૨. અન્ધકારવગ્ગો

૧. પઠમસિક્ખાપદવણ્ણના

૮૩૯. અન્ધકારવગ્ગસ્સ પઠમસિક્ખાપદે – અપ્પદીપેતિ પદીપચન્દસૂરિયઅગ્ગીસુ એકેનાપિ અનોભાસિતે. તેનેવસ્સ પદભાજને ‘‘અનાલોકે’’તિ વુત્તં. સલ્લપેય્ય વાતિ ગેહસ્સિતકથં કથેય્ય.

૮૪૧. અરહોપેક્ખા અઞ્ઞવિહિતાતિ ન રહોઅસ્સાદાપેક્ખા રહોઅસ્સાદતો અઞ્ઞવિહિતાવ હુત્વા ઞાતિં વા પુચ્છતિ, દાને વા પૂજાય વા મન્તેતિ. સેસં ઉત્તાનમેવ. થેય્યસત્થસમુટ્ઠાનં – કાયચિત્તતો કાયવાચાચિત્તતો ચ સમુટ્ઠાતિ, કિરિયં, સઞ્ઞાવિમોક્ખં, સચિત્તકં, લોકવજ્જં, કાયકમ્મં, વચીકમ્મં, અકુસલચિત્તં, દ્વિવેદનન્તિ.

પઠમસિક્ખાપદં.

૨. દુતિયસિક્ખાપદવણ્ણના

૮૪૨. દુતિયે – પટિચ્છન્ને ઓકાસેતિ ઇદમેવ નાનં. સેસં સબ્બં પુરિમસદિસમેવાતિ.

દુતિયસિક્ખાપદં.

૩. તતિયસિક્ખાપદવણ્ણના

૮૪૬. તતિયે – અજ્ઝોકાસેતિ નાનં, સેસં સબ્બં તાદિસમેવાતિ.

તતિયસિક્ખાપદં.

૪. ચતુત્થસિક્ખાપદવણ્ણના

૮૫૦-૩. ચતુત્થે – નિકણ્ણિકન્તિ કણ્ણમૂલં વુચ્ચતિ; કણ્ણમૂલે જપ્પેય્યાતિ વુત્તં હોતિ. સતિ કરણીયેતિ સલાકભત્તાદીનં આહરણત્થાય વિહારે વા દુન્નિક્ખિત્તં પટિસામનત્થાય. સેસં ઉત્તાનમેવ. સમુટ્ઠાનાદીનિ પુરિમસદિસાનેવાતિ.

ચતુત્થસિક્ખાપદં.

૫. પઞ્ચમસિક્ખાપદવણ્ણના

૮૫૪. પઞ્ચમે – ઘરં સોધેન્તાતિ તેસં કિર એતદહોસિ – ‘‘થેરિયા કોચિ કાયિકવાચસિકો વીતિક્કમો ન દિસ્સતિ, ઘરમ્પિ તાવ સોધેમા’’તિ, તતો ઘરં સોધેન્તા નં અદ્દસંસુ.

૮૫૬. અનોવસ્સકં અતિક્કામેન્તિયાતિ પઠમં પાદં અતિક્કામેન્તિયા દુક્કટં, દુતિયં અતિક્કામેન્તિયા પાચિત્તિયં, ઉપચારાતિક્કમે એસેવ નયો.

૮૫૮. ગિલાનાયાતિ યા તાદિસેન ગેલઞ્ઞેન આપુચ્છિતું ન સક્કોતિ. આપદાસૂતિ ઘરે અગ્ગિ વા ઉટ્ઠિતો હોતિ, ચોરા વા; એવરૂપે ઉપદ્દવે અનાપુચ્છા પક્કમતિ, અનાપત્તિ. સેસમેત્થ ઉત્તાનમેવ.

કથિનસમુટ્ઠાનં – કાયવાચતો કાયવાચાચિત્તતો ચ સમુટ્ઠાતિ, કિરિયાકિરિયં, નોસઞ્ઞાવિમોક્ખં, અચિત્તકં, પણ્ણત્તિવજ્જં, કાયકમ્મં, વચીકમ્મં, તિચિત્તં, તિવેદનન્તિ.

પઞ્ચમસિક્ખાપદં.

૬. છટ્ઠસિક્ખાપદવણ્ણના

૮૬૦. છટ્ઠે – અભિનિસીદેય્યાતિ નિસીદેય્ય. નિસીદિત્વા ગચ્છન્તિયા એકા આપત્તિ, અનિસીદિત્વા નિપજ્જિત્વા ગચ્છન્તિયા એકા, નિસીદિત્વા નિપજ્જિત્વા ગચ્છન્તિયા દ્વે.

૮૬૩. ધુવપઞ્ઞત્તેતિ ભિક્ખુનીનં અત્થાય નિચ્ચપઞ્ઞત્તે. સેસં ઉત્તાનમેવ. કથિનસમુટ્ઠાનં…પે… તિવેદનન્તિ.

છટ્ઠસિક્ખાપદં.

૭. સત્તમસિક્ખાપદવણ્ણના

૮૬૪. સત્તમેપિ – સબ્બં છટ્ઠે વુત્તનયેનેવ વેદિતબ્બં.

સત્તમસિક્ખાપદં.

૮. અટ્ઠમસિક્ખાપદવણ્ણના

૮૬૯. અટ્ઠમે – સબ્બં ઉત્તાનમેવ. તિસમુટ્ઠાનં – કિરિયં, સઞ્ઞાવિમોક્ખં, સચિત્તકં, લોકવજ્જં, કાયકમ્મં, વચીકમ્મં અકુસલચિત્તં, દુક્ખવેદનન્તિ.

અટ્ઠમસિક્ખાપદં.

૯. નવમસિક્ખાપદવણ્ણના

૮૭૫. નવમે – અભિસપેય્યાતિ સપથં કરેય્ય. નિરયેન અભિસપતિ નામ ‘‘નિરયે નિબ્બત્તામિ, અવીચિમ્હિ નિબ્બત્તામિ, નિરયે નિબ્બત્તતુ, અવીચિમ્હિ નિબ્બત્તતૂ’’તિ એવમાદિના નયેન અક્કોસતિ. બ્રહ્મચરિયેન અભિસપતિ નામ ‘‘ગિહિની હોમિ, ઓદાતવત્થા હોમિ, પરિબ્બાજિકા હોમિ, ઇતરા વા એદિસા હોતૂ’’તિ એવમાદિના નયેન અક્કોસતિ; વાચાય વાચાય પાચિત્તિયં. ઠપેત્વા પન નિરયઞ્ચ બ્રહ્મચરિયઞ્ચ ‘‘સુનખી સૂકરી કાણા કુણી’’તિઆદિના નયેન અક્કોસન્તિયા વાચાય વાચાય દુક્કટં.

૮૭૮. અત્થપુરેક્ખારાયાતિ અટ્ઠકથં કથેન્તિયા. ધમ્મપુરેક્ખારાયાતિ પાળિં વાચેન્તિયા. અનુસાસનિપુરેક્ખારાયાતિ ‘‘ઇદાનિપિ ત્વં એદિસા, સાધુ વિરમસ્સુ, નો ચે વિરમસિ, અદ્ધા પુન એવરૂપાનિ કમ્માનિ કત્વા નિરયે ઉપ્પજ્જિસ્સસિ, તિરચ્છાનયોનિયા ઉપ્પજ્જિસ્સસી’’તિ એવં અનુસાસનિયં ઠત્વા વદન્તિયા અનાપત્તિ. સેસં ઉત્તાનમેવ.

તિસમુટ્ઠાનં – કિરિયં, સઞ્ઞાવિમોક્ખં, સચિત્તકં, લોકવજ્જં, કાયકમ્મં, વચીકમ્મં, અકુસલચિત્તં, દુક્ખવેદનન્તિ.

નવમસિક્ખાપદં.

૧૦. દસમસિક્ખાપદવણ્ણના

૮૭૯. દસમે – સબ્બં ઉત્તાનમેવ. ધુરનિક્ખેપસમુટ્ઠાનં – કાયવાચાચિત્તતો સમુટ્ઠાતિ, કિરિયં, સઞ્ઞાવિમોક્ખં, સચિત્તકં, લોકવજ્જં, કાયકમ્મં, વચીકમ્મં, અકુસલકમ્મં, દુક્ખવેદનન્તિ.

દસમસિક્ખાપદં.

અન્ધકારવગ્ગો દુતિયો.