૯. નવમસિક્ખાપદવણ્ણના

૮૭૫. નવમે – અભિસપેય્યાતિ સપથં કરેય્ય. નિરયેન અભિસપતિ નામ ‘‘નિરયે નિબ્બત્તામિ, અવીચિમ્હિ નિબ્બત્તામિ, નિરયે નિબ્બત્તતુ, અવીચિમ્હિ નિબ્બત્તતૂ’’તિ એવમાદિના નયેન અક્કોસતિ. બ્રહ્મચરિયેન અભિસપતિ નામ ‘‘ગિહિની હોમિ, ઓદાતવત્થા હોમિ, પરિબ્બાજિકા હોમિ, ઇતરા વા એદિસા હોતૂ’’તિ એવમાદિના નયેન અક્કોસતિ; વાચાય વાચાય પાચિત્તિયં. ઠપેત્વા પન નિરયઞ્ચ બ્રહ્મચરિયઞ્ચ ‘‘સુનખી સૂકરી કાણા કુણી’’તિઆદિના નયેન અક્કોસન્તિયા વાચાય વાચાય દુક્કટં.

૮૭૮. અત્થપુરેક્ખારાયાતિ અટ્ઠકથં કથેન્તિયા. ધમ્મપુરેક્ખારાયાતિ પાળિં વાચેન્તિયા. અનુસાસનિપુરેક્ખારાયાતિ ‘‘ઇદાનિપિ ત્વં એદિસા, સાધુ વિરમસ્સુ, નો ચે વિરમસિ, અદ્ધા પુન એવરૂપાનિ કમ્માનિ કત્વા નિરયે ઉપ્પજ્જિસ્સસિ, તિરચ્છાનયોનિયા ઉપ્પજ્જિસ્સસી’’તિ એવં અનુસાસનિયં ઠત્વા વદન્તિયા અનાપત્તિ. સેસં ઉત્તાનમેવ.

તિસમુટ્ઠાનં – કિરિયં, સઞ્ઞાવિમોક્ખં, સચિત્તકં, લોકવજ્જં, કાયકમ્મં, વચીકમ્મં, અકુસલચિત્તં, દુક્ખવેદનન્તિ.

નવમસિક્ખાપદં.