૫. સમાધિસુત્તવણ્ણના

૫. પઞ્ચમે સમાધિન્તિ ઇદં ભગવા તે ભિક્ખૂ ચિત્તેકગ્ગતાય પરિહાયન્તે દિસ્વા, ‘‘ચિત્તેકગ્ગતં લભન્તાનં ઇમેસં કમ્મટ્ઠાનં ફાતિં ગમિસ્સતી’’તિ ઞત્વા આહ. અભિનન્દતીતિ પત્થેતિ. અભિવદતીતિ તાય અભિનન્દનાય ‘‘અહો પિયં ઇટ્ઠં કન્તં મનાપ’’ન્તિ વદતિ. વાચં અભિનન્દન્તોપિ ચ તં આરમ્મણં નિસ્સાય એવં લોભં ઉપ્પાદેન્તો અભિવદતિયેવ નામ. અજ્ઝોસાય તિટ્ઠતીતિ ગિલિત્વા પરિનિટ્ઠપેત્વા ગણ્હાતિ. યા રૂપે નન્દીતિ યા સા રૂપે બલવપત્થનાસઙ્ખાતા નન્દી. તદુપાદાનન્તિ તં ગહણટ્ઠેન ઉપાદાનં. નાભિનન્દતીતિ ન પત્થેતિ. નાભિવદતીતિ પત્થનાવસેન ન ‘‘ઇટ્ઠં કન્ત’’ન્તિ વદતિ. વિપસ્સનાચિત્તેન ચેતસા ‘‘અનિચ્ચં દુક્ખ’’ન્તિ વચીભેદં કરોન્તોપિ નાભિવદતિયેવ. પઞ્ચમં.