૪. ચતુત્થપાટિદેસનીયસિક્ખાપદવણ્ણના

૫૭૦. ચતુત્થે – અવરુદ્ધા હોન્તીતિ પટિવિરુદ્ધા હોન્તિ.

૫૭૩. પઞ્ચન્નં પટિસંવિદિતન્તિ પઞ્ચસુ સહધમ્મિકેસુ યંકિઞ્ચિ પેસેત્વા ખાદનીયં ભોજનીયં આહરિસ્સામાતિ પટિસંવિદિતં કતમ્પિ અપ્પટિસંવિદિતમેવાતિ અત્થો. આરામં આરામૂપચારં ઠપેત્વાતિ આરઞ્ઞકસેનાસનારામઞ્ચ તસ્સ ઉપચારઞ્ચ ઠપેત્વા; ઉપચારતો નિક્ખન્તં અન્તરામગ્ગે ભિક્ખું દિસ્વા વા ગામં આગતસ્સ વા પટિસંવિદિતં કતમ્પિ અપ્પટિસંવિદિતમેવ હોતીતિ વેદિતબ્બં. સચે સાસઙ્કં હોતિ સાસઙ્કન્તિ આચિક્ખિતબ્બન્તિ કસ્મા આચિક્ખિતબ્બં? આરામે ચોરે વસન્તે અમ્હાકં નારોચેન્તીતિ વચનપટિમોચનત્થં. ચોરા વત્તબ્બા મનુસ્સા ઇધૂપચરન્તીતિ કસ્મા વત્તબ્બં? અત્તનો ઉપટ્ઠાકેહિ અમ્હે ગણ્હાપેન્તીતિ વચનપટિમોચનત્થં.

યાગુયા પટિસંવિદિતે તસ્સા પરિવારો આહરિય્યતીતિ યાગુયા પટિસંવિદિતં કત્વા ‘‘કિં સુદ્ધયાગુયા દિન્નાય પૂવભત્તાદીનિપિ એતિસ્સા યાગુયા પરિવારં કત્વા દસ્સામા’’તિ એવં યં કિઞ્ચિ આહરન્તિ, સબ્બં પટિસંવિદિતમેવ હોતિ. ભત્તેન પટિસંવિદિતેતિઆદીસુપિ એસેવ નયો. અસુકં નામ કુલં પટિસંવિદિતં કત્વા ખાદનીયાદીનિ ગહેત્વા ગચ્છતીતિ સુત્વા અઞ્ઞાનિપિ તેન સદ્ધિં અત્તનો દેય્યધમ્મં આહરન્તિ, વટ્ટતિ. યાગુયા પટિસંવિદિતં કત્વા પૂવં વા ભત્તં વા આહરન્તિ, એતમ્પિ વટ્ટતીતિ કુરુન્દિયં વુત્તં.

૫૭૫. ગિલાનસ્સાતિ અપ્પટિસંવિદિતેપિ ગિલાનસ્સ અનાપત્તિ. પટિસંવિદિતે વા ગિલાનસ્સ વા સેસકન્તિ એકસ્સત્થાય પટિસંવિદિતં કત્વા આહટં, તસ્સ સેસકં અઞ્ઞસ્સાપિ ભુઞ્જિતું વટ્ટતિ. ચતુન્નં પઞ્ચન્નં વા પટિસંવિદિતં કત્વા બહું આહટં હોતિ, અઞ્ઞેસમ્પિ દાતું ઇચ્છન્તિ, એતમ્પિ પટિસંવિદિતસેસકમેવ, સબ્બેસમ્પિ વટ્ટતિ. અથ અધિકમેવ હોતિ, સન્નિધિં મોચેત્વા ઠપિતં દુતિયદિવસેપિ વટ્ટતિ. ગિલાનસ્સ આહટાવસેસેપિ એસેવ નયો. યં પન અપ્પટિસંવિદિતમેવ કત્વા આભતં, તં બહિઆરામં પેસેત્વા પટિસંવિદિતં કારેત્વા આહરાપેતબ્બં, ભિક્ખૂહિ વા ગન્ત્વા અન્તરામગ્ગે ગહેતબ્બં. યમ્પિ વિહારમજ્ઝેન ગચ્છન્તા વા વનચરકાદયો વા વનતો આહરિત્વા દેન્તિ, પુરિમનયેનેવ પટિસંવિદિતં કારેતબ્બં. તત્થજાતકન્તિ આરામે જાતકમેવ; મૂલખાદનીયાદિં અઞ્ઞેન કપ્પિયં કત્વા દિન્નં પરિભુઞ્જતો અનાપત્તિ. સચે પન તં ગામં હરિત્વા પચિત્વા આહરન્તિ, ન વટ્ટતિ. પટિસંવિદિતં કારેતબ્બં. સેસમેત્થ ઉત્તાનમેવ.

કથિનસમુટ્ઠાનં – કિરિયાકિરિયં, નોસઞ્ઞાવિમોક્ખં, અચિત્તકં, પણ્ણત્તિવજ્જં, કાયકમ્મં, વચીકમ્મં, તિચિત્તં, તિવેદનન્તિ.

ચતુત્થપાટિદેસનીયં.

સમન્તપાસાદિકાય વિનયસંવણ્ણનાય

પાટિદેસનીયવણ્ણના નિટ્ઠિતા.

પાટિદેસનીયકણ્ડં નિટ્ઠિતં.