૩. પેસુઞ્ઞસિક્ખાપદવણ્ણના

૩૬. તતિયસિક્ખાપદે – ભણ્ડનજાતાનન્તિ સઞ્જાતભણ્ડનાનં. ભણ્ડનન્તિ કલહસ્સ પુબ્બભાગો, ‘‘ઇમિના ચ ઇમિના ચ ઇદં કતં; એવં વુત્તે એવં વક્ખામા’’તિઆદિકં સકસકપક્ખે સમ્મન્તનં. કલહોતિ આપત્તિગામિકો કાયવાચાવીતિક્કમો. વિવાદોતિ વિગ્ગાહિકકથા. તં વિવાદં આપન્નાનં વિવાદાપન્નાનં. પેસુઞ્ઞન્તિ પિસુણવાચં, પિયભાવસ્સ સુઞ્ઞકરણવાચન્તિ વુત્તં હોતિ.

૩૭. ભિક્ખુપેસુઞ્ઞેતિ ભિક્ખૂનં પેસુઞ્ઞે; ભિક્ખુતો સુત્વા ભિક્ખુના ભિક્ખુસ્સ ઉપસંહટપેસુઞ્ઞેતિ અત્થો.

૩૮. દ્વીહાકારેહીતિ દ્વીહિ કારણેહિ. પિયકમ્યસ્સ વાતિ ‘‘એવં અહં એતસ્સ પિયો ભવિસ્સામી’’તિ અત્તનો પિયભાવં પત્થયમાનસ્સ વા. ભેદાધિપ્પાયસ્સ વાતિ ‘‘એવમયં એતેન સદ્ધિં ભિજ્જિસ્સતી’’તિ પરસ્સ પરેન ભેદં ઇચ્છન્તસ્સ વા. જાતિતોપીતિઆદિ સબ્બં પુરિમસિક્ખાપદે વુત્તનયમેવ. ઇધાપિ ભિક્ખુનિં આદિં કત્વા સબ્બે અનુપસમ્પન્ના નામ.

ન પિયકમ્યસ્સ ન ભેદાધિપ્પાયસ્સાતિ એકં અક્કોસન્તં એકઞ્ચ ખમન્તં દિસ્વા ‘‘અહો નિલ્લજ્જો, ઈદિસમ્પિ નામ ભવન્તં પુન વત્તબ્બં મઞ્ઞિસ્સતી’’તિ એવં કેવલં પાપગરહિતાય ભણન્તસ્સ અનાપત્તિ. સેસં ઉત્તાનત્થમેવ. તિસમુટ્ઠાનં – કાયચિત્તતો વાચાચિત્તતો કાયવાચાચિત્તતો ચ સમુટ્ઠાતિ, કિરિયં, સઞ્ઞાવિમોક્ખં, સચિત્તકં, લોકવજ્જં, કાયકમ્મં, વચીકમ્મં, અકુસલચિત્તં, તિવેદનન્તિ.

પેસુઞ્ઞસિક્ખાપદં તતિયં.