૭. ગબ્ભિનિવગ્ગો

૧. પઠમસિક્ખાપદવણ્ણના

૧૦૬૯. ગબ્ભિનિવગ્ગસ્સ પઠમસિક્ખાપદે – આપન્નસત્તાતિ કુચ્છિપવિટ્ઠસત્તા.

પઠમસિક્ખાપદં.

૨. દુતિયસિક્ખાપદવણ્ણના

૧૦૭૩-૪. દુતિયે – પાયન્તિન્તિ થઞ્ઞં પાયમાનં. માતા વા હોતીતિ યં દારકં પાયેતિ, તસ્સ માતા વા હોતિ ધાતિ વા. સેસં ઉત્તાનમેવ. ઉભયમ્પિ તિસમુટ્ઠાનં – કિરિયં, સઞ્ઞાવિમોક્ખં, સચિત્તકં, પણ્ણત્તિવજ્જં, કાયકમ્મં, વચીકમ્મં, તિચિત્તં, તિવેદનન્તિ.

દુતિયસિક્ખાપદં.

૩. તતિયસિક્ખાપદવણ્ણના

૧૦૭૭. તતિયે – સિક્ખાસમ્મુતિં દાતુન્તિ કસ્મા દાપેસિ? ‘‘માતુગામો નામ લોલો હોતિ દ્વે વસ્સાનિ છસુ ધમ્મેસુ અસિક્ખિત્વા સીલાનિ પૂરયમાનો કિલમતિ, સિક્ખિત્વા પન પચ્છા ન કિલમિસ્સતિ, નિત્થરિસ્સતી’’તિ દાપેસિ.

૧૦૭૯. પાણાતિપાતા વેરમણિં દ્વે વસ્સાનિ અવીતિક્કમ્મ સમાદાનં સમાદિયામીતિ યં તં પાણાતિપાતા વેરમણીતિ પઞ્ઞત્તં સિક્ખાપદં, તં પાણાતિપાતા વેરમણિસિક્ખાપદં દ્વે વસ્સાનિ અવીતિક્કમિતબ્બસમાદાનં કત્વા સમાદિયામીતિ અત્થો. એસ નયો સબ્બત્થ. ઇમા છ સિક્ખાયો સટ્ઠિવસ્સાયપિ પબ્બજિતાય દાતબ્બાયેવ, ન એતાસુ અસિક્ખિતા ઉપસમ્પાદેતબ્બા.

તતિયસિક્ખાપદં.

૪. ચતુત્થસિક્ખાપદવણ્ણના

૧૦૮૪. ચતુત્થે – સબ્બં ઉત્તાનમેવ. સચે પન પઠમં વુટ્ઠાનસમ્મુતિ ન દિન્ના હોતિ, ઉપસમ્પદમાળકેપિ દાતબ્બાયેવ. ઇમા દ્વેપિ મહાસિક્ખમાના નામ.

ચતુત્થસિક્ખાપદં.

૫. પઞ્ચમસિક્ખાપદવણ્ણના

૧૦૯૦. પઞ્ચમે – કિઞ્ચાપિ ઊનદ્વાદસવસ્સં પરિપુણ્ણસઞ્ઞાય વુટ્ઠાપેન્તિયા અનાપત્તિ, સા પન અનુપસમ્પન્નાવ હોતિ. સેસં ઉત્તાનમેવ.

પઞ્ચમસિક્ખાપદં.

૬. છટ્ઠસિક્ખાપદવણ્ણના

૧૦૯૫. છટ્ઠે – દસવસ્સાય ગિહિગતાય સિક્ખાસમ્મુતિં દત્વા પરિપુણ્ણદ્વાદસવસ્સં ઉપસમ્પાદેતું વટ્ટતિ.

છટ્ઠસિક્ખાપદં.

૭. સત્તમસિક્ખાપદવણ્ણના

૧૧૦૧. સત્તમે – સબ્બં ઉત્તાનમેવ. સમુટ્ઠાનાદીનિપિ સબ્બેસુ દુતિયે વુત્તસદિસાનેવ. અયં પન વિસેસો – યત્થ સમ્મુતિ અત્થિ, તત્થ કિરિયાકિરિયં હોતીતિ.

સત્તમસિક્ખાપદં.

૮. અટ્ઠમસિક્ખાપદવણ્ણના

૧૧૦૮. અટ્ઠમે – ન અનુગ્ગણ્હાપેય્યાતિ ‘‘ઇમિસ્સા અય્યે ઉદ્દેસાદીનિ દેહી’’તિ એવં ઉદ્દેસાદીહિ ન અનુગ્ગણ્હાપેય્ય.

૧૧૧૦. પરિયેસિત્વાતિ અઞ્ઞં પરિયેસિત્વા ન લભતિ, સયં ગિલાના હોતિ, ન સક્કોતિ ઉદ્દેસાદીનિ દાતું, તસ્સા અનાપત્તિ. સેસં ઉત્તાનમેવ. ધુરનિક્ખેપસમુટ્ઠાનં – અકિરિયં, સઞ્ઞાવિમોક્ખં, સચિત્તકં, લોકવજ્જં, કાયકમ્મં, વચીકમ્મં, અકુસલચિત્તં, દુક્ખવેદનન્તિ.

અટ્ઠમસિક્ખાપદં.

૯. નવમસિક્ખાપદવણ્ણના

૧૧૧૩. નવમે – ન ઉપટ્ઠહેય્યાતિ ચુણ્ણેન મત્તિકાય દન્તકટ્ઠેન મુખોદકેનાતિ એવં તેન તેન કરણીયેન ન ઉપટ્ઠહેય્ય. સેસં ઉત્તાનમેવ. પઠમપારાજિકસમુટ્ઠાનં – અકિરિયં, સઞ્ઞાવિમોક્ખં, સચિત્તકં, લોકવજ્જં, કાયકમ્મં, અકુસલચિત્તં, દુક્ખવેદનન્તિ.

નવમસિક્ખાપદં.

૧૦. દસમસિક્ખાપદવણ્ણના

૧૧૧૬. દસમે – નેવ વૂપકાસેય્યાતિ ન ગહેત્વા ગચ્છેય્ય. ન વૂપકાસાપેય્યાતિ ‘‘ઇમં અય્યે ગહેત્વા ગચ્છા’’તિ અઞ્ઞં ન આણાપેય્ય. સેસમેત્થ ઉત્તાનમેવ. ધુરનિક્ખેપસમુટ્ઠાનં – અકિરિયં, સઞ્ઞાવિમોક્ખં, સચિત્તકં, લોકવજ્જં, કાયકમ્મં, વચીકમ્મં, અકુસલચિત્તં, દુક્ખવેદનન્તિ.

દસમસિક્ખાપદં.

ગબ્ભિનિવગ્ગો સત્તમો.