૬. આરામવગ્ગો

૧. પઠમસિક્ખાપદવણ્ણના

૧૦૨૫. આરામવગ્ગસ્સ પઠમસિક્ખાપદે – પરિક્ખેપં અતિક્કામેન્તિયા, ઉપચારં ઓક્કમન્તિયાતિ એત્થ પઠમપાદે દુક્કટં, દુતિયપાદે પાચિત્તિયં.

૧૦૨૭. સીસાનુલોકિકાતિ પઠમં પવિસન્તીનં ભિક્ખુનીનં સીસં અનુલોકેન્તી પવિસતિ, અનાપત્તિ. યત્થ ભિક્ખુનિયોતિ યત્થ ભિક્ખુનિયો પઠમતરં પવિસિત્વા સજ્ઝાયચેતિયવન્દનાદીનિ કરોન્તિ, તત્થ તાસં સન્તિકં ગચ્છામીતિ ગન્તું વટ્ટતિ. આપદાસૂતિ કેનચિ ઉપદ્દુતા હોતિ, એવરૂપાસુ આપદાસુ પવિસિતું વટ્ટતિ. સેસં ઉત્તાનમેવ.

ધુરનિક્ખેપસમુટ્ઠાનં – કિરિયાકિરિયં, સઞ્ઞાવિમોક્ખં, સચિત્તકં, પણ્ણત્તિવજ્જં, કાયકમ્મં, વચીકમ્મં, તિચિત્તં, તિવેદનન્તિ.

પઠમસિક્ખાપદં.

૨. દુતિયસિક્ખાપદવણ્ણના

૧૦૨૮. દુતિયે – આયસ્મા કપ્પિતકોતિ અયં જટિલસહસ્સબ્ભન્તરો થેરો. સંહરીતિ સઙ્કામેસિ. સંહટોતિ સઙ્કામિતો. કાસાવટોતિ ન્હાપિતા કાસાવં નિવાસેત્વા કમ્મં કરોન્તિ, તં સન્ધાયાહંસુ. સેસં ઉત્તાનમેવ.

તિસમુટ્ઠાનં – કિરિયં, સઞ્ઞાવિમોક્ખં, સચિત્તકં, લોકવજ્જં, કાયકમ્મં, વચીકમ્મં, અકુસલચિત્તં, દુક્ખવેદનન્તિ.

દુતિયસિક્ખાપદં.

૩. તતિયસિક્ખાપદવણ્ણના

૧૦૩૬. તતિયે – અનુસાસનિપુરેક્ખારાયાતિ ઇદાનિપિ ત્વં બાલા અબ્યત્તાતિઆદિના નયેન અનુસાસનિપક્ખે ઠત્વા વદન્તિયા અનાપત્તિ. સેસં ઉત્તાનમેવ. સમુટ્ઠાનાદીનિ અનન્તરસિક્ખાપદસદિસાનેવાતિ.

તતિયસિક્ખાપદં.

૪. ચતુત્થસિક્ખાપદવણ્ણના

૧૦૩૭. ચતુત્થે – સબ્બં ઉત્તાનમેવ. ચતુસમુટ્ઠાનં – કાયતો કાયવાચતો કાયચિત્તતો કાયવાચાચિત્તતો ચ સમુટ્ઠાતિ. નિમન્તિતાય અનાપુચ્છા ભુઞ્જન્તિયા આપત્તિસમ્ભવતો સિયા કિરિયાકિરિયં, પવારિતાય કપ્પિયં કારેત્વાપિ અકારેત્વાપિ ભુઞ્જન્તિયા આપત્તિસમ્ભવતો સિયા કિરિયં, નોસઞ્ઞાવિમોક્ખં, અચિત્તકં, પણ્ણત્તિવજ્જં, કાયકમ્મં, વચીકમ્મં, તિચિત્તં, તિવેદનન્તિ.

ચતુત્થસિક્ખાપદં.

૫. પઞ્ચમસિક્ખાપદવણ્ણના

૧૦૪૩. પઞ્ચમે – કુલે મચ્છરો કુલમચ્છરો, કુલમચ્છરો એતિસ્સા અત્થીતિ કુલમચ્છરિની કુલં વા મચ્છરાયતીતિ કુલમચ્છરિની. કુલસ્સ અવણ્ણન્તિ તં કુલં અસ્સદ્ધં અપ્પસન્નન્તિ. ભિક્ખુનીનં અવણ્ણન્તિ ભિક્ખુનિયો દુસ્સીલા પાપધમ્માતિ.

૧૦૪૫. સન્તંયેવ આદીનવન્તિ કુલસ્સ વા ભિક્ખુનીનં વા સન્તં અગુણં. સેસં ઉત્તાનમેવ. તિસમુટ્ઠાનં – કિરિયં, સઞ્ઞાવિમોક્ખં, સચિત્તકં, લોકવજ્જં, કાયકમ્મં, વચીકમ્મં, અકુસલચિત્તં દુક્ખવેદનન્તિ.

પઞ્ચમસિક્ખાપદં.

૬. છટ્ઠસિક્ખાપદવણ્ણના

૧૦૪૮. છટ્ઠે – ઓવાદાયાતિ ગરુધમ્મત્થાય. સંવાસાયાતિ ઉપોસથપવારણાપુચ્છનત્થાય. અયમેત્થ સઙ્ખેપો. વિત્થારો પન ભિક્ખુનોવાદકસિક્ખાપદવણ્ણનાયં વુત્તોયેવ.

એળકલોમસમુટ્ઠાનં – કિરિયં, નોસઞ્ઞાવિમોક્ખં, અચિત્તકં, પણ્ણત્તિવજ્જં, કાયકમ્મં, તિચિત્તં, તિવેદનન્તિ.

છટ્ઠસિક્ખાપદં.

૭. સત્તમસિક્ખાપદવણ્ણના

૧૦૫૩. સત્તમે – પરિયેસિત્વા ન લભતીતિ ભિક્ખુનિં ન લભતિ. સેસં ઉત્તાનમેવ. ઇમસ્સાપિ વિત્થારો ભિક્ખુનોવાદકે વુત્તોયેવ.

ધુરનિક્ખેપસમુટ્ઠાનં – અકિરિયં, સઞ્ઞાવિમોક્ખં, સચિત્તકં, લોકવજ્જં, કાયકમ્મં, વચીકમ્મં, અકુસલચિત્તં, દુક્ખવેદનન્તિ.

સત્તમસિક્ખાપદં.

૮. અટ્ઠમસિક્ખાપદવણ્ણના

૧૦૫૬. અટ્ઠમે – એકકમ્મન્તિઆદીહિ ઉપોસથપવારણાયેવ વુત્તા. સેસં ઉત્તાનમેવ. ઇમસ્સાપિ વિત્થારો ભિક્ખુનોવાદકે વુત્તોયેવ.

પઠમપારાજિકસમુટ્ઠાનં – અકિરિયં, સઞ્ઞાવિમોક્ખં, સચિત્તકં, લોકવજ્જં, કાયકમ્મં, અકુસલચિત્તં, દુક્ખવેદનન્તિ.

અટ્ઠમસિક્ખાપદં.

૯. નવમસિક્ખાપદવણ્ણના

૧૦૫૮. નવમે – સબ્બં ઉત્તાનમેવ. ઇમસ્સાપિ વિત્થારો ભિક્ખુનોવાદકે વુત્તોયેવ.

ધુરનિક્ખેપસમુટ્ઠાનં – અકિરિયં, સઞ્ઞાવિમોક્ખં, સચિત્તકં, લોકવજ્જં, કાયકમ્મં, વચીકમ્મં, અકુસલચિત્તં, દુક્ખવેદનન્તિ.

નવમસિક્ખાપદં.

૧૦. દસમસિક્ખાપદવણ્ણના

૧૦૬૨. દસમે – પસાખેતિ અધોકાયે. અધોકાયો હિ યસ્મા તતો રુક્ખસ્સ સાખા વિય ઉભો ઊરૂ પભિજ્જિત્વા ગતા, તસ્મા પસાખોતિ વુચ્ચતિ.

૧૦૬૫. ભિન્દાતિઆદીસુ સચે ‘‘ભિન્દ, ફાલેહી’’તિ સબ્બાનિ આણાપેતિ, સો ચ તથેવ કરોતિ, છ આણત્તિદુક્કટાનિ છ ચ પાચિત્તિયાનિ આપજ્જતિ. અથાપિ એવં આણાપેતિ – ‘‘ઉપાસક, યંકિઞ્ચિ એત્થ કાતબ્બં, તં સબ્બં કરોહી’’તિ, સો ચ સબ્બાનિપિ ભેદનાદીનિ કરોતિ; એકવાચાય છ દુક્કટાનિ છ પાચિત્તિયાનીતિ દ્વાદસ આપત્તિયો. સચે પન ભેદનાદીસુપિ એકંયેવ વત્વા ‘‘ઇદં કરોહી’’તિ આણાપેતિ, સો ચ સબ્બાનિ કરોતિ, યં આણત્તં, તસ્સેવ કરણે પાચિત્તિયં. સેસેસુ અનાપત્તિ. સેસં ઉત્તાનમેવ.

કથિનસમુટ્ઠાનં – કિરિયાકિરિયં, નોસઞ્ઞાવિમોક્ખં, અચિત્તકં, પણ્ણત્તિવજ્જં, કાયકમ્મં, વચીકમ્મં, તિચિત્તં, તિવેદનન્તિ.

દસમસિક્ખાપદં.

આરામવગ્ગો છટ્ઠો.