૩. નગ્ગવગ્ગો

૧. પઠમસિક્ખાપદવણ્ણના

૮૮૩-૬. નગ્ગવગ્ગસ્સ પઠમસિક્ખાપદે – બ્રહ્મચરિયં ચિણ્ણેનાતિ બ્રહ્મચરિયેન ચિણ્ણેન; અથ વા બ્રહ્મચરિયસ્સ ચરણેનાતિ; એવં કરણત્થે વા સામિઅત્થે વા ઉપયોગવચનં વેદિતબ્બં. અચ્છિન્નચીવરિકાયાતિ ઇદં ઉદકસાટિકં સન્ધાય વુત્તં, ન અઞ્ઞં ચીવરં. તસ્મા ઉદકસાટિકાય અચ્છિન્નાય વા નટ્ઠાય વા નગ્ગાય ન્હાયન્તિયા અનાપત્તિ. સચેપિ ઉદકસાટિકચીવરં મહગ્ઘં હોતિ, ન સક્કા નિવાસેત્વા બહિ ગન્તું, એવમ્પિ નગ્ગાય ન્હાયિતું વટ્ટતિ. સેસમેત્થ ઉત્તાનમેવ.

એળકલોમસમુટ્ઠાનં – કિરિયં, નોસઞ્ઞાવિમોક્ખં, અચિત્તકં, પણ્ણત્તિવજ્જં, કાયકમ્મં, તિચિત્તં, તિવેદનન્તિ.

પઠમસિક્ખાપદં.

૨. દુતિયસિક્ખાપદવણ્ણના

૮૮૭. દુતિયે – સબ્બં ઉત્તાનમેવ. છસમુટ્ઠાનં – કિરિયં, નોસઞ્ઞાવિમોક્ખં, અચિત્તકં, પણ્ણત્તિવજ્જં, કાયકમ્મં, વચીકમ્મં, તિચિત્તં, તિવેદનન્તિ.

દુતિયસિક્ખાપદં.

૩. તતિયસિક્ખાપદવણ્ણના

૮૯૩-૪. તતિયે – અનન્તરાયિકિનીતિ દસસુ અન્તરાયેસુ એકેનપિ અન્તરાયેન અનન્તરાયા. ધુરં નિક્ખિત્તમત્તેતિ ધુરં નિક્ખિપિત્વા સચેપિ પચ્છા સિબ્બતિ, આપત્તિયેવાતિ અત્થો. સેસં ઉત્તાનમેવ.

ધુરનિક્ખેપસમુટ્ઠાનં – અકિરિયં, સઞ્ઞાવિમોક્ખં, સચિત્તકં, લોકવજ્જં, કાયકમ્મં, વચીકમ્મં, અકુસલચિત્તં, દુક્ખવેદનન્તિ.

તતિયસિક્ખાપદં.

૪. ચતુત્થસિક્ખાપદવણ્ણના

૮૯૮-૯. ચતુત્થે – પઞ્ચ અહાનિ પઞ્ચાહં, પઞ્ચાહમેવ પઞ્ચાહિકં. સઙ્ઘાટીનં ચારો સઙ્ઘાટિચારો; પરિભોગવસેન વા ઓતાપનવસેન વા સઙ્ઘટિતટ્ઠેન સઙ્ઘાટીતિ લદ્ધનામાનં પઞ્ચન્નં ચીવરાનં પરિવત્તનન્તિ અત્થો. તસ્માયેવ પદભાજને ‘‘પઞ્ચમં દિવસં પઞ્ચ ચીવરાની’’તિઆદિમાહ. આપત્તિ પાચિત્તિયસ્સાતિ એત્થ ચ એકસ્મિં ચીવરે એકા આપત્તિ; પઞ્ચસુ પઞ્ચ.

૯૦૦. આપદાસૂતિ મહગ્ઘં ચીવરં, ન સક્કા હોતિ ચોરભયાદીસુ પરિભુઞ્જિતું; એવરૂપે ઉપદ્દવે અનાપત્તિ. સેસં ઉત્તાનમેવ. કથિનસમુટ્ઠાનં – અકિરિયં, નોસઞ્ઞાવિમોક્ખં, અચિત્તકં, પણ્ણત્તિવજ્જં, કાયકમ્મં, વચીકમ્મં, તિચિત્તં, તિવેદનન્તિ.

ચતુત્થસિક્ખાપદં.

૫. પઞ્ચમસિક્ખાપદવણ્ણના

૯૦૩. પઞ્ચમે – ચીવરસઙ્કમનીયન્તિ સઙ્કમેતબ્બં ચીવરં; અઞ્ઞિસ્સા સન્તકં અનાપુચ્છા ગહિતં પુન પટિદાતબ્બચીવરન્તિ અત્થો.

૯૦૬. આપદાસૂતિ સચે અપારુતં વા અનિવત્થં વા ચોરા હરન્તિ, એવરૂપાસુ આપદાસુ ધારેન્તિયા અનાપત્તિ. સેસં ઉત્તાનમેવ. કથિનસમુટ્ઠાનં – કિરિયાકિરિયં, નોસઞ્ઞાવિમોક્ખં, અચિત્તકં, પણ્ણત્તિવજ્જં, કાયકમ્મં, વચીકમ્મં, તિચિત્તં, તિવેદનન્તિ.

પઞ્ચમસિક્ખાપદં.

૬. છટ્ઠસિક્ખાપદવણ્ણના

૯૦૯-૧૦. છટ્ઠે – અઞ્ઞં પરિક્ખારન્તિ યંકિઞ્ચિ થાલકાદીનં વા સપ્પિતેલાદીનં વા અઞ્ઞતરં. આનિસંસન્તિ ‘‘કિત્તકં અગ્ઘનકં દાતુકામત્થા’’તિ પુચ્છતિ, ‘‘એત્તકં નામા’’તિ વદન્તિ, ‘‘આગમેથ તાવ, ઇદાનિ વત્થં મહગ્ઘં, કતિપાહેન કપ્પાસે આગતે સમગ્ઘં ભવિસ્સતી’’તિ એવં વત્વા નિવારેન્તિયા અનાપત્તિ. સેસં ઉત્તાનમેવ.

તિસમુટ્ઠાનં – કિરિયં, સઞ્ઞાવિમોક્ખં, સચિત્તકં, લોકવજ્જં, કાયકમ્મં, વચીકમ્મં, અકુસલચિત્તં, તિવેદનન્તિ.

છટ્ઠસિક્ખાપદં.

૭. સત્તમસિક્ખાપદવણ્ણના

૯૧૧. સત્તમે – પક્કમિંસૂતિ અઞ્ઞાસમ્પિ આગમનં આગમેન્તી ‘‘અદ્ધા અમ્હાકમ્પિ આગમેસ્સતી’’તિ તત્થ તત્થ અગમંસુ. પટિબાહેય્યાતિ પટિસેધેય્ય.

૯૧૫. આનિસંસન્તિ ‘‘એકિસ્સા એકં સાટકં નપ્પહોતિ, આગમેથ તાવ, કતિપાહેન ઉપ્પજ્જિસ્સતિ, તતો ભાજેસ્સામી’’તિ એવં આનિસંસં દસ્સેત્વા પટિબાહન્તિયા અનાપત્તિ. સેસં ઉત્તાનમેવ.

તિસમુટ્ઠાનં – કિરિયં, સઞ્ઞાવિમોક્ખં, સચિત્તકં, પણ્ણત્તિવજ્જં, કાયકમ્મં, વચીકમ્મં, તિચિત્તં, તિવેદનન્તિ.

સત્તમસિક્ખાપદં.

૮. અટ્ઠમસિક્ખાપદવણ્ણના

૯૧૬-૮. અટ્ઠમે – નટા નામ યે નાટકં નાટેન્તિ. નટકા નામ યે નચ્ચન્તિ. લઙ્ઘકા નામ યે વંસવરત્તાદીસુ લઙ્ઘનકમ્મં કરોન્તિ. સોકજ્ઝાયિકા નામ માયાકારા. કુમ્ભથૂણિકા નામ ઘટકેન કીળનકા; બિમ્બિસકવાદકાતિપિ વદન્તિ. દેતિ આપત્તિ પાચિત્તિયસ્સાતિ એત્થ ચીવરગણનાય આપત્તિયો વેદિતબ્બા. સેસં ઉત્તાનમેવ.

છસમુટ્ઠાનં – કિરિયં, નોસઞ્ઞાવિમોક્ખં, અચિત્તકં, પણ્ણત્તિવજ્જં, કાયકમ્મં, વચીકમ્મં, તિચિત્તં, તિવેદનન્તિ.

અટ્ઠમસિક્ખાપદં.

૯. નવમસિક્ખાપદવણ્ણના

૯૨૧-૪. નવમે – દુબ્બલચીવરપચ્ચાસાયાતિ દુબ્બલાય ચીવરપચ્ચાસાય. આનિસંસન્તિ કિઞ્ચાપિ ‘‘ન મયં અય્યે સક્કોમા’’તિ વદન્તિ, ‘‘ઇદાનિ પન તેસં કપ્પાસો આગમિસ્સતિ, સદ્ધો પસન્નો પુરિસો આગમિસ્સતિ, અદ્ધા દસ્સતી’’તિ એવં આનિસંસં દસ્સેત્વા નિવારેન્તિયા અનાપત્તિ. સેસં ઉત્તાનમેવ.

નવમસિક્ખાપદં.

૧૦. દસમસિક્ખાપદવણ્ણના

૯૨૭. દસમે – કથિનુદ્ધારં ન દસ્સન્તીતિ કીદિસો કથિનુદ્ધારો દાતબ્બો, કીદિસો ન દાતબ્બોતિ? યસ્સ અત્થારમૂલકો આનિસંસો મહા, ઉબ્ભારમૂલકો અપ્પો, એવરૂપો ન દાતબ્બો. યસ્સ પન અત્થારમૂલકો આનિસંસો અપ્પો, ઉબ્ભારમૂલકો મહા, એવરૂપો દાતબ્બો. સમાનિસંસોપિ સદ્ધાપરિપાલનત્થં દાતબ્બોવ.

૯૩૧. આનિસંસન્તિ ભિક્ખુનિસઙ્ઘો જિણ્ણચીવરો, કથિનાનિસંસમૂલકો મહાલાભોતિ એવરૂપં આનિસંસં દસ્સેત્વા પટિબાહન્તિયા અનાપત્તિ. સેસં ઉત્તાનમેવ.

દસમસિક્ખાપદં.

નગ્ગવગ્ગો તતિયો.