૪. વત્થસુત્તવણ્ણના

૧૮૫. ચતુત્થે સતિસમ્બોજ્ઝઙ્ગો ઇતિ ચે મે હોતીતિ સતિસમ્બોજ્ઝઙ્ગોતિ એવં ચે મય્હં હોતિ. અપ્પમાણોતિ મે હોતીતિ અપ્પમાણોતિ એવં મે હોતિ. સુસમારદ્ધોતિ સુપરિપુણ્ણો. તિટ્ઠતીતિ એત્થ અટ્ઠહાકારેહિ સતિસમ્બોજ્ઝઙ્ગો તિટ્ઠતિ – ઉપ્પાદં અનાવજ્જિતત્તા અનુપ્પાદં આવજ્જિતત્તા સતિસમ્બોજ્ઝઙ્ગો તિટ્ઠતિ, પવત્તં, અપ્પવત્તં, નિમિત્તં, અનિમિત્તં સઙ્ખારે અનાવજ્જિતત્તા, વિસઙ્ખારં આવજ્જિતત્તા સતિસમ્બોજ્ઝઙ્ગો તિટ્ઠતીતિ. ઇમેહિ અટ્ઠહાકારેહિ તિટ્ઠતીતિ થેરો જાનાતિ, વુત્તાકારવિપરીતેહેવ અટ્ઠહાકારેહિ ચવન્તં ચવતીતિ પજાનાતિ. સેસબોજ્ઝઙ્ગેસુપિ એસેવ નયો.

ઇતિ ઇમસ્મિં સુત્તે થેરસ્સ ફલબોજ્ઝઙ્ગા કથિતા. યદા હિ થેરો સતિસમ્બોજ્ઝઙ્ગં સીસં કત્વા ફલસમાપત્તિં સમાપજ્જતિ, તદા ઇતરે છ તદન્વયા હોન્તિ. યદા ધમ્મવિચયાદીસુ અઞ્ઞતરં, તદાપિ સેસા તદન્વયા હોન્તીતિ એવં ફલસમાપત્તિયં અત્તનો ચિણ્ણવસિતં દસ્સેન્તો થેરો ઇમં સુત્તં કથેસીતિ.