૬. છટ્ઠસિક્ખાપદવણ્ણના

૮૧૫. છટ્ઠે – ભત્તવિસ્સગ્ગન્તિ ભત્તકિચ્ચં. પાનીયેન ચ વિધૂપનેન ચ ઉપતિટ્ઠિત્વાતિ એકેન હત્થેન પાનીયથાલકં એકેન બીજનિં ગહેત્વા બીજમાના સમીપે ઠત્વાતિ અત્થો. અચ્ચાવદતીતિ પુબ્બેપિ તુમ્હે એવં ભુઞ્જથ, અહં એવં ઉપટ્ઠાનં કરોમી’’તિ પબ્બજિતચારિત્તં અતિક્કમિત્વા ગેહસ્સિતકથં કથેતીતિ અત્થો.

૮૧૭. યંકિઞ્ચિ પાનીયન્તિ સુદ્ધઉદકં વા હોતુ, તક્કદધિમત્થુરસખીરાદીનં વા અઞ્ઞતરં. યા કાચિ બીજનીતિ અન્તમસો ચીવરકણ્ણોપિ. હત્થપાસે તિટ્ઠતિ આપત્તિ પાચિત્તિયસ્સાતિ ઇધ ઠાનપચ્ચયાવ પાચિત્તિયં વુત્તં. પહારપચ્ચયા પન ખન્ધકે દુક્કટં પઞ્ઞત્તં.

૮૧૯. દેતિ દાપેતીતિ પાનીયં વા સૂપાદિં વા ઇમં પિવથ, ઇમિના ભુઞ્જથાતિ દેતિ; તાલવણ્ટં ઇમિના બીજન્તા ભુઞ્જથાતિ દેતિ; અઞ્ઞેન વા ઉભયમ્પિ દાપેતિ, અનાપત્તિ. અનુપસમ્પન્નં આણાપેતીતિ ઉપતિટ્ઠનત્થં સામણેરિં આણાપેતિ, અનાપત્તિ. સેસં ઉત્તાનમેવ.

એળકલોમસમુટ્ઠાનં – કિરિયં, નોસઞ્ઞાવિમોક્ખં, અચિત્તકં, પણ્ણત્તિવજ્જં, કાયકમ્મં, તિચિત્તં, તિવેદનન્તિ.

છટ્ઠસિક્ખાપદં.