુતિં દત્વા દ્વાદસવસ્સકાલે ઉપસમ્પદા કાતબ્બા. એકાદસવસ્સકાલે દત્વા તેરસવસ્સકાલે કાતબ્બા, દ્વાદસતેરસચુદ્દસપન્નરસસોળસસત્તરસઅટ્ઠારસવસ્સકાલે સમ્મુતિં દત્વા વીસતિવસ્સકાલે ઉપસમ્પદા કાતબ્બા. અટ્ઠારસવસ્સકાલતો પટ્ઠાય ચ પનાયં ગિહિગતાતિપિ કુમારિભૂતાતિપિ વત્તું વટ્ટતિ, કુમારિભૂતા પન ગિહિગતાતિ ન વત્તબ્બા, કુમારિભૂતા ઇચ્ચેવ વત્તબ્બા. મહાસિક્ખમાના પન ગિહિગતાતિપિ વત્તું ન વટ્ટતિ, કુમારિભૂતાતિપિ વત્તું ન વટ્ટતિ, સિક્ખાસમ્મુતિદાનવસેન પન તિસ્સોપિ સિક્ખમાનાતિ વત્તું વટ્ટતિ.

પઠમદુતિયતતિયાનિ.