૭. રાહુલસંયુત્તં

૧. પઠમવગ્ગો

૧-૮. ચક્ખુસુત્તાદિવણ્ણના

૧૮૮-૧૯૫. રાહુલસંયુત્તસ્સ પઠમે એકોતિ ચતૂસુ ઇરિયાપથેસુ એકવિહારી. વૂપકટ્ઠોતિ વિવેકટ્ઠો નિસ્સદ્દો. અપ્પમત્તોતિ સતિયા અવિપ્પવસન્તો. આતાપીતિ વીરિયસમ્પન્નો. પહિતત્તો વિહરેય્યન્તિ વિસેસાધિગમત્થાય પેસિતત્તો હુત્વા વિહરેય્યં. અનિચ્ચન્તિ હુત્વા અભાવાકારેન અનિચ્ચં. અથ વા ઉપ્પાદવયવન્તતાય તાવકાલિકતાય વિપરિણામકોટિયા નિચ્ચપટિક્ખેપતોતિ ઇમેહિપિ કારણેહિ અનિચ્ચં. દુક્ખન્તિ ચતૂહિ કારણેહિ દુક્ખં દુક્ખમનટ્ઠેન દુક્ખવત્થુકટ્ઠેન સતતસમ્પીળનટ્ઠેન સુખપટિક્ખેપેનાતિ. કલ્લન્તિ યુત્તં. એતં મમાતિ તણ્હાગાહો. એસોહમસ્મીતિ માનગાહો. એસો મે અત્તાતિ દિટ્ઠિગાહો. તણ્હાગાહો ચેત્થ અટ્ઠસતતણ્હાવિચરિતવસેન, માનગાહો નવવિધમાનવસેન, દિટ્ઠિગાહો દ્વાસટ્ઠિદિટ્ઠિવસેન વેદિતબ્બો. નિબ્બિન્દં વિરજ્જતીતિ એત્થ વિરાગવસેન ચત્તારો મગ્ગા કથિતા, વિરાગા વિમુચ્ચતીતિ એત્થ વિમુત્તિવસેન ચત્તારિ સામઞ્ઞફલાનિ.

એત્થ ચ પઞ્ચસુ દ્વારેસુ પસાદાવ ગહિતા, મનોતિ ઇમિના તેભૂમકં સમ્મસનચારચિત્તં. દુતિયે પઞ્ચસુ દ્વારેસુ આરમ્મણમેવ. તતિયે પઞ્ચસુ દ્વારેસુ પસાદવત્થુકચિત્તમેવ, મનોવિઞ્ઞાણેન તેભૂમકં સમ્મસનચારચિત્તં ગહિતં. એવં સબ્બત્થ નયો નેતબ્બો. છટ્ઠે તેભૂમકધમ્મા. અટ્ઠમે પન તણ્હાતિ તસ્મિં તસ્મિં દ્વારે જવનપ્પત્તાવ લબ્ભતિ. પઠમાદીનિ.

૯. ધાતુસુત્તવણ્ણના

૧૯૬. નવમે વિઞ્ઞાણધાતુવસેન નામં, સેસાહિ રૂપન્તિ નામરૂપં કથિતં. નવમં.

૧૦. ખન્ધસુત્તવણ્ણના

૧૯૭. દસમે રૂપક્ખન્ધો કામાવચરો, સેસા ચત્તારો સબ્બસઙ્ગાહિકપરિચ્છેદેન ચતુભૂમકા. ઇધ પન તેભૂમકાતિ ગહેતબ્બા. દસમં.

પઠમો વગ્ગો.

૨. દુતિયવગ્ગો

૧-૧૦. ચક્ખુસુત્તાદિવણ્ણના

૧૯૮-૧૯૯. દુતિયે દસ ઉત્તાનત્થાનેવ. પઠમાદીનિ.

૧૧. અનુસયસુત્તવણ્ણના

૨૦૦. એકાદસમે ઇમસ્મિઞ્ચ સવિઞ્ઞાણકે કાયેતિ અત્તનો સવિઞ્ઞાણકકાયં દસ્સેતિ, બહિદ્ધા ચાતિ પરસ્સ સવિઞ્ઞાણકં વા અવિઞ્ઞાણકં વા. પુરિમેન વા અત્તનો ચ પરસ્સ ચ વિઞ્ઞાણમેવ દસ્સેતિ, પચ્છિમેન બહિદ્ધા અનિન્દ્રિયબદ્ધરૂપં. અહઙ્કારમમઙ્કારમાનાનુસયાતિ અહંકારદિટ્ઠિ ચ મમંકારતણ્હા ચ માનાનુસયા ચ. ન હોન્તીતિ એતે કિલેસા કથં જાનન્તસ્સ એતેસુ વત્થૂસુ ન હોન્તીતિ પુચ્છતિ. સમ્મપ્પઞ્ઞાય પસ્સતીતિ સહ વિપસ્સનાય મગ્ગપઞ્ઞાય સુટ્ઠુ પસ્સતિ. એકાદસમં.

૧૨. અપગતસુત્તવણ્ણના

૨૦૧. દ્વાદસમે અહઙ્કારમમઙ્કારમાનાપગતન્તિ અહંકારતો ચ મમંકારતો ચ માનતો ચ અપગતં. વિધા સમતિક્કન્તન્તિ માનકોટ્ઠાસે સુટ્ઠુ અતિક્કન્તં. સન્તં સુવિમુત્તન્તિ કિલેસવૂપસમેન સન્તં, કિલેસેહેવ સુટ્ઠુ વિમુત્તં. સેસં ઉત્તાનમેવાતિ. દ્વાદસમં.

દુતિયો વગ્ગો.

દ્વીસુપિ અસેક્ખભૂમિ કથિતા. પઠમો પનેત્થ આયાચન્તસ્સ દેસિતો, દુતિયો અનાયાચન્તસ્સ. સકલેપિ પન રાહુલસંયુત્તે થેરસ્સ વિમુત્તિપરિપાચનીયધમ્માવ કથિતાતિ.

રાહુલસંયુત્તવણ્ણના નિટ્ઠિતા.