૩. વસ્સૂપનાયિકક્ખન્ધકં

વસ્સૂપનાયિકાનુજાનનકથા

૧૮૪. વસ્સૂપનાયિકક્ખન્ધકે – અપઞ્ઞત્તોતિ અનનુઞ્ઞાતો અસંવિહિતો વા. તે ઇધ ભિક્ખૂતિ તે ભિક્ખૂ, ઇધસદ્દો નિપાતમત્તો. સઙ્ઘાતં આપાદેન્તાતિ વિનાસં આપાદેન્તા. સઙ્કસાયિસ્સન્તીતિ અપ્પોસ્સુક્કા નિબદ્ધવાસં વસિસ્સન્તિ. સકુન્તકાતિ સકુણા. વસ્સાને વસ્સં ઉપગન્તુન્તિ વસ્સાનનામકે તેમાસે વસ્સં ઉપગન્તબ્બન્તિ અત્થો. કતિ નુ ખો વસ્સૂપનાયિકાતિ કતિ નુ ખો વસ્સૂપગમનાનિ. અપરજ્જુગતાયાતિ એત્થ અપરજ્જુગતાય અસ્સાતિ અપરજ્જુગતા, તસ્સા અપરજ્જુગતાય; અતિક્કન્તાય અપરસ્મિં દિવસેતિ અત્થો. દુતિયનયેપિ માસો ગતાય અસ્સાતિ માસગતા, તસ્સા માસગતાય; અતિક્કન્તાય માસે પરિપુણ્ણેતિ અત્થો. તસ્મા આસાળ્હીપુણ્ણમાય અનન્તરે પાટિપદદિવસે, આસાળ્હીપુણ્ણમિતો વા અપરાય પુણ્ણમાય અનન્તરે પાટિપદદિવસેયેવ વિહારં પટિજગ્ગિત્વા પાનીયં પરિભોજનીયં ઉપટ્ઠપેત્વા સબ્બં ચેતિયવન્દનાદિસામીચિકમ્મં નિટ્ઠાપેત્વા ‘‘ઇમસ્મિં વિહારે ઇમં તેમાસં વસ્સં ઉપેમી’’તિ સકિં વા દ્વત્તિક્ખત્તું વા વાચં નિચ્છારેત્વા વસ્સં ઉપગન્તબ્બં.

વાચં નિચ્છારેત્વા વસ્સં ઉપગન્તબ્બં.

વસ્સાનેચારિકાપટિક્ખેપાદિકથા

૧૮૫-૬. યો પક્કમેય્યાતિ એત્થ અનપેક્ખગમનેન વા અઞ્ઞત્થ અરુણં ઉટ્ઠાપનેન વા આપત્તિ વેદિતબ્બા. યો અતિક્કમેય્યાતિ એત્થ વિહારગણનાય આપત્તિયો વેદિતબ્બા. સચે હિ તં દિવસં વિહારસતસ્સ ઉપચારં ઓક્કમિત્વા અતિક્કમતિ, સતં આપત્તિયો. સચે પન વિહારૂપચારં અતિક્કમિત્વા અઞ્ઞસ્સ વિહારસ્સ ઉપચારં અનોક્કમિત્વાવ નિવત્તતિ, એકા એવ આપત્તિ. કેનચિ અન્તરાયેન પુરિમિકં અનુપગતેન પચ્છિમિકા ઉપગન્તબ્બા.

વસ્સં ઉક્કડ્ઢિતુકામોતિ વસ્સનામકં પઠમમાસં ઉક્કડ્ઢિતુકામો, સાવણમાસં અકત્વા પુન આસાળ્હીમાસમેવ કત્તુકામોતિ અત્થો. આગમે જુણ્હેતિ આગમે માસેતિ અત્થો. અનુજાનામિ ભિક્ખવે રાજૂનં અનુવત્તિતુન્તિ એત્થ વસ્સુક્કડ્ઢને ભિક્ખૂનં કાચિ પરિહાનિ નામ નત્થીતિ અનુવત્તિતું અનુઞ્ઞાતં, તસ્મા અઞ્ઞસ્મિમ્પિ ધમ્મિકે કમ્મે અનુવત્તિતબ્બં. અધમ્મિકે પન ન કસ્સચિ અનુવત્તિતબ્બં.

સત્તાહકરણીયાનુજાનનકથા

૧૮૭-૮. સત્તાહકરણીયેસુ – સત્તાહકરણીયેન ગન્તુન્તિ સત્તાહબ્ભન્તરે યં કત્તબ્બં તં સત્તાહકરણીયં, તેન સત્તાહકરણીયેન કરણભૂતેન ગન્તું અનુજાનામીતિ અત્થો. પહિતે ગન્તુન્તિ ઇમેહિ સત્તહિ ભિક્ખુઆદીહિ દૂતે પહિતેયેવ ગન્તું અનુજાનામીતિ અત્થો. સત્તાહં સન્નિવત્તો કાતબ્બોતિ સત્તાહેયેવ સન્નિવત્તિતબ્બો, અટ્ઠમો અરુણો તત્થેવ ન ઉટ્ઠાપેતબ્બોતિ અત્થો.

ભિક્ખુનિસઙ્ઘં ઉદ્દિસ્સાતિ ઇતો પટ્ઠાય વચ્ચકુટિ જન્તાઘરં જન્તાઘરસાલાતિ ઇમાનિ તીણિ પરિહીનાનિ.

૧૮૯. ઉદોસિતાદીનિ ઉદોસિતસિક્ખાપદાદીસુ વુત્તાનેવ. રસવતીતિ ભત્તગેહં વુચ્ચતિ. વારેય્યં સઞ્ચરિત્તસિક્ખાપદે વુત્તમેવ. પુરાયં સુત્તન્તો પલુજ્જતીતિ યાવ અયં સુત્તન્તો ન પલુજ્જતિ, યાવ અયં સુત્તન્તો ન વિનસ્સતિ. અઞ્ઞતરં વા પનસ્સ કિચ્ચં હોતિ કરણીયં વાતિ એતેન પરિસઙ્ખતં યંકિઞ્ચિ કરણીયં સઙ્ગહિતં હોતિ. સબ્બત્થ ચ ‘‘ઇચ્છામિ દાનઞ્ચ દાતું ધમ્મઞ્ચ સોતું ભિક્ખૂ ચ પસ્સિતુ’’ન્તિ ઇમિનાવ કપ્પિયવચનેન પેસિતે ગન્તબ્બં, એતેસં વા વેવચનેન. પેય્યાલક્કમો પન એવં વેદિતબ્બો, યથા ‘‘ઉપાસકેન સઙ્ઘં ઉદ્દિસ્સ વિહારાદયો કારાપિતા હોન્તિ, સમ્બહુલે ભિક્ખૂ ઉદ્દિસ્સ, એકં ભિક્ખું ઉદ્દિસ્સ, ભિક્ખુનિસઙ્ઘં ઉદ્દિસ્સ, સમ્બહુલા ભિક્ખુનિયો, એકં ભિક્ખુનિં, સમ્બહુલા સિક્ખમાનાયો, એકં સિક્ખમાનં, સમ્બહુલે સામણેરે, એકં સામણેરં, સમ્બહુલા સામણેરિયો, એકં સામણેરિં ઉદ્દિસ્સ અત્તનો અત્થાય નિવેસનં કારાપિતં હોતી’’તિ વુત્તં; એવમેવ ‘‘ઉપાસિકાય, ભિક્ખુના, ભિક્ખુનિયા, સિક્ખમાનાય, સામણેરેન, સામણેરિયા સઙ્ઘં ઉદ્દિસ્સા’’તિ સબ્બં વત્તબ્બં. એતેસુ સત્તપ્પકારેસુ કરણીયેસુ પહિતે ગન્તબ્બં.

પઞ્ચન્નંઅપ્પહિતેપિઅનુજાનનકથા

૧૯૩. પઞ્ચન્નં સત્તાહકરણીયેનાતિ એતેસં ભિક્ખુઆદીનં સહધમ્મિકાનં ‘‘ગિલાનભત્તં વા ગિલાનુપટ્ઠાકભત્તં વા ભેસજ્જં વા પરિયેસિસ્સામિ, પુચ્છિસ્સામિ વા, ઉપટ્ઠહિસ્સામિ વા’’તિ એવમાદિના પરતો વિત્થારેત્વા દસ્સિતેન કારણેન અપ્પહિતેપિ ગન્તબ્બં, પગેવ પહિતે. ભિક્ખુ ગિલાનો હોતિ, અનભિરતિ ઉપ્પન્ના હોતિ, કુક્કુચ્ચં ઉપ્પન્નં હોતિ, દિટ્ઠિગતં ઉપ્પન્નં હોતિ, ગરુધમ્મં અજ્ઝાપન્નો હોતિ પરિવાસારહો, મૂલાય પટિકસ્સનારહો હોતિ, માનત્તારહો, અબ્ભાનારહો, સઙ્ઘો કમ્મં કત્તુકામો હોતિ, કતં વા સઙ્ઘેન કમ્મં હોતીતિ એતેહિ દસહિ કારણેહિ ભિક્ખુસ્સ સન્તિકં ગન્તબ્બં. ભિક્ખુનિયા સન્તિકં નવહિ કારણેહિ ગન્તબ્બં, સિક્ખમાનાય સન્તિકં છહિ – આદિતો ચતૂહિ, સિક્ખા કુપ્પિતા હોતિ, ઉપસમ્પજ્જિતુકામા હોતીતિ. સામણેરસ્સાપિ છહિ – આદિતો ચતૂહિ, વસ્સં પુચ્છિતુકામો ઉપસમ્પજ્જિતુકામો હોતીતિ. સામણેરિયા ઉપસમ્પદં અપનેત્વા સિક્ખાપદં દાતુકામો હોતીતિ ઇમિના સદ્ધિં પઞ્ચહિ. પરતો માતાપિતૂનં અનુઞ્ઞાતટ્ઠાનેપિ એસેવ નયો. અન્ધકટ્ઠકથાયં પન ‘‘યે માતાપિતૂનં ઉપટ્ઠાકા ઞાતકા વા અઞ્ઞાતકા વા તેસમ્પિ અપ્પહિતે ગન્તું વટ્ટતી’’તિ વુત્તં, તં નેવ અટ્ઠકથાયં, ન પાળિયા વુત્તં, તસ્મા ન ગહેતબ્બં.

પહિતેયેવઅનુજાનનકથા

૧૯૯. ભિક્ખુગતિકોતિ એકસ્મિં વિહારે ભિક્ખૂહિ સદ્ધિં વસનકપુરિસો. ઉન્દ્રિયતીતિ પલુજ્જતિ. ભણ્ડં છેદાપિતન્તિ દબ્બસમ્ભારભણ્ડં છેદાપિતં. આવહાપેય્યુન્તિ આહરાપેય્યું. દજ્જાહન્તિ દજ્જે અહં. સઙ્ઘકરણીયેનાતિ એત્થ યંકિઞ્ચિ ઉપોસથાગારાદીસુ સેનાસનેસુ ચેતિયછત્તવેદિકાદીસુ વા કત્તબ્બં, અન્તમસો ભિક્ખુનો પુગ્ગલિકસેનાસનમ્પિ, સબ્બં સઙ્ઘકરણીયમેવ. તસ્મા તસ્સ નિપ્ફાદનત્થં દબ્બસમ્ભારાદીનિ વા આહરિતું વડ્ઢકીપ્પભુતીનં ભત્તવેતનાદીનિ વા દાપેતું ગન્તબ્બં.

અયં પનેત્થ પાળિમુત્તકરત્તિચ્છેદવિનિચ્છયો – ધમ્મસવનત્થાય અનિમન્તિતેન ગન્તું ન વટ્ટતિ. સચે એકસ્મિં મહાવાસે પઠમંયેવ કતિકા કતા હોતિ – ‘‘અસુકદિવસં નામ સન્નિપતિતબ્બ’’ન્તિ, નિમન્તિતોયેવ નામ હોતિ, ગન્તું વટ્ટતિ. ‘‘ભણ્ડકં ધોવિસ્સામી’’તિ ગન્તું ન વટ્ટતિ. સચે પન આચરિયુપજ્ઝાયા પહિણન્તિ, વટ્ટતિ. નાતિદૂરે વિહારો હોતિ, તત્થ ગન્ત્વા અજ્જેવ આગમિસ્સામીતિ સમ્પાપુણિતું ન સક્કોતિ, વટ્ટતિ. ઉદ્દેસપરિપુચ્છાદીનં અત્થાયપિ ગન્તું ન વટ્ટતિ. ‘‘આચરિયં પસ્સિસ્સામી’’તિ પન ગન્તું લભતિ. સચે પન નં આચરિયો ‘‘અજ્જ મા ગચ્છા’’તિ વદતિ, વટ્ટતિ. ઉપટ્ઠાકકુલં વા ઞાતિકુલં વા દસ્સનાય ગન્તું ન લભતીતિ.

અન્તરાયેઅનાપત્તિવસ્સચ્છેદકથા

૨૦૧. યેન ગામો તેન ગન્તુન્તિઆદીસુ સચે ગામો અવિદૂરં ગતો હોતિ, તત્થ પિણ્ડાય ચરિત્વા વિહારમેવ આગન્ત્વા વસિતબ્બં. સચે દૂરં ગતો, સત્તાહવારેન અરુણો ઉટ્ઠાપેતબ્બો. ન સક્કા ચે હોતિ, તત્રેવ સભાગટ્ઠાને વસિતબ્બં. સચે મનુસ્સા યથાપવત્તાનિ સલાકભત્તાદીનિ દેન્તિ, ‘‘ન મયં તસ્મિં વિહારે વસિમ્હા’’તિ વત્તબ્બા. ‘‘મયં વિહારસ્સ વા પાસાદસ્સ વા ન દેમ, તુમ્હાકં દેમ, યત્થ કત્થચિ વસિત્વા ભુઞ્જથા’’તિ વુત્તે પન યથાસુખં ભુઞ્જિતબ્બં, તેસંયેવ તં પાપુણાતિ. ‘‘તુમ્હાકં વસનટ્ઠાને પાપુણાપેત્વા ભુઞ્જથા’’તિ વુત્તે પન યત્થ વસન્તિ, તત્થ નેત્વા વસ્સગ્ગેન પાપુણાપેત્વા ભુઞ્જિતબ્બં.

સચે પવારિતકાલે વસ્સાવાસિકં દેન્તિ, યદિ સત્તાહવારેન અરુણં ઉટ્ઠાપયિંસુ, ગહેતબ્બં. છિન્નવસ્સેહિ પન ‘‘ન મયં તત્થ વસિમ્હ, છિન્નવસ્સા મય’’ન્તિ વત્તબ્બં. યદિ ‘‘યેસં અમ્હાકં સેનાસનં પાપિતં, તે ગણ્હન્તૂ’’તિ વદન્તિ, ગહેતબ્બં. યં પન વિહારે ઉપનિક્ખિત્તકં મા વિનસ્સીતિ ઇધ આહટં ચીવરાદિવેભઙ્ગિયભણ્ડં, તં તત્થેવ ગન્ત્વા અપલોકેત્વા ભાજેતબ્બં. ‘‘ઇતો અય્યાનં ચત્તારો પચ્ચયે દેથા’’તિ કપ્પિયકારકાનં દિન્ને ખેત્તવત્થુઆદિકે તત્રુપ્પાદેપિ એસેવ નયો. સઙ્ઘિકઞ્હિ વેભઙ્ગિયભણ્ડં અન્તોવિહારે વા બહિસીમાય વા હોતુ, બહિસીમાય ઠિતાનં અપલોકેત્વા ભાજેતું ન વટ્ટતિ. ઉભયત્થ ઠિતમ્પિ પન અન્તોસીમાય ઠિતાનં અપલોકેત્વા ભાજેતું વટ્ટતિયેવ.

સઙ્ઘભેદેઅનાપત્તિવસ્સચ્છેદકથા

૨૦૨. સઙ્ઘો ભિન્નોતિ એત્થ ભિન્ને સઙ્ઘે ગન્ત્વા કરણીયં નત્થિ, યો પન ‘‘ભિજ્જિસ્સતી’’તિ આસઙ્કિતો, તં સન્ધાય ‘‘ભિન્નો’’તિ વુત્તં. સમ્બહુલાહિ ભિક્ખુનીહિ સઙ્ઘો ભિન્નોતિ એત્થ ન ભિક્ખુનીહિ સઙ્ઘો ભિન્નોતિ દટ્ઠબ્બો. વુત્તઞ્હેતં ‘‘ન ખો ઉપાલિ ભિક્ખુની સઙ્ઘં ભિન્દતી’’તિ. એતા પન નિસ્સાય અનુબલં કત્વા યં સઙ્ઘં ‘‘ભિક્ખૂ ભિન્દેય્યુ’’ન્તિ આસઙ્કા હોતિ, તં સન્ધાયેતં વુત્તં.

વજાદીસુવસ્સૂપગમનકથા

૨૦૩. વજોતિ ગોપાલકાનં નિવાસટ્ઠાનં. યેન વજોતિ એત્થ વજેન સદ્ધિં ગતસ્સ વસ્સચ્છેદે અનાપત્તિ.

ઉપકટ્ઠાયાતિ આસન્નાય. સત્થે વસ્સં ઉપગન્તુન્તિ એત્થ વસ્સૂપનાયિકદિવસે તેન ભિક્ખુના ઉપાસકા વત્તબ્બા ‘‘કુટિકા લદ્ધું વટ્ટતી’’તિ. સચે કરિત્વા દેન્તિ, તત્થ પવિસિત્વા ‘‘ઇધ વસ્સં ઉપેમી’’તિ તિક્ખત્તું વત્તબ્બં. નો ચે દેન્તિ, સાલાસઙ્ખેપેન ઠિતસકટસ્સ હેટ્ઠા ઉપગન્તબ્બં. તમ્પિ અલભન્તેન આલયો કાતબ્બો. સત્થે પન વસ્સં ઉપગન્તું ન વટ્ટતિ. આલયો નામ ‘‘ઇધ વસ્સં વસિસ્સામી’’તિ ચિત્તુપ્પાદમત્તં. સચે મગ્ગપ્પટિપન્નેયેવ સત્થે પવારણદિવસો હોતિ, તત્થેવ પવારેતબ્બં. અથ સત્થો અન્તોવસ્સેયેવ ભિક્ખુના પત્થિતટ્ઠાનં પત્વા અતિક્કમતિ, પત્થિતટ્ઠાને વસિત્વા તત્થ ભિક્ખૂહિ સદ્ધિં પવારેતબ્બં. અથાપિ સત્થો અન્તોવસ્સેયેવ અન્તરા એકસ્મિં ગામે તિટ્ઠતિ વા વિપ્પકિરતિ વા, તસ્મિંયેવ ગામે ભિક્ખૂહિ સદ્ધિં વસિત્વા પવારેતબ્બં, અપવારેત્વા તતો પરં ગન્તું ન વટ્ટતિ.

નાવાયં વસ્સં ઉપગચ્છન્તેનાપિ કુટિયંયેવ ઉપગન્તબ્બં. પરિયેસિત્વા અલભન્તેન આલયો કાતબ્બો. સચે અન્તોતેમાસં નાવા સમુદ્દેયેવ હોતિ, તત્થેવ પવારેતબ્બં. અથ નાવા કૂલં લભતિ, અયઞ્ચ પરતો ગન્તુકામો હોતિ, ગન્તું ન વટ્ટતિ. નાવાય લદ્ધગામેયેવ વસિત્વા ભિક્ખૂહિ સદ્ધિં પવારેતબ્બં. સચેપિ નાવા અનુતીરમેવ અઞ્ઞત્થ ગચ્છતિ, ભિક્ખુ ચ પઠમં લદ્ધગામેયેવ વસિતુકામો, નાવા ગચ્છતુ ભિક્ખુના તત્થેવ વસિત્વા ભિક્ખૂહિ સદ્ધિં પવારેતબ્બં.

ઇતિ વજે સત્થે નાવાયન્તિ તીસુ ઠાનેસુ નત્થિ વસ્સચ્છેદે આપત્તિ, પવારેતુઞ્ચ લભતિ. પુરિમેસુ પન ‘‘વાળેહિ ઉબ્બાળ્હા હોન્તી’’તિઆદીસુ સઙ્ઘભેદપરિયન્તેસુ વત્થૂસુ કેવલં અનાપત્તિ હોતિ, પવારેતું પન ન લભતિ.

૨૦૪. ન ભિક્ખવે રુક્ખસુસિરેતિ એત્થ સુદ્ધે રુક્ખસુસિરેયેવ ન વટ્ટતિ; મહન્તસ્સ પન રુક્ખસુસિરસ્સ અન્તો પદરચ્છદનં કુટિકં કત્વા પવિસનદ્વારં યોજેત્વા ઉપગન્તું વટ્ટતિ. રૂક્ખં છિન્દિત્વા ખાણુકમત્થકે પદરચ્છદનં કુટિકં કત્વાપિ વટ્ટતિયેવ. રુક્ખવિટભિયાતિ એત્થાપિ સુદ્ધે વિટપમત્તે ન વટ્ટતિ. મહાવિટપે પન અટ્ટકં બન્ધિત્વા તત્થ પદરચ્છદનં કુટિકં કત્વા ઉપગન્તબ્બં. અસેનાસનિકેનાતિ યસ્સ પઞ્ચન્નં છદનાનં અઞ્ઞતરેન છન્નં યોજિતદ્વારબન્ધનં સેનાસનં નત્થિ, તેન ન ઉપગન્તબ્બં. ન ભિક્ખવે છવકુટિકાયન્તિ છવકુટિકા નામ ટઙ્કિતમઞ્ચાદિભેદા કુટિ, તત્થ ઉપગન્તું ન વટ્ટતિ. સુસાને પન અઞ્ઞં કુટિકં કત્વા ઉપગન્તું વટ્ટતિ. ન ભિક્ખવે છત્તેતિ એત્થાપિ ચતૂસુ થમ્ભેસુ છત્તં ઠપેત્વા આવરણં કત્વા દ્વારં યોજેત્વા ઉપગન્તું વટ્ટતિ, છત્તકુટિકા નામેસા હોતિ. ચાટિયાતિ એત્થાપિ મહન્તેન કપલ્લેન છત્તે વુત્તનયેન કુટિં કત્વા ઉપગન્તું વટ્ટતિ.

અધમ્મિકકતિકાદિકથા

૨૦૫. એવરૂપા કતિકાતિ એત્થ અઞ્ઞાપિ યા ઈદિસી અધમ્મિકા કતિકા હોતિ, સા ન કાતબ્બાતિ અત્થો. તસ્સા લક્ખણં મહાવિભઙ્ગે વુત્તં.

૨૦૭-૮. પટિસ્સવે ચ આપત્તિ દુક્કટસ્સાતિ એત્થ ન કેવલં ‘‘ઇમં તેમાસં ઇધ વસ્સં વસથા’’તિ એતસ્સેવ પટિસ્સવે આપત્તિ, ‘‘ઇમં તેમાસં ભિક્ખં ગણ્હથ, ઉભોપિ મયં ઇધ વસ્સં વસિસ્સામ, એકતો ઉદ્દિસાપેસ્સામા’’તિ એવમાદિનાપિ તસ્સ તસ્સ પટિસ્સવે દુક્કટં. તઞ્ચ ખો પઠમં સુદ્ધચિત્તસ્સ પચ્છા વિસંવાદનપચ્ચયા, પઠમમ્પિ અસુદ્ધચિત્તસ્સ પન પટિસ્સવે પાચિત્તિયં, વિસંવાદને દુક્કટન્તિ પાચિત્તિયેન સદ્ધિં દુક્કટં યુજ્જતિ.

સો તદહેવ અકરણીયોતિઆદીસુ સચે વસ્સં અનુપગન્ત્વા વા પક્કમતિ, ઉપગન્ત્વા વા સત્તાહં બહિદ્ધા વીતિનામેતિ, પુરિમિકા ચ ન પઞ્ઞાયતિ, પટિસ્સવે ચ આપત્તિ. વસ્સં ઉપગન્ત્વા પન અરુણં અનુટ્ઠાપેત્વા તદહેવ સત્તાહકરણીયેન પક્કમન્તસ્સાપિ અન્તોસત્તાહે નિવત્તન્તસ્સ અનાપત્તિ, કો પન વાદો દ્વીહતીહં વસિત્વા અન્તોસત્તાહે નિવત્તન્તસ્સ. દ્વીહતીહં વસિત્વાતિ એત્થાપિ નિરપેક્ખેનેવ ઉપચારાતિક્કમે વસ્સચ્છેદો વેદિતબ્બો. સચે ઇધ વસિસ્સામીતિ આલયો અત્થિ, અસતિયા પન વસ્સં ન ઉપેતિ, ગહિતસેનાસનં સુગ્ગહિતં, છિન્નવસ્સો ન હોતિ, પવારેતું લભતિયેવ.

સત્તાહં અનાગતાય પવારણાયાતિ એત્થ નવમિતો પટ્ઠાય ગન્તું વટ્ટતિ, આગચ્છતુ વા મા વા, અનાપત્તિ. સેસં ઉત્તાનમેવાતિ.

વસ્સૂપનાયિકક્ખન્ધકવણ્ણના નિટ્ઠિતા.