૬. લાભસક્કારસંયુત્તં

૧. પઠમવગ્ગો

૧. દારુણસુત્તવણ્ણના

૧૫૭. લાભસક્કારસંયુત્તસ્સ પઠમે દારુણોતિ થદ્ધો. લાભસક્કારસિલોકોતિ એત્થ લાભો નામ ચતુપચ્ચયલાભો. સક્કારોતિ તેસંયેવ સુકતાનં સુસઙ્ખતાનં લાભો. સિલોકોતિ વણ્ણઘોસો. કટુકોતિ તિખિણો. ફરુસોતિ ખરો. અન્તરાયિકોતિ અન્તરાયકરો. પઠમં.

૨. બળિસસુત્તવણ્ણના

૧૫૮. દુતિયે બાળિસિકોતિ બળિસં ગહેત્વા ચરમાનો મચ્છઘાતકો. આમિસગતન્તિ આમિસમક્ખિતં. આમિસચક્ખૂતિ આમિસે ચક્ખુ દસ્સનં અસ્સાતિ આમિસચક્ખુ. ગિલબળિસોતિ ગિલિતબળિસો. અનયં આપન્નોતિ દુક્ખં પત્તો. બ્યસનં આપન્નોતિ વિનાસં પત્તો. યથાકામકરણીયોતિ યથાકામેન યથારુચિયા યથેવ નં બાળિસિકો ઇચ્છતિ, તથેવસ્સ કત્તબ્બોતિ અત્થો. યથાકામકરણીયો પાપિમતોતિ યથા કિલેસમારસ્સ કામો, એવં કત્તબ્બો, નિરયં વા તિરચ્છાનયોનિં વા પેત્તિવિસયં વા પાપેતબ્બો. દુતિયં.

૩-૪. કુમ્મસુત્તાદિવણ્ણના

૧૫૯-૧૬૦. તતિયે મહાકુમ્મકુલન્તિ મહન્તં અટ્ઠિકચ્છપકુલં. અગમાસીતિ ‘‘એત્થ અદ્ધા કિઞ્ચિ ખાદિતબ્બં અત્થિ, તં મચ્છરાયન્તો મં એસ નિવારેતી’’તિ સઞ્ઞાય અગમાસિ. પપતાયાતિ પપતા વુચ્ચતિ દીઘરજ્જુકબદ્ધો અયકન્તકોસકે દણ્ડકં પવેસેત્વા ગહિતો કણ્ણિકસલ્લસણ્ઠાનો, અયકણ્ટકો, યસ્મિં વેગેન પતિત્વા કટાહે લગ્ગમત્તે દણ્ડકો નિક્ખમતિ, રજ્જુકો એકાબદ્ધો ગચ્છતેવ. સો કુમ્મોતિ સો વિદ્ધકુમ્મો. યેન સો કુમ્મોતિ ઉદકસદ્દં સુત્વા સાસઙ્કટ્ઠાનં ભવિસ્સતીતિ નિવત્તિત્વા યેન સો અત્થકામો કુમ્મો. ન દાનિ ત્વં અમ્હાકન્તિ ઇદાનિ ત્વં અમિત્તહત્થં ગતો, ન અમ્હાકં સન્તકોતિ અત્થો. એવં સલ્લપન્તાનંયેવ ચ નેસં નાવાય ઠિતો લુદ્દો રજ્જુકં આકડ્ઢિત્વા કુમ્મં ગહેત્વા યથાકામં અકાસિ. સેસમેત્થ ઇતો અનન્તરસુત્તે ચ ઉત્તાનમેવ. તતિયચતુત્થાનિ.

૫. મીળ્હકસુત્તવણ્ણના

૧૬૧. પઞ્ચમે મીળ્હકાતિ ગૂથપાણકા. ગૂથાદીતિ ગૂથભક્ખા. ગૂથપૂરાતિ અન્તો ગૂથેન ભરિતા. પુણ્ણા ગૂથસ્સાતિ ઇદં પુરિમસ્સેવ અત્થદીપનં. અતિમઞ્ઞેય્યાતિ પચ્છિમપાદે ભૂમિયં ઠપેત્વા પુરિમપાદે ગૂથસ્સ ઉપરિ આરોપેત્વા ઠિતા ‘‘અહમ્હિ ગૂથાદી’’તિ ભણન્તી અતિમઞ્ઞેય્ય. પિણ્ડપાતો ચસ્સ પૂરોતિ અપરોપિસ્સ પત્તપૂરો પણીતપિણ્ડપાતો ભવેય્ય. પઞ્ચમં.

૬. અસનિસુત્તવણ્ણના

૧૬૨. છટ્ઠે કં, ભિક્ખવે, અસનિવિચક્કન્તિ, ભિક્ખવે, કં પુગ્ગલં મત્થકે પતિત્વા મદ્દમાનં સુક્કાસનિચક્કં આગચ્છતુ. અપ્પત્તમાનસન્તિ અનધિગતારહત્તં. ઇતિ ભગવા ન સત્તાનં દુક્ખકામતાય, આદીનવં પન દસ્સેતું એવમાહ. અસનિચક્કઞ્હિ મત્થકે પતિતં એકમેવ અત્તભાવં નાસેતિ, લાભસક્કારસિલોકેન પરિયાદિણ્ણચિત્તો નિરયાદીસુ અનન્તદુક્ખં અનુભોતિ. છટ્ઠં.

૭. દિદ્ધસુત્તવણ્ણના

૧૬૩. સત્તમે દિદ્ધગતેનાતિ ગતદિદ્ધેન. વિસલ્લેનાતિ વિસમક્ખિતેન. સલ્લેનાતિ સત્તિયા. સત્તમં.

૮. સિઙ્ગાલસુત્તવણ્ણના

૧૬૪. અટ્ઠમે સિઙ્ગાલોતિ જરસિઙ્ગાલો. યથા હિ સુવણ્ણવણ્ણોપિ કાયો પૂતિકાયો ત્વેવ, તંખણં ગળિતમ્પિ ચ મુત્તં પૂતિમુત્તન્ત્વેવ વુચ્ચતિ, એવં તદહુજાતોપિ સિઙ્ગાલો જરસિઙ્ગાલોત્વેવ વુચ્ચતિ. ઉક્કણ્ટકેન નામાતિ એવંનામકેન રોગેન. સો કિર સીતકાલે ઉપ્પજ્જતિ. તસ્મિં ઉપ્પન્ને સકલસરીરતો લોમાનિ પતન્તિ, સકલસરીરં નિલ્લોમં હુત્વા, સમન્તતો ફુટતિ, વાતબ્ભાહતા વણા રુજ્જન્તિ. યથા ઉમ્મત્તકસુનખેન દટ્ઠો પુરિસો અનવટ્ઠિતોવ ભમતિ, એવં તસ્મિં ઉપ્પન્ને ભમિતબ્બો હોતિ, અસુકટ્ઠાને સોત્થિ ભવિસ્સતીતિ ન પઞ્ઞાયતિ. અટ્ઠમં.

૯. વેરમ્ભસુત્તવણ્ણના

૧૬૫. નવમે વેરમ્ભવાતાતિ એવંનામકા મહાવાતા. કીદિસે પન ઠાને તે વાતા વાયન્તીતિ? યત્થ ઠિતસ્સ ચત્તારો દીપા ઉપ્પલિનિપત્તમત્તા હુત્વા પઞ્ઞાયન્તિ. યો પક્ખી ગચ્છતીતિ નવવુટ્ઠે દેવે વિરવન્તો વાતસકુણો તત્થ ગચ્છતિ, તં સન્ધાયેતં વુત્તં. અરક્ખિતેનેવ કાયેનાતિઆદીસુ હત્થપાદે કીળાપેન્તો ખન્ધટ્ઠિં વા નામેન્તો કાયં ન રક્ખતિ નામ, નાનાવિધં દુટ્ઠુલ્લકથં કથેન્તો વાચં ન રક્ખતિ નામ, કામવિતક્કાદયો વિતક્કેન્તો ચિત્તં ન રક્ખતિ નામ. અનુપટ્ઠિતાય સતિયાતિ કાયગતાસતિં અનુપટ્ઠપેત્વા. નવમં.

૧૦. સગાથકસુત્તવણ્ણના

૧૬૬. દસમે અસક્કારેન ચૂભયન્તિ અસક્કારેન ચ ઉભયેન. સમાધીતિ અરહત્તફલસમાધિ. સો હિ તેન ન વિકમ્પતિ. અપ્પમાણવિહારિનોતિ અપ્પમાણેન ફલસમાધિના વિહરન્તસ્સ. સાતતિકન્તિ સતતકારિં. સુખુમંદિટ્ઠિવિપસ્સકન્તિ અરહત્તમગ્ગદિટ્ઠિયા સુખુમદિટ્ઠિફલસમાપત્તિઅત્થાય વિપસ્સનં પટ્ઠપેત્વા આગતત્તા વિપસ્સકં. ઉપાદાનક્ખયારામન્તિ ઉપાદાનક્ખયસઙ્ખાતે નિબ્બાને રતં. આહુ સપ્પુરિસો ઇતીતિ સપ્પુરિસોતિ કથેન્તીતિ. દસમં.

પઠમો વગ્ગો.

૨. દુતિયવગ્ગો

૧-૨. સુવણ્ણપાતિસુત્તાદિવણ્ણના

૧૬૭-૧૬૮. દુતિયવગ્ગસ્સ પઠમે સમ્પજાનમુસા ભાસન્તન્તિ અપ્પમત્તકેનપિ કારણેન સમ્પજાનમેવ મુસા ભાસન્તં. ‘‘સીલં પૂરેસ્સામી’’તિ સંવિહિતભિક્ખું સિનેરુમત્તોપિ પચ્ચયરાસિ ચાલેતું ન સક્કોતિ. યદા પન સીલં પહાય સક્કારનિસ્સિતો હોતિ, તદા કુણ્ડકમુટ્ઠિહેતુપિ મુસા ભાસતિ, અઞ્ઞં વા અકિચ્ચં કરોતિ. દુતિયં ઉત્તાનમેવાતિ. પઠમદુતિયાનિ.

૩-૧૦. સુવણ્ણનિક્ખસુત્તાદિવણ્ણના

૧૬૯. તતિયાદીસુ સુવણ્ણનિક્ખસ્સાતિ એકસ્સ કઞ્ચનનિક્ખસ્સ. સિઙ્ગીનિક્ખસ્સાતિ સિઙ્ગીસુવણ્ણનિક્ખસ્સ. પથવિયાતિ ચક્કવાળબ્ભન્તરાય મહાપથવિયા. આમિસકિઞ્ચિક્ખહેતૂતિ કસ્સચિદેવ આમિસસ્સ હેતુ અન્તમસો કુણ્ડકમુટ્ઠિનોપિ. જીવિતહેતૂતિ અટવિયં ચોરેહિ ગહેત્વા જીવિતે વોરોપિયમાને તસ્સપિ હેતુ. જનપદકલ્યાણિયાતિ જનપદે ઉત્તમિત્થિયા. તતિયાદીનિ.

દુતિયો વગ્ગો.

૩. તતિયવગ્ગો

૧-૨. માતુગામસુત્તાદિવણ્ણના

૧૭૦-૧૭૧. તતિયવગ્ગસ્સ પઠમે ન તસ્સ, ભિક્ખવે, માતુગામોતિ ન તસ્સ રહો એકકસ્સ નિસિન્નસ્સ તેન ધમ્મેન અત્થિકોપિ માતુગામો ચિત્તં પરિયાદાતું સક્કોતિ, યસ્સ લાભસક્કારસિલોકો ચિત્તં પરિયાદાતું સક્કોતીતિ, અત્થો. દુતિયં ઉત્તાનમેવાતિ. પઠમદુતિયાનિ.

૩-૬. એકપુત્તકસુત્તાદિવણ્ણના

૧૭૨-૧૭૫. તતિયે સદ્ધાતિ સોતાપન્ના. સેસમેત્થ ઉત્તાનમેવ. તથા ચતુત્થે પઞ્ચમે છટ્ઠે ચ. તતિયાદીનિ.

૭. તતિયસમણબ્રાહ્મણસુત્તવણ્ણના

૧૭૬. સત્તમે સમુદયન્તિઆદીસુ સહ પુબ્બકમ્મેન અત્તભાવો કોલપુત્તિયં વણ્ણપોક્ખરતા કલ્યાણવાક્કરણતા ધુતગુણાવીકરણં ચીવરધારણં પરિવારસમ્પત્તીતિ એવમાદિ લાભસક્કારસ્સ સમુદયો નામ, તં સમુદયસચ્ચવસેન નપ્પજાનાતિ, નિરોધો ચ પટિપદા ચ નિરોધસચ્ચમગ્ગસચ્ચવસેનેવ વેદિતબ્બા. સત્તમં.

૮. છવિસુત્તવણ્ણના

૧૭૭. અટ્ઠમે યસ્મા લાભસક્કારસિલોકો નરકાદીસુ, નિબ્બત્તેન્તો સકલમ્પિ ઇમં અત્તભાવં નાસેતિ, ઇધાપિ મરણમ્પિ મરણમત્તમ્પિ દુક્ખં આવહતિ, તસ્મા છવિં છિન્દતીતિઆદિ વુત્તં. અટ્ઠમં.

૯. રજ્જુસુત્તવણ્ણના

૧૭૮. નવમે વાળરજ્જુયાતિ સુત્તાદિમયા રજ્જુ મુદુકા હોતિ વાળરજ્જુ ખરા ફરુસા, તસ્મા અયમેવ ગહિતા. નવમં.

૧૦. ભિક્ખુસુત્તવણ્ણના

૧૭૯. દસમે દિટ્ઠધમ્મસુખવિહારાતિ ફલસમાપત્તિસુખવિહારા. તેસાહમસ્સાતિ તેસં અહં અસ્સ. ખીણાસવો હિ લાભી પુઞ્ઞસમ્પન્નો યાગુખજ્જકાદીનિ ગહેત્વા આગતાગતાનં અનુમોદનં કરોન્તો ધમ્મં દેસેન્તો પઞ્હં વિસ્સજ્જેન્તો ફલસમાપત્તિં અપ્પેત્વા નિસીદિતું ઓકાસં ન લભતિ, તં સન્ધાય વુત્તન્તિ. દસમં.

તતિયો વગ્ગો.

૪. ચતુત્થવગ્ગો

૧-૪. ભિન્દિસુત્તાદિવણ્ણના

૧૮૦-૧૮૩. ચતુત્થવગ્ગસ્સ પઠમં ઉત્તાનમેવ. દુતિયાદીસુ કુસલમૂલન્તિ અલોભાદિતિવિધકુસલધમ્મો. સુક્કો ધમ્મોતિ તસ્સેવ પરિયાયદેસના. અયં પનેત્થ સઙ્ખેપત્થો – યસ્સ કુસલમૂલાદિસઙ્ખાતસ્સ અનવજ્જધમ્મસ્સ અસમુચ્છિન્નત્તા દેવદત્તો સગ્ગે વા નિબ્બત્તેય્ય, મગ્ગફલાનિ વા અધિગચ્છેય્ય, સ્વાસ્સ સમુચ્છેદમગમા સબ્બસો સમુચ્છિન્નો વિનટ્ઠો. પઠમાદીનિ.

૫. અચિરપક્કન્તસુત્તવણ્ણના

૧૮૪. પઞ્ચમે પરાભવાયાતિ અવડ્ઢિયા વિનાસાય. અસ્સતરીતિ વળવાય કુચ્છિસ્મિં ગદ્રભસ્સ જાતા. અત્તવધાય ગબ્ભં ગણ્હાતીતિ તં અસ્સેન સદ્ધિં સમ્પયોજેન્તિ, સા ગબ્ભં ગણ્હિત્વા કાલે સમ્પત્તે વિજાયિતું ન સક્કોતિ, પાદેહિ ભૂમિયં પહરન્તી તિટ્ઠતિ, અથસ્સા ચત્તારો પાદે ચતૂસુ ખાણુકેસુ બન્ધિત્વા કુચ્છિં ફાલેત્વા પોતં નીહરન્તિ, સા તત્થેવ મરતિ. તેનેતં વુત્તં. પઞ્ચમં.

૬. પઞ્ચરથસતસુત્તવણ્ણના

૧૮૫. છટ્ઠે ભત્તાભિહારોતિ અભિહરિતબ્બં ભત્તં. તસ્સ પન પમાણં દસ્સેતું પઞ્ચ ચ થાલિપાકસતાનીતિ વુત્તં. તત્થ એકો થાલિપાકો દસન્નં પુરિસાનં ભત્તં ગણ્હાતિ. નાસાય પિત્તં ભિન્દેય્યુન્તિ અચ્છપિત્તં વા મચ્છપિત્તં વાસ્સ નાસપુટે પક્ખિપેય્યં. છટ્ઠં.

૭-૧૩. માતુસુત્તાદિવણ્ણના

૧૮૬-૧૮૭. સત્તમે માતુપિ હેતૂતિ ‘‘સચે મુસા ભણસિ, માતરં તે વિસ્સજ્જેસ્સામ. નો ચે ભણસિ, ન વિસ્સજ્જેસ્સામા’’તિ એવં ચોરેહિ અટવિયં પુચ્છમાનો તસ્સા ચોરહત્થગતાય માતુયાપિ હેતુ સમ્પજાનમુસા ન ભાસેય્યાતિ અત્થો. ઇતો પરેસુપિ એસેવ નયોતિ. સત્તમાદીનિ.

લાભસક્કારસંયુત્તવણ્ણના નિટ્ઠિતા.